Padpał damoŭ, źviazanych z premjeram Vialikabrytanii: zatrymany treci ŭkrainiec
Brytanskaja palicyja paviedamiła, što pa padazreńni ŭ datyčnaści da padpału majomaści, źviazanaj z premjer-ministram Vialikabrytanii, zatrymany jašče adzin čałaviek: hramadzianin Ukrainy Piotr Pačynok, piša Bi-bi-si.
Raniej pa hetaj ža spravie byŭ zatrymany jašče adzin ukrainiec Raman Łaŭrynovič, a taksama ŭradženiec Ukrainy — hramadzianin Rumynii Stanisłaŭ Karpiuk.
U paviedamleńni palicyi Łondana skazana, što 34-hadovamu Pačynku, jaki pražyvaje na poŭnačy brytanskaj stalicy, vystaŭlenyja abvinavačańni ŭ padpale z namieram padvierhnuć niebiaśpiecy žyćcio čałavieka.
U sieradu Pačynok pavinien źjavicca pierad Vestminsterskim mahistrackim sudom, dzie jamu budzie abrana miera strymańnia.
Anałahičnyja abvinavačańni raniej byli pradjaŭleny taksama 21-hadovamu Łaŭrynoviču i 26-hadovamu Karpiuku.
Pačynok byŭ zatrymany 19 maja ŭ łondanskim rajonie Čełsi. Karpiuka zatrymali 17 maja ŭ łondanskim aeraporcie «Łutan», kali jon sprabavaŭ vylecieć u Rumyniju. Łaŭrynovič byŭ uziaty pad aryšt pieršym, heta adbyłosia 13 maja ŭ rajonie Sidenchem na paŭdniovym uschodzie Łondana. Abvinavačańni datyčacca troch incydentaŭ, jakija adbylisia z 8 pa 12 maja.
U noč na 12 maja pažarnych vyklikali ŭ žyły dom u Kientyš-Taŭnie. Starmier i jaho siamja žyli tam da taho, jak jon staŭ premjer-ministram u minułym hodzie. Ciapier Starmier žyvie ŭ svajoj aficyjnaj rezidencyi na Daŭninh-stryt, 10, a jaho ŭłasny dom zdajecca ŭ arendu jaho svajačcy. Pry pažary paciarpieli ŭvachodnyja dźviery doma.
8 maja zaharełasia mašyna (pa danych Reuters, Toyota RAV4) na toj ža vulicy. Jana raniej taksama naležała Starmieru, ale ŭ minułym hodzie jon pradaŭ jaje susiedu.
U noč na 11 maja adbyŭsia nievialiki pažar na ŭvachodzie ŭ budynak u Iślinhtanie, pieraabstalavany ŭ šmatkvaterny dom. Jak vyśvietliła Bi-bi-si, Starmier žyŭ pa hetym adrasie ŭ 1990-ja hady.
U suviazi z tym, što Starmier zajmaje pasadu premjer-ministra, da rasśledavańnia padklučyłasia Kontraterarystyčnaja kamanda palicyi Łondana.
Ab mahčymych matyvach arhanizataraŭ padpałaŭ pakul nie paviedamlajecca.
Łaŭrynovič i Karpiuk pavinny być pradstaŭleny pierad łondanskim Centralnym kryminalnym sudom (Ołd-Bejli) 6 červienia.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary