Chłopiec z Kobryna, jaki źmianiŭ poł, raskazaŭ, jak jaho dapytvali ŭ milicyi
Ivan-Januk pracavaŭ nastaŭnikam historyi i sacyjalnym piedahoham. Da taho času ŭ 2022 hodzie jon źmianiŭ poł i ŭziaŭ novaje imia. Letaś da chłopca pryjšli ź milicyi. Paśla pieražytaha jon vyjechaŭ z krainy.
Svajoj historyjaj Ivan-Januk padzialiŭsia ŭ prajekcie «My vierniemsia».
Ivan žyŭ u Kobrynie. U 2019 hodzie jon źviarnuŭsia ŭ kamisiju, jakaja razhladaje pytańnie transhiendarnaha pierachodu, i staŭ na ŭlik u seksołaha. Praz hod i dva miesiacy jaho zaprasili na śpiecyjalnuju kamisiju, jakaja dazvoliła jamu źmianić poł.
Praces pierachodu ŭ vypadku Ivana trochi zaciahnuŭsia. Jak tłumačyć hieroj, jon čakaŭ taho momantu, kali stanie finansava niezaležnym ad siamji, bo jaho transhiendarny pierachod baćki nie padtrymali. Asabliva ciažka składvalisia adnosiny z baćkam.
«Kali ja va ŭzroście 15-16 hadoŭ pačaŭ trochi vyhladać jak chłopiec (ja sabie abstryh vałasy, pačaŭ nasić bolš mieškavataje ŭniseks adzieńnie), jon kuplaŭ mnie žanočuju karunkavuju bializnu i prymušaŭ jaje pry im apranać i prasiŭ pakrucicca. Moh mianie dzieści pamacać».
«Dla mianie praviali asobnuju kamisiju ŭ vajenkamacie»
Ivan dzielicca, što, kali šukaŭ pracu ci chadziŭ u vajenkamat, jamu šancavała na ludziej.
«Kali ja pačynaŭ svaju pieršuju pracu ŭ KFC, u mianie byli na toj momant žanočyja dakumienty. I ŭ dyrektara restarana nie było nijakich pytańniaŭ da mianie. Jana mianie pradstaviła kalektyvu jak Ivana. I źviartałasia da mianie ŭ mužčynskim rodzie.
U vajenkamacie, kali mnie treba było atrymlivać vajenny bilet, mnie praviali kamisiju asobna ad usich, kab i mianie nichto nie biantežyŭ, i ja nikoha. Z daktarami taksama ŭ Kobrynie amal nie było niejkich prablem».
Apošnim časam u Biełarusi Ivan-Januk pracavaŭ nastaŭnikam historyi i sacyjalnym piedahoham u škole-internacie ŭ Kobrynie, arhanizoŭvaŭ roznyja mierapryjemstvy.
Prychod milicyi
U siaredzinie leta 2024 hoda Ivanam zacikaviłasia milicyja. Jak raskazvaje chłopiec, adnojčy ŭviečary ŭ kvateru ciotki, u jakoj jon žyŭ, pryjšli dva milicyjanty biez formy. Jany paprasili jaho ŭziać z saboju telefon i prajści razam. U mašynie siłaviki pradstavilisia supracoŭnikami adździeła pa narkahandli i handli ludźmi.
Na pytańnie Ivana, jakija adnosiny jon maje da takoj dziejnaści, milicyjanty adkazali, što chočuć prosta ź im parazmaŭlać. «Davaj raskažy, ci zaŭsiody ty byŭ chłopcam», — prapanavali siłaviki. Jon raskazaŭ, što ŭ 22-m hodzie źmianiŭ dakumienty z žanočych na mužčynskija.
«Jany takija: «Tak ty dziaŭčyna». Ja adkazvaju: «Nie, nie dziaŭčyna, ja chłopiec». Jany: «Dobra, a pamiž noh u ciabie što?». Ja skazaŭ, što takija pytańni niekarektna zadavać i ja nie chaču na ich adkazvać. Jany znoŭ: «Nu ty skažy, što ŭ ciabie pamiž noh». (…) Ja pytajusia: «A ŭ vas što?», — zhadvaje akaličnaści razmovy Ivan.
Paśla hetaha, pa słovach chłopca, siłaviki pačali vyvučać jaho telefon. U niejki momant jany znajšli jaho dziciačyja zdymki. I paźniej dapytvali, ci padabajucca jamu maleńkija dzieci. U niejki momant prahučała: «A voś kali my ciabie tut u mašynie zhvałcim, što ty budzieš rabić?»
