55 hadzin na mašynie i da 100 jeŭra za padsadku ŭ aŭtobus. Piekła na ŭjeździe ŭ Biełaruś z Polščy
Čerhi na ŭjezd u Biełaruś z Polščy bjuć rekordy. Ludzi dzielacca, kolki času zajmaje prachodžańnie miažy.
Pieradśviatočnyja rekordy
Karystalnica tyktoku, jakaja pracuje ŭ Jeŭropie dalnabojščycaj i nočču 20 śniežnia stała ŭ čarhu na lehkavym aŭto ŭ punkcie propusku «Tarespal — Brest», u Biełaruś trapiła tolki a 9-j ranicy 23 śniežnia.
Na toje, kab dabracca da šłahbauma na polskim baku, u jaje syšło 47 hadzin, jašče 8 hadzin na sam prachod dźviuch miežaŭ. Vynik — 55 hadzin na toje, kab dabracca z Polščy ŭ Biełaruś.
Adzin z karystalnikaŭ čata pra pierasiačeńnie miažy, jaki staŭ u «kalejku» za 9,3 kiłamietra da punktu propusku, dabraŭsia da Bresta za 51 hadzinu i 30 chvilin.
Na piku čarha ź lehkavikoŭ z Polščy ŭ Biełaruś raściahnułasia amal na 10 kiłamietraŭ. Ludzi, jakija stali ŭ čarhu 22 śniežnia ŭ 14:00, u Biełaruś pryjechali ŭ 13:30 užo 24 śniežnia. Amal dvoje sutak.
Da 16 hadzin 24 śniežnia čarha skaraciłasia da 5 kiłamietraŭ.
U tyktoku dzielacca, što ŭ bližejšych kramach kala miažy razabrali pradukty i rajać zapasacca ježaj i vadoj zahadzia.
Čarha z aŭtobusaŭ pakul nie rassmaktałasia
Kali čarha lehkavych aŭto pačała źmianšacca, to aŭtobusnaja pa-raniejšamu trymajecca na piku. Na vyjezd z Polščy ŭ Biełaruś dniom 24 śniežnia stajali krychu bolš za 100 aŭtobusaŭ.
Karystalniki čata, jakija bieź pierasadak adstajali ŭsiu čarhu z 100-105-j pazicyi pišuć, što na prachod miažy ŭ ich sychodziła ad 37 da 40 hadzin.
U pikavyja hadziny padsieści možna było nie bližej, čym u aŭtobusy z druhoha ci navat treciaha dziasiatku ad šłahbauma.
Na piku niekatoryja kiroŭcy aŭtobusaŭ, jakija byli bližej za ŭsio da zajezdu na punkt propusku, prasili pa 100 jeŭra z čałavieka za mahčymaść padsieści. Paźniej ceny apuścilisia da 50 jeŭra. Volnyja miescy byvajuć pačynajučy z 15 aŭtobusa, dzielacca karystalniki.
Što ŭ zvarotnym kirunku?
Na vyjezd ź Biełarusi ŭ ES čerhaŭ z aŭtobusaŭ i lehkavych aŭto pa stanie 14 hadzin 24 śniežnia nie było.
Karystalniki admysłovaha čatu pišuć, što prachodžańnie dvuch miežaŭ na aŭtobusie ŭ polskim napramku zaniało ŭsiaho dźvie hadziny.
Kamientary