«Blin, darma kupili «Tesłu». Biełaruska z Kanady raskazała, što miascovyja žychary dumajuć pra palityku Trampa

Jak heta zvyčajna i byvaje, mierkavańni ludziej u Kanadzie padzialilisia.

— U Kanadzie nasamreč taksama jość palityčny padzieł, — kaža Hanna. — Heta značyć «nie ŭsio tak adnaznačna» — nie ŭsie kanadcy suprać Trampa.

Padzieł vielmi prykmietny pa pravincyjach. Kanada — vielizarnaja kraina, i ŭ joj jość takija pravincyi, jak Antarya, brytanskaja Kałumbija z Vankuvieram, dzie znachodziacca vialikija harady, bujny biznes, ofisy mižnarodnych kampanij, darahoje žyllo, pryjazdžaje šmat emihrantaŭ, — i tamu vajb vielmi sučasny i libieralny. Ty chodziš va ŭniviersitet, vučyšsia z roznymi ludźmi, sustrakaješ šmat emihrantaŭ. Potym pracuješ u ofisie, znajomišsia z roznymi nacyjanalnaściami, ludźmi roznych vieravyznańniaŭ i aryjentacyj — i razumieješ, što ty možaš, umoŭna kažučy, pahutaryć z hiejem i sam im nie stać (uśmichajecca).

Ludzi ŭ bujnych haradach bolš adkrytyja da ŭsiaho novaha. Hetak ža, jak i ŭ ZŠA: naprykład, štat Fłaryda vielmi padtrymlivaje Trampa, a horad Majami hałasavaŭ suprać jaho. Tut toje ž samaje: Taronta, Vankuvier bolš libieralnyja, tam amal niama kansiervatyŭnaha myśleńnia.

Jość bolš sielskija, addalenyja pravincyi. Naprykład, ludzi ŭ Manitobie pracujuć u palach, vyroščvajuć bulbu. Mnohija ź ich i nie bačyli hiejaŭ ci indusaŭ, chiba što pa TB. Abo Albierta — bahataja pravincyja, tamu što tam jość nafta, ludzi jeduć tudy pracavać u šachty, ale asablivaj adukacyi dla hetaha nie treba. Hetyja rehijony padtrymlivajuć Trampa, vystupajuć suprać emihrantaŭ i paŭtarajuć: «Što ž budzie z našaj krainaj?»

Jašče adzin prykład: maja znajomaja pajechała žyć u Saskatun, pravincyja Saskačevan. Tam vielizarnaja kolkaść fiermaŭ, jaje muž — pažarnik, a ŭ siamji šmat dziaciej. Jany na poŭnym surjozie źbirajucca adpraŭlać dziaciej u katalickuju škołu, tamu što, nie daj Boža, u zvyčajnaj škole ciabie «navučać być hiejem». Chaj užo lepš navučać pravilna malicca, kab adchryščvacca ad ŁBHT. Jak byccam inšych prablem u śviecie niama, pakiniem dva hiendary — i adrazu ŭsio zažyvuć lohka i cudoŭna.

Tramp jak papulist ciśnie na hetyja kropki, u tym liku padtrymlivaje relihijny śvietapohlad. A toje, što jon razburaje ekanomiku, amierykanskamu nasielnictvu časta pofih, aby pazbavicca ad «niapravilnych» ludziej.

«Kanada nie pradajecca»

— Kali pačalisia razmovy Trampa pra pavyšeńni taryfaŭ dla kanadskich tavaraŭ, premjer-ministr Antarya Dah Ford vyjšaŭ u kiepcy z nadpisam Canada is not for sale («Kanada nie pradajecca») i zajaviŭ, što my adkažam taryfami na taryfy, nie damo Amierycy sałodkaha žyćcia, nie budziem pastaŭlać elektryčnaść. Tady premjerka Albierty Daniel Śmit adkazała: «Hej, nie-nie-nie, ty kažy za siabie, my ničoha drennaha Amierycy rabić nie budziem». Heta było vielmi pakazalna.

