Palitviaźnia Uładzimira Knihu asudzili jašče da hoda źniavoleńnia za «niepadparadkavańnie administracyi kałonii»
Za kratami palitviazień roŭna piać hadoŭ, z 4 červienia 2020 hoda.
U sudzie Barysaŭskaha rajona asudzili za «złosnaje niepadparadkavańnie zakonnym patrabavańniam administracyi kałonii» (č. 1 art. 411 KK) palitźniavolenaha Uładzimira Knihu — jamu pryznačyli jašče adzin hod źniavoleńnia. Ludmiła Zinkievič vyniesła prysud 5 lutaha 2025 hoda, ale pra jaho stała viadoma tolki ciapier, piša «Viasna».
Heta druhaja kryminalnaja sprava za kratami pavodle hetaha artykuła suprać palitviaźnia. Pry hetym Kniha ź vieraśnia 2023 hoda ŭtrymlivajecca ŭ režymie inkamunikada — jahonaje miescaznachodžańnie nieviadomaje.
Viadoma, što ŭ kałonii Uładzimira źmiaščali ŭ PKT i rehularna vypisvali novyja parušeńni. Akramia hetaha, pazbavili pieradač, spatkańniaŭ i zvankoŭ.
Byłoha siłavika i vałanciora kamandy «Kraina dla žyćcia» zatrymali 4 červienia 2020 hoda. Na sudzie jon, jak i ŭsie, nie pryznaŭ vinu i zajaviŭ, što padziei 29 maja 2020 hoda na płoščy Savieckaj u Hrodnie padčas zbora podpisaŭ za Śviatłanu Cichanoŭskuju — pravakacyja siłavych viedamstvaŭ Biełarusi. Palitźniavoleny na sudovym pracesie adznačaŭsia svajoj pryncypovaściu i niazłomnaściu.
U vyniku Uładzimira asudzili da čatyroch hadoŭ kałonii pavodle art. 342 Kryminalnaha kodeksa (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich) i art. 364 Kryminalnaha kodeksa (hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ).
Adbyvać termin Uładzimira Knihu adpravili ŭ papraŭčuju kałoniju № 14 u Navasadach. Ale ŭ chutkim časie palitviaźniu ŭzmacnili režym i źmiaścili ŭ turmu № 8. Viadoma, što tam jaho bolš za čatyry miesiacy ŭtrymlivali ŭ ŠIZA. U lipieni 2023 hoda palitviaźnia asudzili pavodle art. 411 KK (złosnaje niepadparadkavańnie zakonnym patrabavańniam administracyi turmy) jašče da hoda kałonii.
Ciapier čytajuć
Ci spynilisia zvalnieńni pa palityčnych matyvach? Voś što raskazali ŭ niekalkich dziaržaŭnych arhanizacyjach5
Kamientary