Januk zaŭvažaje, što vielmi bajaŭsia, što siłaviki znojduć u jaho telefonie materyjały, jakija śviedčać ab jaho ŭdziele ŭ pratestach 2020 hoda ŭ rodnym Kobrynie.
«Jany heta ŭžo znajšli ŭ adździaleńni. Ale ich heta nie zacikaviła. Jany prosta: «A, nu ty taksama tam udzielničaŭ. Nu dobra». I ŭsio. Jany za heta nie začapilisia. Ja zrazumieŭ, što ich nie cikavić maja palityčnaja dziejnaść, ich bolš cikavić, litaralna, što ŭ mianie ŭ štanach znachodzicca i z kim ja seksam zajmajusia», —
davodzić Ivan i raskazvaje, što jašče ŭ mašynie siłaviki ŭ jaho pytalisia, dzie jon chavaje svaje hrudzi, prasili padniać adzieńnie i pakazać.
«Ja dumaŭ, što ź mianie ŭsio ž taki ściahnuć štany»
U adździaleńni milicyi, pa słovach Ivana, jaho znoŭ stali pytacca, što ŭ jaho pad adzieńniem.
«A potym adzin ź ich kaža: «A davaj my zaraz pahladzim». I jon prosta padychodzić, chapajecca za moj remień i pačynaje jaje rasšpilvać. Ja jaho bju pa rukach i kažu, što nie budu ničoha pakazvać. Jon supakoiŭsia, adsieŭ nazad, i mianie bolš nie čapali. Ale situacyja vielmi paŭpłyvała na mianie ŭ sensie mientalnaha stanu. Ja dumaŭ, što ź mianie ŭsio ž taki ściahnuć štany».
Kali milicyjaniery ŭbačyli ŭ pašparcie chłopca štamp ab šlubie, heta vyklikała novuju chvalu cikaŭnaści:
«Jany pytalisia, jak my zajmajemsia seksam, jak časta ja zajmajusia masturbacyjaj, ci zajmajusia ja masturbacyjaj. Ja pytaju: jak hetyja pytańni źviazanyja z maim zatrymańniem? Jany adkazali, što prosta sa mnoj razmaŭlajuć».
U škole prapanavali zvolnicca pa ŭłasnym žadańni
Kali milicyjaniery daviedalisia, što chłopiec pracuje ŭ škole, to vykazali mierkavańnie, što «takija ludzi nie pavinny pracavać u škole», tamu što «mohuć dzieciam niešta nie toje skazać».
Na momant pačatku pracy ŭ škole Ivan užo źmianiŭ dakumienty, tamu pra jaho transhiendarny pierachod tam nichto nie viedaŭ. Prablemy pačalisia paśle razmovy ź milicyjaj. U pačatku navučalnaha hoda ŭ škołu pryjazdžali supracoŭniki prakuratury. Paśla hetaha jaho vyklikała dyrektar škoły i prapanavała zvolnicca pa ŭłasnym žadańni.
«Mnie dyrektar skazała, što jany joj skazali, što ŭ mianie jość prablemy z zakonam. Ja razumieju, što ŭ mianie niama nijakich prablem z zakonam, akramia zatrymańnia, jakoje było ŭ siaredzinie leta. Ja ŭ jaje pytajusia, jakija prablemy. Jana ŭzdychaje i havoryć: «Ty viedaješ».
Paśla zvalnieńnia z škoły Ivan dva miesiacy adpracavaŭ barysta ŭ kaviarni «Parahraf» u Kobrynie. Ale vymušany byŭ źjechać, bo jamu i jaho rodnym zvanili ź milicyi. Na hety raz cikavilisia jaho palityčnaj pazicyjaj, jaho šlubam.
«Ja zrazumieŭ, što mnie tut spakoju nie daduć, i ja prosta źjechaŭ». U tranzitnaj zonie aeraportu ŭ Polščy Ivan zaprasiŭ mižnarodnuju abaronu.
Bolšaść studentaŭ BDU ličyć prymalnymi homaseksualnaść i adnapołyja šluby
Jak transhiendar abvaliŭ prodažy samaha papularnaha amierykanskaha piva
U Hiermanii kožny zmoža pa ŭłasnaj zajavie źmianić poł i imia. I heta možna budzie rabić štohod
Mižnarodnaja fiederacyja płavańnia ŭvodzić katehoryju dla transhiendaraŭ
Kamientary