Stała viadoma pra śmierć 41-hadovaha byłoha palitviaźnia z Hrodna Alaksieja Aŭsiukieviča
Mužčyna atrymaŭ chatniuju chimiju za «abrazu pradstaŭnika ŭłady». Jaho historyja pakazvaje, što ŭ niepryniaćci asoby biełaruskaha dyktatara syšlisia pradstaŭniki samych roznych hrup hramadstva.
Alaksieju Aŭsiukieviču byŭ 41 hod. Jon pracavaŭ rabočym — na «Ciepłavych sietkach», jakija naležać «Hrodnaenierha», i ŭ inšych pradpryjemstvach u Hrodnie.
Pa źviestkach prajekta Digital Intelligence Team, Aŭsiukievič byŭ u bazie «Biesparadki». U milicejski śpis ekstremistaŭ jaho ŭklučyli 28 kastryčnika 2022 hoda. Zvyčajna heta adbyvajecca adrazu paśla taho, jak kryminalny prysud nabyvaje siłu.
Alaksiej Aŭsiukievič byŭ asudžany Leninskim rajonnym sudom Hrodna pa artykule 369 Kryminalnaha kodeksu — «abraza pradstaŭnika ŭłady» (spačatku tut była pamyłka i napisana, što jaho sudzili za «abrazu Łukašenki» — zaŭv. NN). U čym zaklučyłasia abraza, niezrazumieła. Hrodzieniec atrymaŭ chatniuju chimiju.
Aŭsiukievič pamior 11 kastryčnika 2024 hoda. Nieviadoma, ci jon jašče znachodziŭsia na chimii, ci na toj momant jana ŭžo skončyłasia.
Paznačanaja pryčyna śmierci — R99, «inšyja nieŭdakładnienyja pryčyny śmierci». Heta značyć, što doktar adrazu byŭ nie ŭpeŭnieny ŭ tym, čamu pamior čałaviek, abo padazravaŭ kryminalnuju pryčynu śmierci. Naprykład, taki ž kod u bazach staić u źviestkach pra śmierć ministra zamiežnych spraŭ Uładzimira Makieja i palitviaźnia Vitolda Ašurka.
Źmiest sacsietak hrodzienca pakazvaje, što ŭ niepryniaćci asoby Alaksandra Łukašenki syšlisia pradstaŭniki samych roznych hrup hramadstva. Toj kantent, jaki Aŭsiukievič ličyŭ kłasnym i pierapoščvaŭ sabie na staronku — cytaty rasijskaha palityka Uładzimira Žyrynoŭskaha, kamplimienty Stalinu i roznyja Z-lehiendy. Razam z tym Alaksiej fatahrafavaŭsia z pomnikam Lvu Sapiehu i doškaj u pamiać Michała Kazimira Ahinskaha.
«Naša Niva» — bastyjon biełaruščyny
PADTRYMAĆ
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary