Kasy samaabsłuhoŭvańnia patrabujuć biełarusaŭ skanavać adrazu dva kody. Što adbyvajecca?
Apošnim časam u niekatorych hipiermarkietach «Jeŭraopt» źjaviłasia niezvyčajnaje novaŭviadzieńnie, jakoje značna ŭskładniła karystańnie kasami samaabsłuhoŭvańnia.
Jak zaŭvažyła žurnalistka Telegraf.news, u adnym z mahazinaŭ na vulicy Mantažnikaŭ u Minsku kasy samaabsłuhoŭvańnia ciapier patrabujuć skanavać nie tolki standartny štrych-kod, ale i QR-kod na ŭpakoŭcy.
Kab dadać tavar u košyk, pakupnikam davodzicca skanavać jaho dvojčy, a časam i trojčy. Na niekatorych praduktach jość niekalki QR-kodaŭ, i nie ŭsie padychodziać dla apłaty.
Kali spačatku skanavać štrych-kod, prahrama patrabuje QR-kod. Kali pačać z QR-koda, zapytvajecca štrych-kod.
Novaŭviadzieńnie zakranuła małočnyja pradukty i napoi, u tym liku sok, syr, małako i kavu.
Što kažuć u «Jeŭraopcie»?
Kab razabracca ŭ situacyi, žurnalisty źviarnulisia na haračuju liniju «Jeŭraopta», ale tam nie zmahli patłumačyć pryčyny novaŭviadzieńnia i paraili źviazacca z kankretnym mahazinam.
Supracoŭniki hipiermarkieta rastłumačyli, što heta testavańnie novaj funkcyi ŭ ramkach užo isnujučaj prahramy i pravodzicca pa ŭsioj sietcy.
«My ŭžo ŭsie tak pakutujem. Adzinaje, što mahu paraić: skanujcie adrazu QR-kod, tady štrych-kod nie zapatrabujecca. Ale kali kuplajecie niekalki adnolkavych tavaraŭ, jak, naprykład, banki johurtu, nielha prosta ŭvieści kolkaść, daviadziecca skanavać kožnuju asobna. Z QR-kodam heta prachodzić chutčej», — havoryć supracoŭnica kramy.
Adnak, jak zaŭvažyli žurnalisty, hetaja stratehija nie zaŭsiody pracuje. Mahčyma, z momantu testavańnia sistema źmianiłasia.
U «Jeŭraopcie» pakul nie viedajuć, jak doŭha budzie praciahvacca testavańnie i ci zrobiać novaŭviadzieńnie pastajannym.
Navošta na tavarach QR-kody?
Biełarusy mahli zaŭvažyć, što ciapier na mnohich praduktach źjavilisia QR-kody DataMatrix.
Heta ličbavy pašpart tavaru, jaki źmiaščaje infarmacyju pra jaho pachodžańnie, datu vyrabu, termin prydatnaści, vytvorcu i šlach da kramy.
Jak raniej tłumačyli śpiecyjalisty «Biełbłankavyd», jakija zajmajucca stvareńniem hetych kodaŭ, ich uviadzieńnie dapamahaje zmahacca ź niajakasnaj pradukcyjaj i daje pakupnikam dostup da infarmacyi pra tavary.
Pakul zastajecca niezrazumieła, ci źjaŭlajecca testavańnie dvuchkodavych sistem časovym abo heta novy krok da poŭnaj ličbavaj identyfikacyi tavaraŭ u Biełarusi.
Ciapier čytajuć
Raman Pratasievič asvoiŭ prafiesiju barmiena i adšukaŭ pracu. Voś u jakim bary možna jaho znajści6
Kamientary