Deputat Hrodzienskaha abłasnoha Savieta deputataŭ i kiraŭnik AAT «Pryniomanski» 62-hadovy Ivan Jarmac pamior krychu bolš za miesiac tamu — 25 krasavika. Pra heta ŭ niekrałohu, raźmieščanym u papiarovaj viersii vydańnia, napisała navahrudskaja rajonnaja hazieta «Novaje žyćcio» (mienavita hety rehijon pradstaŭlaŭ u abłasnym centry čynoŭnik). Adnak pryčyny śmierci ŭ materyjale paznačany nie byli. Jak stała viadoma vydańniu «Lusterka» ad svajoj krynicy, deputat ździejśniŭ samahubstva — hetuju infarmacyju paśla paćvierdzili i miascovyja ŭłady.
— Daviedalisia pra heta tydzień tamu, — raskazaŭ surazmoŭca «Lusterka». — Usie ŭ šoku, što Ivan Mikałajevič skončyŭ žyćcio samahubstvam. Taki byŭ pazityŭny čałaviek, aptymist».
Paćvierdzili hetuju infarmacyju i ŭ Hrodzienskim abłasnym saviecie deputataŭ. Tudy žurnalistka «Lusterka» patelefanavała jak zaniepakojenaja hramadzianka, kab daviedacca, chto budzie zamiest jaho.
— Pakul heta pytańnie budzie zakryvacca Navahrudskim rajonnym savietam deputataŭ. Treba budzie zapisvacca da staršyni, jana budzie zakryvać pytańni zamiest jaho, — adznačyli ŭ saviecie.
— Ci praŭda, što jon byccam by jak skončyŭ žyćcio samahubstvam? Heta sapraŭdy tak?
— Jość takoje.
— A nie viedajecie pryčynu?
— Nie viedajem. Sami ŭ šoku, ščyra kažučy, tamu što heta było zusim niečakana. Nie viedajem, jak tam usio nasamreč było, ale, na žal, heta praŭda.
Deputatam Mikałaj Jarmac staŭ u 2023 hodzie ad Ščorsaŭskaj vybarčaj akruhi № 44, u jakuju ŭvachodziać siem sielsavietaŭ Navahrudskaha rajona i jašče dva sielsaviety Lidskaha rajona. Jaho vyłučali ad kalektyvu sielskahaspadarčaj arhanizacyi, jakoj jon kiravaŭ, sam mužčyna — biespartyjny. «Kankurentkaj» była načalnica adździeła ideałohii Navahrudskaha rajvykankama, žančynu vyłučali ad «Biełaj Rusi».
Sam były deputat — uradženiec vioski Bieździež Drahičynskaha rajona. Pa śpiecyjalnaści jon ahranom, vučyŭsia ŭ Biełaruskaj sielskahaspadarčaj akademii, a da hetaha — u Navahrudskim sielskahaspadarčym technikumie. Z 1985 hoda jon pracavaŭ u ahrarnaj śfiery Navahrudčyny: uznačalvaŭ kałhas «Vieraskava», zatym staŭ namieśnikam staršyni SVK «Pryniomanski».
Z 2007 pa 2020 hod byŭ staršynioj Lubčanskaha sielvykankama Navahrudskaha rajona. A z 13 žniŭnia 2020-ha staŭ dyrektaram usio taho ž SVK «Pryniomanski», što ŭ pasiołku Lubča.
Pradpryjemstva davoli bujnoje: zychodziačy z danych servisu kartoteka.by, pa stanie na 2025 hod u im pracavała 620 čałaviek.
Ciapier čytajuć
Što ŭjaŭlaje saboj baza danych, jakuju siłaviki nazyvajuć «uzłomam «Novaj Biełarusi»9
Kamientary