ZŠA znoŭ prahałasavali suprać rezalucyi AAN z asudžeńniem vajny suprać Ukrainy
Złučanyja Štaty Amieryki 16 krasavika znoŭ prahałasavali suprać rezalucyi Hienieralnaj Asamblei AAN, u jakoj zhadvałasia asudžeńnie rasijskaj ahresii suprać Ukrainy, paviedamlaje «Jeŭrapiejskaja praŭda».
Havorka idzie pra rezalucyju A/79/L/75 «Supracoŭnictva pamiž AAN i Radaj Jeŭropy», pryśviečanuju, siarod inšaha, pytańniu statusu Rasii, jakuju vyhnali z Rady Jeŭropy ŭ sakaviku 2022 hoda.
12-staronkavy dakumient, inicyjavany Luksiemburham i Litvoj, dvojčy zhadvaje i rasijskuju ahresiju suprać Ukrainy — u preambule i asnoŭnym tekście.
Na pasiadžeńni Hienasamblei AAN 16 krasavika jaho padtrymali 105 krain. Siarod dzieviaci krain, jakija prahałasavali suprać, — Rasija, Biełaruś, KNDR, a taksama Złučanyja Štaty.
Pradstaŭnik ZŠA pry AAN Džonatan Šryjer u vystupie padčas abmierkavańnia zajaviŭ, što rezalucyja
«paŭtaraje zajavy adnosna rasijska-ŭkrainskaj vajny, jakija, na dumku Złučanych Štataŭ, nie spryjajuć prasoŭvańniu spravy miru».
«My spadziajemsia, što Rada Jeŭropy i ŭsie dziaržavy-členy AAN padtrymajuć i ŭzmocniać namahańni, nakiravanyja na dasiahnieńnie ŭsioachopnaha i praciahłaha miru pamiž Rasijaj i Ukrainaj», — dadaŭ jon.
Heta ŭžo druhi vypadak, kali ZŠA hałasujuć razam z Rasijaj suprać rezalucyi Hienasamblei z asudžeńniem rasijskaj ahresii suprać Ukrainy. 24 lutaha Hienasambleja AAN uchvaliła ŭkrainskuju rezalucyju z asudžeńniem rasijskaj ahresii, i Złučanyja Štaty prahałasavali suprać jaje — razam z Rasijaj i jašče 16 inšych krain.
Tady, darečy, hałasavali suprać takija krainy:
Biełaruś, Burkina-Faso, Burundzi, Vienhryja, Haici, ZŠA, Izrail, KNDR, Mali, Maršałavy astravy, Nihier, Nikarahua, Pałau, Rasija, Sudan, Centralnaafrykanskaja Respublika, Ekvataryjalnaja Hvinieja, Erytreja.
Hetym razam z 18 zastalisia tolki 9:
Biełaruś, ZŠA, KNDR, Mali, Nihier, Nikarahua, Rasija, Sudan, Erytreja.
Burkina-Faso, Burundzi, Izrail, Centralnaafrykanskaja Respublika i Ekvataryjalnaja Hvinieja hałasavańnie hetym razam praihnaravali, Pałaŭ ustrymałasia, a Vienhryja, Haici i Maršałavy astravy rezalucyju padtrymali.
Ciapier čytajuć
Navukoviec raspavioŭ pra hieałahičnyja zahadki Biełarusi: irtuć ź ziamli i kratar ad padzieńnia mietearyta, jaki źniščyŭ usio žyvoje ŭ radyusie tysiač kiłamietraŭ44
Kamientary