Ekanamist Dźmitryj Kruk daje piesimistyčny prahnoz dla biełaruskaha biznesu. U pradprymalnikaŭ try varyjanty

Ekśpiert BEROC ekanamist Dźmitryj Kruk u pieradačy «Mnie taksama nie padabajecca» adznačyŭ, što na stanovišča biznesu ŭ Biełarusi ŭ pieryjad da 2030 hoda buduć upłyvać dva trendy. Pieršy — žadańnie dziaržavy pryviazać da siabie pryvatny biznes i zrabić jaho zaležnym ad siabie. Druhi — praniknieńnie rasijskaj praktyki, rasijskaj kultury i ŭzmacnieńnie zaležnaści ad Rasii.

U paraŭnańni z 2020 hodam, kali pryvatny siektar byŭ na ŭźlocie i byŭ hatovy paciahnuć za saboju ŭsiu ekanomiku, ciapier «apiareńnie vielmi mocna paabsiekli, i pryvatny siektar u značna bolš słaboj formie».

U toj ža čas, jak davodzić Kruk, heta nie aznačaje, što pryvatny siektar całkam źniknie. Moža adbycca navat jaho kolkasny rost, bo jon bolš hnutki i lepš prystasavany da novych mahčymaściaŭ.

Pavialičyć

U adroźnieńnie ad jaho, rost dziaržaŭnaha siektara ŭ apošnija hady šmat u čym zaležaŭ ad vonkavych faktaraŭ: usploskaŭ popytu z Rasii, vyklikanych vajnoj i źnižeńniem kankurencyi na rasijskim rynku. Biez hetych časovych stymułaŭ dziaržsiektaru budzie ciažka raści.

Ale, niahledziačy na mahčymy rost, pytańnie ŭ tym, jakim budzie hety pryvatny siektar. Tut ekśpiert vykazvaje piesimizm, adznačajučy, što tendencyja ŭzmacnieńnia zaležnaści biznesu ad dziaržavy i režymu ŭzmacniajecca. Mnohija kampanii ŭžo havorać pra heta.

U takich umovach, davodzić Kruk, isnuje try mahčymyja paterny ci šabłony dziejańniaŭ. Pieršy — heta rełakacyja, druhi — pieraŭtvareńnie biźniesu ŭ kampradorski, aryjentavany na Rasiju.

Treci varyjant mienš prykmietny, ale važny — asabliva dla tych, chto pracuje na ŭnutranym rynku. Heta naŭmysnaje ŭskładnieńnie biznes-pracesaŭ, kab dziaržava nie mahła ździajśniać efiektyŭny kantrol ci «adcisnuć».

«Naša forma abarony ŭ tym, što dziaržava takim składanym biznesam prosta nie ŭ stanie budzie kiravać, a adcisnuć jaho — biessensoŭna. Heta budzie aznačać śmierć biznesu», — cytuje Kruk słovy znajomaha biznesmiena i zaŭvažaje, što žadańnie dziaržavy ŭsio kantralavać uzmacniajecca. Prykład — pastanova № 713, jakaja «była ŭ pieršuju čarhu pra ceny, ale ŭ tym liku i pra toje, kab pastavić na raściažku ŭvieś pryvatny biznes».

Jak tłumačyć ekśpiert, vykanać jaje ŭ poŭnaj miery składana, i heta stvaraje zručny miechanizm cisku.

Kruk sumniavajecca, što situacyja pryncypova źmienicca ŭ lepšy bok z prychodam Turčyna na pasadu premjer-ministra:

«Toje, što pryznačyli Turčyna, na moj pohlad, daloka nie aznačaje, što tam niešta źmienicca ŭ lepšy bok. Mahčyma, ale paśla Turčyna ništo nie pieraškadžaje pryjści absalutna inšamu čałavieku ź inšym mierkavańniem. Navat kali dapuścić, što Turčyn budzie ŭmoŭna prarynkavym, u čym ja taksama, sapraŭdy, vielmi mocna sumniavajusia».

Razam z hetym ekśpiert vykazvaje ŭpeŭnienaść, što pryvatny biznes nie budzie źniščany:

«Choć my siońnia, u 2025 hodzie, havorym, što pryvatny siektar u bolš drennaj formie, čym byŭ u 2020-m, ale ŭsio roŭna daloka nie ŭsio atrymałasia źniščyć. Jon pa-raniejšamu mocny. I ŭ 2030 hodzie, niahledziačy na hetyja drennyja trendy, pa-raniejšamu taki fienomien, jak biełaruski pryvatny siektar jak važnaja častka biełaruskaj ekanomiki, budzie isnavać».

• 0
• 0
• 0
• 0
• 0
• 0
• 0
• 0