Mnohija ludzi cierpiać praz novuju ekanamičnuju palityku ZŠA. Dapuścim, raniej ja pracavała ŭ kampanii, jakaja vyrablaje zapčastki dla General Motors, Ford i inšych amierykanskich mašyn. Ciapier ža Tramp uvodzić vialikija taryfy na stal i choča, kab usie hetyja detali vyrablalisia ŭ Amierycy.

Viadoma ž, heta vialiki ŭdar pa našaj ekanomicy, na hetych zavodach pracujuć tysiačy ludziej. Kali z-za takoj palityki jany pierastanuć pracavać, što rabić z usimi hetymi kampanijami i ich supracoŭnikami? Navat nie ŭjaŭlaju.

Heta tolki maleńki prykład, bo ŭ nas šmat takich pradpryjemstvaŭ, ekanamična my mocna zaležym ad ZŠA.

«Kuplaj kanadskaje»

— Premjer Antarya ŭvieś čas pa televizary havoryć patryjatyčnyja pramovy, kab narod byŭ nastrojeny na kuplu miascovych praduktaŭ, a nie amierykanskich. Z budynkaŭ pazdymali amierykanskija ściahi: naprykład, kali kampanija pieršapačatkova amierykanskaja, a ŭ Kanadzie ŭ jaje filijał, to pakidajuć visieć tolki kanadski ściah.

Mocny ałkahol u Kanadzie možna kupić tolki ŭ śpiecyjalizavanych dziaržaŭnych kramach. Niadaŭna adtul prybrali amierykanski ałkahol i pastavili šyldy z zaklikam kuplać kanadski. A jašče vyjšaŭ zakon, što antaryjski ałkahol zaraz možna kupić i ŭ zvyčajnaj praduktovaj kramie.

Pavialičyć

Darečy, praduktaŭ z ZŠA ŭ kramach stała našmat mienš, i my sami taksama pierastali ich kuplać. Starajemsia brać miascovyja pradukty — «Kuplajcie kanadskaje».

Niedaloka ad nas raźmiaščajucca fiermy, my jeździm tudy kuplać śviežyja harodninu i sadavinu, jany našmat smačniejšyja, čym pryviezienyja. Mahčyma, i mnohija kramy ciapier pieraaryjentavalisia na mieksikanskich abo inšych paŭdniovych pastaŭščykoŭ. Ceny praz heta, chutčej za ŭsio, padrastuć, bo łancužki nie adładžanyja, ale što zrabić.

«Mask z hłuzdu źjechaŭ, a my, jak durni, z «Tesłaj»

— Našy susiedzi-kanadcy kažuć: «Blin, darma kupili «Tesłu», Mask z hłuzdu źjechaŭ, a my, jak durni, z «Tesłaj». Mnohija ruskamoŭnyja, naadvarot, kažuć: «Oj, Tramp — heta dobra, choć vypravić ekanomiku, a paśla padciahniecca i Kanada. My taksama svaich indusaŭ adašlem nazad, vykryjem hiejaŭ — i zažyviom!»

Miascovyja izrailcianie taksama bolš padtrymlivajuć Trampa, ale heta ŭsio praz vajnu ŭ ich krainie: jany spadziajucca, što jon jaje spynić. Heta značyć, što dumki, viadoma, roznyja.

My spakojna možam vieści niejkija takija dyskusii, ale jany prachodziać pryjazna. Ja nikoli nie skažu: «Oj, usio, ja z taboj ciapier nie razmaŭlaju». Nakolki ja viedaju, u Amierycy ŭsio bolš palaryzavanaje, ludzi realna pierastajuć mieć znosiny ź siemjami praz palityku.

Pry hetym, što cikava, ludzi imknucca bajkatavać ZŠA i nie jeździć tudy tracić hrošy. U aeraporcie ŭ nas jość śpiecyjalny hiejt u Amieryku. To-bok kali ty laciš u Amieryku, to idzieš u asobnaje miesca i prachodziš amierykanskuju miažu jašče ŭ Taronta. Hety ŭčastak vielmi vialiki, tam zaŭsiody čerhi. A ciapier, kažuć, tam pusta.

• 9
• 4
• 3
• 2
• 0
• 0
• 0
• 0