Sud prachodziŭ u zakrytym režymie.
14 žniŭnia ŭ Hrodzienskim abłasnym sudzie da 15 hadoŭ pazbaŭleńnia voli ŭ kałonii va ŭmovach uzmocnienaha režymu asudzili palitźniavolenaha kursanta MUS Illu Naryškina. Taksama jon pavinien vypłacić 600 bazavych vieličyń štrafu (24 tysiačy rubloŭ), piša «Viasna».
Jaho pryznali vinavatym pavodle č. 1 art. 361-3 (udzieł ci padrychtoŭka hramadzianina Respubliki Biełaruś na terytoryi zamiežnaj dziaržavy ŭ vajennych dziejańniach biez upaŭnavažańnia dziaržavy, č. 2 art. 356 (zdrada dziaržavie) Kryminalnaha kodeksa. Spravu ŭ zakrytym režymie z 22 lipienia pa 14 žniŭnia 2024 hoda razhledzieŭ sudździa Juryj Kazakievič.
Illa rodam sa Słonima, ale častku dziacinstva pravioŭ u Hrodnie.
Jahony baćka — ukrainiec, naradziŭsia ŭ Kryvym Rohu. Jon jašče ŭ saviecki čas skončyŭ avijacyjnuju vučelniu, ale pracavaŭ inžynieram-miechanikam u roznych krainach. Z maci chłopca jany vielmi daŭno nie žyvuć razam.
Naryškin pastupiŭ u akademiju Ministerstva ŭnutranych spravaŭ. Ciapier jon musiŭ by skončyć treci kurs kryminalna-vykanaŭčaha fakulteta.
Viadoma, što padčas vučoby jon žyŭ aktyŭnym žyćciom: vystupaŭ u roznych konkursach i ŭdzielničaŭ u intelektualnaj hulni ad telekanała «Biełaruś-2», jakaja nazyvajecca «Vieža». Apošnija publičnyja danyja ab im datujucca sakavikom 2023 hoda.
Mahčyma, 21-hadovy Illa Naryškin chacieŭ dałučycca da biełaruskich dobraachvotnikaŭ va Ukrainie. Pa artykułach, jakija jamu pradjaŭlajuć, u apošni čas čaściej za ŭsio sudzili ludziej, jakija vykazvali namier pajechać vajavać na baku Ukrainy. Niekatoryja z hetych ludziej pierapisvalisia z fejkavymi botami pałka Kalinoŭskaha, stvoranymi śpiecsłužbami RB.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary