Vieniesuełka, jakaja pracuje na BT, raspaviała, čamu jaje siamja dumaje, što jana ŭ Biełarusi vielmi bahataja. Pryčyny vas ździviać

Jak ža Kajłu zaniesła za 10 tysiač kiłamietraŭ ad radzimy? U adnym ź intervju jana raspaviadała, što pryjechała za kachanym. Historyja sapraŭdy ramantyčnaja. 13 hadoŭ tamu dziaŭčyna raptam pabačyła ŭ adnym z kafe Karakasa pryvabnaha biełaruskaha chłopca. Para prosta pierahladvałasia — a potym kožny pajšoŭ pa svaich spravach.

Ale praz tydzień Kajła niečakana znoŭ sustreła zamiežnika ŭ tym samym kafe. Na hety raz maładyja ludzi vyrašyli ŭsio ž paznajomicca.

Pavialičyć

Chłopca zvali Andrej, i jon pracavaŭ jurystam. A ŭ Vieniesuełu pryjechaŭ, kab Biełaruś tudy zmahła pradać MAZy.

Vypadkovaje znajomstva pieratvaryłasia ŭ sapraŭdnaje kachańnie. Niedzie praz hod Kajła adpraviłasia ŭ Brest, kab pabačyć baćkoŭ Andreja.

Vy ździviciesia, ale bolš za ŭsio dziaŭčynu tady ŭraziła jabłynia — jana adrazu pajšła fatahrafavacca z drevam. Bo ŭ Vieniesuele ŭsiudy rastuć manha. A voś jabłyki vielmi redkija i darahija, ich nie ŭsie mohuć sabie dazvolić. Ich zvyčajna kuplajuć ci na śviata, ci kali čałaviek chvareje — kab paradavać ekzotykaj.

Pavialičyć

U Karakasie Kajła vučyłasia na žurnalistku. Dziaŭčyna dobra razumieła, što niekali pryjdzie momant, kali Andreju pryjdziecca viarnucca ŭ Biełaruś. Ale kali hety dzień nadyšoŭ, chłopiec prapanavaŭ joj palacieć razam.

Z adnaho boku, Kajłu pužała toje, što na ruskaj movie jana viedaje ŭsiaho tolki niekalki słoŭ. Ź inšaha — u Vieniesuele ŭžo pačynaŭsia ekanamičny kryzis. Na fonie hetaha rašeńnie emihravać vyhladała racyjanalna.

Pavialičyć

Kaža, što adaptavacca na novym miescy było składana — tolki ŭ Biełarusi jana adčuła, jak mocna moža ŭpłyvać šeraje nadvorje na nastroj. Krychu ździŭlali i biełarusy, jakija ŭ adroźnieńnie ad vieniesuelcaŭ nie vielmi ščodryja na ŭśmieški.

U Minsku Kajła pastupiła ŭ MDŁU. Praz dva hady para pabrałasia šlubam.

Doŭhi čas vieniesuełka pracavała ŭ Mediacube — zajmałasia ispanamoŭnymi YouTube-kanałami. Potym była praca ŭ A4 Production. Atrymaŭšy nieabchodny dośvied, dziaŭčyna vyrašyła stvaryć svoj YouTube-kanał i nazvała jaho «DavajKaj». Kajła zdymała roliki pra siabie, pra kulturu Vieniesueły, pra svajo bačańnie Biełarusi. Ciapier na kanale 71 tysiača padpisčykaŭ.

Pavialičyć

U 2023 hodzie na tvorčaść Kajły źviarnuła ŭvahu Biełteleradyjokampanija. Jaje zaprasili stać adnoj ź viadučych prahramy «Jak doma» na «Biełaruś 2». U hetym prajekcie zamiežniki z ekzatyčnych dla nas krain jeździać pa roznych miaścinach Biełarusi, znajomiacca sa słavutaściami, razmaŭlajuć ź miascovymi žycharami, sprabujuć hatavać nacyjanalnyja stravy, tančyć, a taksama śpiavać narodnyja pieśni.

U Kajły taksama jość dva akaŭnty ŭ tyktoku, na jakija ahułam padpisana kala 38 tysiač čałaviek. Niadaŭna dziaŭčyna raspaviała, čamu jaje svajaki i siabry ŭ Vieniesuele dumajuć, što jana vielmi bahata žyvie ŭ Biełarusi.

I pieršaja pryčyna — heta toje, što Kajła časta kuplaje vinahrad.

— Niahledziačy na toje, što ŭ Biełarusi vinahrad impartny, tut jon tańniejšy, čym u Vieniesuele. Tamu na majoj radzimie jaduć vinahrad tolki pierad Novym hodam, kab zahadać žadańnie.

@kay_pine U mienia šuby dažie niet #kaj #fyp #inostranka #vieniesuełka #vieniesueła #tiktok #tiktokbiełaruś #tikto #komiedija #parodija #śmiešnojevidieo #comedyvideo ♬ sonido original - Kay Pineda

Ale samaje hałoŭnaje, što ŭražvaje blizkich Kajły, — heta toje, što jana maje vannu ŭ kvatery. Dziaŭčyna žartuje, što jana sama, kali ŭpieršyniu prylacieła ŭ Biełaruś i ŭbačyła vannu «jak u kino», padumała, što jaje chłopiec — miljanier.

— Ale potym ja daviedałasia, što mieć vannu — heta narmalna. Ale ž nie dla Vieniesueły. Bo ŭ nas tyja, chto maje vannu, sapraŭdnyja miljaniery. A ŭ Biełarusi navat sabaki i katy kupajucca ŭ vańnie.

• 10
• 3
• 26
• 36
• 3
• 1
• 2
• 0