Mužčyna ŭ Kitai zastrachavaŭ žonku na vialikuju sumu i zabiŭ jaje, kab atrymać kampiensacyju i raźličycca z prastytutkami

U Kitai zaviaršyŭsia rezanansny sud nad mužčynam, paznačanym u dakumientach śledstva pad proźviščam Li, jaki na paromie ŭdaryŭ žonku pa hałavie, a zatym skinuŭ jaje ŭ mora. Jon zrabiŭ heta, kab atrymać strachavuju kampiensacyju i vykarystać hrošy dla pahašeńnia daŭhoŭ i apłaty pasłuh prastytutak, paviedamlaje vydańnie South China Morning Post.

Incydent adbyŭsia 5 maja 2021 hoda, kali para padarožničała na marskim paromie z pravincyi Laanin u pravincyju Šańdun. Žonka, taksama z proźviščam Li, vypała za parenčy ŭ mora. Praz 45 chvilin palicyja znajšła jaje cieła, a muž vyhladaŭ paralizavanym ad šoku, śćviardžajučy, što heta byŭ niaščasny vypadak.

Adnak palicyja zapadozryła zabojstva, bo miesca padzieńnia było ŭ ślapoj zonie sistemy nazirańnia karabla, jakaja ŭklučała bolš za 200 kamier. Ekśpierty-kryminalisty taksama vyjavili śled ad udara na hałavie žančyny.

U dadatak da hetaha, mužčyna padazrona nastojvaŭ na chutkim atrymańni paśviedčańnia pra śmierć žonki, spasyłajučysia na miascovyja tradycyi, jakija nibyta patrabujuć kremacyi na praciahu troch dzion paśla śmierci.

Dadatkovaje rasśledavańnie vyjaviła, što Li na momant śmierci žonki mieŭ kala $140 tysiač daŭhoŭ (častka ź ich — apłata pasłuh prastytutak), a praz dva miesiacy šlubu kupiŭ na žyćcio žonki čatyry strachavyja polisy, u jakich byŭ paznačany jak adziny vyhadaatrymalnik pry peŭnych zdareńniach. Tak u vypadku śmierci žonki «ŭ transpartnym incydencie» sumarnaja kampiensacyja z usich polisaŭ mahła skłaści $1,6 miljona.

Klučavyja dokazy niepasrednaj viny mužčyny potym atrymali z zapisaŭ kamier nazirańnia, raźmieščanych krychu dalej ad miesca padzieńnia. Ekśpierty vyznačyli, što trajektoryja padzieńnia cieła žančyny ŭkazvaje na toje, što jaje šturchnuli. Akramia taho, u kadry byli zaŭvažany ruki pad čornym adzieńniem — a ŭ dzień trahiedyi Li nasiŭ mienavita čorny kaścium.

Padčas śledstva palicyja taksama vyjaviła, što Li ŭžo praz paŭmiesiaca paśla śmierci žonki chutka viarnuŭsia da raniejšych pavodzin, skarystaŭšysia pasłuhami prastytutki ŭ haścinicy. Adnak na hety raz prastytutka akazałasia padasłanaja palicyjaj. Paśla hetaha mužčynu zatrymali.

Pavialičyć

Jak vynikaje z sudovych dakumientaŭ, Li vałodaŭ restaranam u Šanchai i časta mieŭ daŭhi pierad piersanałam i pastaŭščykami tavaraŭ. Zabitaja im žonka była supracoŭnicaj hetaha restarana z 2016 hoda, a ŭ 2020-ym za šeść miesiacaŭ da svajoj hibieli vyjšła za Li zamuž. Pry hetym, pavodle śledstva, pra šlub nie viedaŭ nichto, u tym liku supracoŭniki restarana, a susiedzi śćviardžali, što para nie vyhladała jak siamja.

U vyniku sud pryznaŭ Li vinavatym u naŭmysnym zabojstvie, i ŭ lipieni 2022 hoda jon byŭ prysudžany da śmiarotnaha pakarańnia. Apielacyjny sud u kancy listapada 2024 hoda paćvierdziŭ hety prysud. Nieviadoma, ci było pakarańnie ŭžo pryviedziena ŭ vykanańnie.

• 2
• 0
• 1
• 6
• 7
• 1
• 5
• 0