Dyrektarka etałonnaha kałhasa ŭ Dobrušy 12 hadoŭ chavała padziež i źbivała padnačalenych. Adnaho sprabavała nakarmić siłasam
«Čałaviek hoda» ŭ Homielskaj vobłaści davała intervju prapahandystam, chvaliłasia pośpiechami i kazała, što biare prykład z Łukašenki. A ciapier apynułasia na łavie padsudnych.
U Dobrušy ŭžo druhi raz za hod sudzili byłuju dyrektarku ŭzornaha kałhasa «Zavidaŭskaje». U mai žančynu ŭžo asudzili na 4 hady kałonii za ŭtojvańnie padziažu. Jak akazałasia, kałhas byŭ nie zusim uzornym: dyrektarka 12 hadoŭ rabiła falšyvyja spravazdačy i machlavała ź ličbami. Tak jana schavała padziež bolš za 380 hałoŭ žyvioły.
Ale dyrektarka zajmałasia nie tolki padrobkami. Jana jašče teraryzavała padnačalenych. Na pieršym sudzie stała viadoma, što jana źbiła svaju hałoŭnuju buchhałtarku i kinuła ŭ jaje nastolnym hadzińnikam. Paciarpiełaja sprabavała zvolnicca, ale dyrektarka jaje nie adpuskała.
Užo paśla suda vyśvietliłasia, što buchhałtarka była nie adzinaj achviaraj kiraŭnički. Jana znoŭ apynułasia na łavie padsudnych. Na hety raz paciarpiełymi vystupili troje supracoŭnikaŭ. Adnoho ź ich dyrektarka navat sprabavała karmić siłasam. Z astatnich ździekavałasia inšymi sposabami. U haspadarcy jaje navat nibyta nazyvali «baryniaj».
Voś jak apisvaje hetyja vypadki prakuratura:
«Abvinavačanaja ŭ mašynna-traktarnym parku schapiła traktarysta za adzieńnie i pačała šturchać z boku ŭ bok, pakul jon nie ŭpaŭ na śpinu. Zatym jana pastaviła svajo kalena jamu na hrudzi i naniesła nie mienš za dva ŭdary rukoj pa ciele. Jana zaviała mužčynu ŭ dyśpietčarskuju, dzie prycisnuła jaho stałom da ściany, pryčyniŭšy jamu fizičny bol i źbićcio.
Dvojčy chapała bryhadzirku małočna-tavarnaj fiermy za adzieńnie ŭ vobłaści hrudziej i sprabavała zasunuć joj u rot siłas, a ŭ druhim vypadku naniesła joj nie mienš za adzin udar pa hałavie».
Akramia taho, jana jak minimum dvojčy źbiła vieterynara ŭ siabie ŭ kabiniecie.
Vinu kiraŭnica nie pryznała, ale sud vynies abvinavaŭčy prysud. Jaki mienavita, nieviadoma. U siužecie rehijanalnaha TB prakuror kazaŭ pra čatyry hady kałonii i štraf 400 bazavych (16 800 rubloŭ). Ale heta dakładna toj ža prysud, jaki jana atrymała na pieršym sudzie pa padziažu žyvioły.
Proźvišča dvojčy asudžanaj dyrektarki dziaržaŭnyja ŚMI nie nazyvajuć. Ale zatoje nazvali haspadarku — «Zavidaŭskaje». Hetym kałhasam šmat hod kiravała Taciana Bialan. Jana była zorkaj dziaržaŭnaj presy. Aktyŭna davała intervju pra pośpiechi haspadarki. Kazała, što pieradavikam kuplaje bilety na kancerty i pucioŭki ŭ sanatoryi. A jašče kamientavała vystupy Łukašenki i kazała, što biare ź jaho prykład.
Čynoŭniki taksama ŭpadabali Bialan. Jany ŭznaharodžvali jaje roznymi dypłomami i zvańniami, u tym liku zvańniem «Čałaviek hoda Homielščyny» ŭ 2023 hodzie.
Darečy, na druhi sud nad Bialan źvieźli kiraŭnikoŭ miascovych kałhasaŭ — dla prafiłaktyki.
Kamientary
Dyk voś, dobrušski rajon - heta maleńkaja rasieja. Baćka ź ciotkaj zaŭsiody nas pužali maskalami i raskazvali ŭsialakija historyi, što Bałabanaŭ by pazajzdrościŭ.
Dla prykłada moj straječny brat dapamahaŭ niešta zrabić u vioscy susiedziam, jany paklikali jaho za stoł, za jakim jeli sabačacinu. Brat viadoma źbieh adduť, ale vysnovy sami rabicie.