Biełaruski śviatar rastłumačyