«Atruta dla našych dziaciej». U ZŠA razharnulisia vializnyja sprečki pra štučnyja farbavalniki ŭ praduktach
U Kanadzie papularnyja dziciačyja śniadanki Froot Loops vyhladajuć blakleńka — jany afarbavanyja naturalnymi ekstraktami z morkvy ci čarnic. A ŭ ZŠA jany strakaciać roznymi kolerami: sintetyčnyja farbavalniki, naprykład, Red 40, tannyja, a amierykancy ŭvohule padabajuć jarkaje, zyrkaje. Pryznačeńnie Kienedzi-małodšaha ministram achovy zdaroŭja ZŠA aktyvizavała burnuju sprečku vakoł hetaha.
Jak piša The Wall Street Journal, Robiert Kienedzi-małodšy pastaviŭ pierad saboj metu zabaranić vykarystańnie štučnych farbavalnikaŭ, jakija jon nazyvaje «atrutaj dla našych dziaciej», u praduktach charčavańnia — takich, jak Froot Loops. Hetyja šmatki, nasyčanyja jarkaj hamaj čyrvonych, žoŭtych dy sinich koleraŭ, vabiać dziaciej, ale vyklikajuć zaniepakojenaść baćkoŭ i aktyvistaŭ zdarovaha charčavańnia z-za mahčymaj škodnaści.
Namier Kienedzi padtrymali niekatoryja spažyvieckija arhanizacyi, jakim daspadoby ideja «azdaraŭleńnia» situacyi ŭ halinie charčavańnia ŭ ZŠA. Krytyki płana Kienedzi śćviardžajuć, što navukovyja dokazy škodnaści štučnych farbavalnikaŭ albo niedastatkovyja, albo supiarečlivyja.
Niezaležna ad dyskusii vakoł płana ministra-naminata pa achovie zdaroŭja, bujnyja vytvorcy sielhaspradukcyi, jak WK Kellogg, užo daŭno znachodziacca pad presinham arhanizacyj, jakija zmahajucca suprać prodažu škodnych praduktaŭ. 85% praduktaŭ hetaj kampanii ŭžo nie ŭtrymlivajuć štučnych farbavalnikaŭ. Froot Loops u hetym płanie svojeasablivaje vyklučeńnie.
Cikava, što asnoŭnym zacikaŭlenym u zachavańni status-kvo źjaŭlajecca nie sama kampanija WK Kellogg, a sietki supiermarkietaŭ. Mnohija ź ich vystupajuć suprać źmienaŭ, śćviardžajučy, što poŭnaja admova ad sintetyčnych inhredyjentaŭ pryviadzie da pavyšeńnia cenaŭ na pradukty, a heta kiepska adabjecca na prodažach. Tamu niekatoryja supiermarkiety zaklikajuć WK Kellogg nie śpiašacca ź pierachodam, spasyłajučysia na ekanamičnyja i łahistyčnyja składanaści.
Džef Hroh, były dyrektar adździeła daśledavańniaŭ i raspracovak kampanii Kellogg, kaža, što mnohija kampanii zajmajuć pazicyju čakańnia, spadziejučysia, što šum ničym nie skončycca. Buduć hladzieć, jakimi buduć dalejšyja kroki administracyi Trampa.
«Vytvorcy praduktaŭ charčavańnia lubiać jasnaść», — cytuje vykazvańnie Hroha WSJ. «Uvieś hety ažyjataž i skałanańnie pavietra tolki adciahvajuć uvahu [ad uzvažanaha asensavańnia]».
Ciapier čytajuć
Aryštavany čynoŭnik, jaki moh stać nastupnym ministram achovy zdaroŭja7
Kamientary