Siabar pamierłaha ŭ Krakavie Siarhieja Dubinina raskazaŭ, što papiaredničała trahiedyi
15 krasavika ŭ krakaŭskaj kvatery znajšli cieła 50-hadovaha aktyvista z Rečycy. Siarhieja Dubinina pieršym ubačyŭ jaho susied i siabar Alaksandr Ałmajeŭ. Jon ža raspavioŭ «Našaj Nivie» ab tym, čym apošnim časam žyŭ Siarhiej.
Aktyvist i mastak z Rečycy Siarhiej Dubinin źjechaŭ u Polšču ŭ krasaviku 2021 hoda. Pryčynaj stali pahrozy ad siłavikoŭ, jakija tyja adrasavali kalektyŭna jamu i Alaksandru Ałmajevu — za ich zmahańnie ź miascovymi čynoŭnikami.
Siabry doŭhi čas sprabavali ŭładkavać dla siabie tvorčuju majsterniu — i ŭ samim horadzie, i ŭ vioscy kala jaho. Ale im u hetym pieraškadžali, kaža Ałmajeŭ. Jon ličyć, što sprava ŭ tym, što mužčyny źbirali infarmacyju ab karupcyi ŭ Rečycy.
U 2020 hodzie siabry źbirali podpisy za alternatyŭnych kandydataŭ u prezidenty, vychodzili na pratesty. Ałmajeŭ praz heta adbyvaŭ administracyjny aryšt.
Ź pierajezdam u Polšču Dubinin i Ałmajeŭ uładkavalisia na budoŭlu. Žyli razam, u kvatery zajmalisia tvorčaściu — vyrazali pa drevie.
U Biełarusi niechta źmianiŭ zamok na ich majsterni, Siarhiej praz heta vielmi pieražyvaŭ. Ličyŭ, što ich žyćcio «prosta puścili pa vietru pracham».
10 krasavika ŭ Ałmajeva zdaryŭsia infarkt, Dubinin advioz jaho ŭ balnicu i viarnuŭsia ŭ kvateru.
Apošni raz jany razmaŭlali ŭ subotu, 12 krasavika — Ałmajeŭ zrazumieŭ pa hołasie siabra, što toj napadpitku.
Alaksandr zapeŭnivaje, što Siarhiej nie złoŭžyvaŭ ałkaholem, bo mieŭ adkaznuju pracu na vyšyni na budoŭli.
U dzień vypiski z balnicy Ałmajeŭ sprabavaŭ datelefanavacca da Dubinina, kab toj advioz jaho dadomu. Ale numar byŭ niedasiažny. Jak tolki biełarus patrapiŭ u chatu, jon pabačyŭ u adnym pakoi šmat kryvi, a ŭ sanvuźle — miortvaha siabra.
«Niejkaja nienaturalnaja poza ŭ jaho była, nibyta jon da kranu ciahnuŭsia. I tam taksama ŭsio było kryvioju zalita. A voś u kalidory, praź jaki treba było prajści — nivodnaj kropielki na parkiecie. Nibyta pa pavietry jon pieraniośsia. Ja nie viedaju, što tam adbyłosia», — kaža Ałmajeŭ.
Jon nie choča vieryć u viersiju z samahubstvam siabra.
«Siarhiej byŭ nastrojeny zmahacca i pryciahnuć rečyckich karupcyjanieraŭ da adkaznaści. Jon chacieŭ, kab infarmacyja pra ich prynamsi stała publičnaj», — ličyć Ałmajeŭ.
Pravaabaronca Leanid Sudalenka prakamientavaŭ śmierć ziemlaka.
«U studzieni Siarhiej razam z Alaksandram byli ŭ Vilni, my sustrakalisia, razmaŭlali, žartavali i ništo nie pakazvała na toje, što Siarhiej stamiŭsia žyć», — napisaŭ jon u fejsbuku.
U Siarhieja Dubinina zastalisia dva syny. Jany i byłaja žonka pamierłaha žyvuć u Biełarusi.
«Bajsoł» pačaŭ zbor srodkaŭ na pachavańnie Siarhieja Dubinina i dapamohu siamji.
Ciapier čytajuć
Novym śpikieram Kaardynacyjnaj rady, chutčej za ŭsio, stanie Arciom Bruchan3
Kamientary
[Zredahavana]