Jak skłaŭsia los pałkoŭnika Łosieva, jaki pakryvaŭ bandu marozaŭcaŭ i atrymaŭ 18 hadoŭ kałonii

Ekstradycyja z Kazachstana ŭ Biełaruś Viktara Reckaha, kilera marozaŭcaŭ, abudziła intares da hetaj bandy.

Banda Marozava dziejničała z kanca 1980-ch da siaredziny 2000-ch u Homieli i Homielskaj vobłaści i ličyłasia samaj bujnoj i žorstkaj na terytoryi Biełarusi. Na rachunku złačyncaŭ było bolš za 100 złačynstvaŭ i kala 20 trupaŭ — jak bandytaŭ-kankurentaŭ, tak i vypadkovych haradžan. Dziejničać biespakarana marozaŭcam dapamahała milicejskaje prykryćcio. Bandyty płacili kiraŭniku homielskaha kryminalnaha vyšuku, pałkoŭniku Mikałaju Łosievu.

Čytajcie. Rekiet, rejdarstva, zhvałtavańni, žorstkija zabojstvy, siłaviki na zarpłacie i łajalnaść uładaŭ. Raskazvajem pra najbujniejšuju bandu Biełarusi

Śledstvu nie ŭdałosia dakładna daviedacca, kolki hrošaj jon atrymaŭ, ale z asobnych pakazańniaŭ vynikała, što havorka išła jak minimum pra tysiaču dalaraŭ u miesiac. A za pieradaču asabliva važnych źviestak milicyjanier atrymlivaŭ da 20 tysiač dalaraŭ. Heta i ciapier niemałyja hrošy, a dla Homiela 1990-ch — prosta kaśmičnyja sumy.

Dapamoha Łosieva była nasamreč važnaja. Kali adzin z bandytaŭ napisaŭ jaŭku z pavinnaj za ŭdzieł u zabojstvie, milicejski načalnik adrazu prainfarmavaŭ pra heta Siarhieja Marozava, kiraŭnika bandy. U vyniku toj daŭ zahad źniščyć usie ŭliki — naprykład, u lesie źnieśli słupy z darožnymi znakami, kab zrabić niemahčymym apaznańnie miesca złačynstva. A jaŭcy z pavinnaj Łosieŭ u vyniku nie daŭ chodu — skazaŭ, što źviestki nie paćvierdzilisia. Za heta jon atrymaŭ ad Marozava $10 tysiač.

Byŭ vypadak i kali Łosieŭ razam z Marozavym naviedvaŭ u kałonii adnaho z asudžanych udzielnikaŭ bandy.

…Łosieŭ pajšoŭ u adstaŭku 2001 hodzie. Tady jamu było 48 hadoŭ. Aficyjnaja pryčyna — chvaroba.

Miarkujučy pa dakumientach, jakimi z «Našaj Nivaj» padzialilisia «Kibierpartyzany», paśla zvalnieńnia sa słužby Łosieŭ paśpieŭ papracavać na «Biełarusnafcie» i ŭ homielskim adździaleńni inviestycyjnaha kredytavańnia Biełaruskaha banka raźvićcia.

Aryšty marozaŭcaŭ pačalisia ŭ siaredzinie 2000-ch. Tady ž pryjšli i pa Łosieva — kali zrazumieli jaho rolu ŭ pracy bandy. Na sudzie, jaki prachodziŭ u 2006-m, byłomu milicejskamu načalniku prysudzili 18 hadoŭ źniavoleńnia. Šmat, ale adnosna śmiarotnych prysudaŭ trom kiraŭnikam bandy možna ličyć, što Łosievu pašancavała.

Łosieŭ jak były siłavik trapiŭ u kałoniju ŭ Viciebsku, jakaja śpiecyjalizujecca na takich piersanažach. Adnak termin da kanca jon nie adbyŭ, tak i pamior u źniavoleńni.

Pavodle źviestak «Kibierpartyzanaŭ», Łosieŭ pamior 13 červienia 2018 hoda. Eks-milicyjanieru było 65 hadoŭ, da vyzvaleńnia jamu zastavałasia kala čatyroch hadoŭ.

• 35
• 0
• 7
• 5
• 2
• 0
• 0
• 0