Jak rychtavałasia apieracyja pa padryvie pejdžaraŭ i racyj «Chiezbały»? Ahienty «Masada» raskryli padrabiaznaści

Ab tym, jak rychtavałasia apieracyja pa padryvie pejdžaraŭ i racyj bajevikoŭ «Chiezbały», CBS News raskazali dva ahienty izrailskaj raźviedki «Masad». Jany byli siarod tych, chto ŭznačalvaŭ šmathadovuju apieracyju. Niadaŭna mužčyny vyšli na piensiju. U materyjale jany pradstaŭleny pad vydumanymi imionami Majkł i Habryel.

Pa słovach Majkła, praca pa pieratvareńni racyj u zbroju pačałasia bolš za dziesiać hadoŭ da taho, jak Izrail vykarystaŭ ich u vieraśni 2024 hoda.

Akumulatar dla racyi, jaki ŭtrymlivaŭ vybuchoŭku, byŭ vyrableny ŭ Izraili na adnym z zavodaŭ «Masada». Sami pryłady byli śpiecyjalna raspracavany tak, kab zručna źmiaščacca ŭ kišeniu broniekamizelki sałdata.

Pa słovach Majkła, «Chiezbała» pa dobraj canie kupiła bolš za 16 tysiač takich vybuchovaniebiaśpiečnych pryład. Košt nie moh być zanadta nizkim, kab nie vyklikać padazreńniaŭ. «Masad» taksama pavinien byŭ schavać svaju asobu jak pradaŭca i zrabić tak, kab nielha było adsačyć realnaha vytvorcu. Dla hetaha byli stvorany padstaŭnyja kampanii.

Pavialičyć

Ad racyj da pejdžaraŭ

Pa słovach Habryela, u 2022 hodzie «Masad» pierajšoŭ da raspracoŭki pejdžaraŭ z vybuchoŭkaj. U adroźnieńnie ad racyj, jakija nosiacca ŭ braniravanych taktyčnych kamizelkach, bajeviki «Chiezbały» amal zaŭsiody, niezaležna ad situacyi, mieli pry sabie hety kampaktny srodak suviazi. Heta zrabiła jaho idealnaj mišeńniu dla ŭkaranieńnia schavanaj vybuchovaj pryłady.

«Masad» daviedaŭsia, što «Chiezbała» zakuplaje pejdžary kampanii Gold Apollo z Tajvania. Hetyja pryłady byli kampaktnymi, stylnymi i dastatkova maleńkimi, kab zručna nasić ich u kišeniach. Adnak dla raźmiaščeńnia vybuchoŭki spatrebiŭsia pejdžar bolšaha pamieru.

Habryel raskazaŭ žurnalistam, što było praviedziena mnostva testaŭ z pejdžaram, jaki źmiaščali ŭ miakkuju palčatku i trymali pobač z tvaram maniekiena. Heta dazvoliła vyznačyć, jakoj kolkaści vybuchoŭki dastatkova dla taho, kab pry vybuchu paciarpieŭ tolki čałaviek, jaki nosić prystasavańnie, a nie tyja, chto pobač ź im.

Pa dadzienych «Masada», pryłady nie mieli raźviedvalnych mahčymaściaŭ i nie mahli vykarystoŭvacca dla adsočvańnia. Ich možna było vykarystoŭvać tolki jak minijaciurnyja bomby.

«Masad» taksama pravioŭ teściravańnie rynhtonaŭ pejdžaraŭ. Izrailskim raźviedčykam chaciełasia, kab huk sihnału byŭ dastatkova nastojlivym i terminovym — kab zaachvocić ułaśnika pejdžara nieadkładna dastać jaho z kišeni. Taksama było vyvučana, kolki času ŭ siarednim čałaviek tracić na toje, kab adreahavać na paviedamleńnie. Pa vynikach testaŭ siaredni čas reakcyi skłaŭ kala 7 siekund.

Jak pierakanali «Chiezbału» kupić pejdžary

Pa słovach Habryela, kali dyrektar «Masada» David Barnea ŭbačyŭ ich raspracoŭku, jon byŭ u šalenstvie i śćviardžaŭ, što nichto nie kupić takuju vialikuju pryładu, jakaja dosyć ciažkaja i niazručnaja dla našeńnia ŭ kišeni. Dyrektar patrabavaŭ unieści źmieny ŭ raspracoŭku, ale Habryel na praciahu dvuch tydniaŭ sprabavaŭ pierakanać svajho načalnika ŭ dobrych jakaściach pejdžara.

Hetyja dobryja jakaści paźniej stali rekłamavacca ŭ fejkavaj rekłamie na YouTube. Jana pazicyjanavała pejdžary jak tryvałyja, pyła– i vodaniepranikalnyja, z doŭhim terminam słužby batarei. Taksama była praviedziena kampanija pa publikacyi falšyvych anłajn-vodhukaŭ.

Pa słovach Habryela, rekłama była nastolki efiektyŭnaj, što mnohija ludzi, nie źviazanyja z «Chiezbałoj», taksama chacieli kupić ich pejdžar.

Dla taho, kab lehalizavać prodažy i schavać sapraŭdnaha vytvorcu, «Masad» stvaryŭ šerah padstaŭnych firm, u tym liku ŭ Vienhryi, jakija zaklučyli z kampanijaj Gold Apollo licenzijnuju damovu.

Dla nadańnia bolšaj praŭdzivaści i pavieličeńnia davieru «Masad» naniaŭ adnu z pradaŭščyc pradukcyi Gold Apollo, ź jakoj «Chiezbała» ŭžo pracavała. Jana prapanavała bajevikam pieršuju partyju pejdžaraŭ biaspłatna jak aphrejd starych madelaŭ. Pa słovach Habryela, da vieraśnia 2024 hoda ŭ kišeniach u bajevikoŭ «Chiezbały» apynułasia kala 5 000 pejdžaraŭ.

Jak viadoma, apieracyja» Masada» z pejdžarami zaviaršyłasia ich paśpiachovaj aktyvizacyjaj 17 vieraśnia 2024 hoda. Na nastupny dzień spracavali vybuchovyja prystasavańni ŭ racyjach, jakija zastavalisia biaździejnymi 10 hadoŭ.

• 25
• 1
• 0
• 0
• 0
• 0
• 1
• 1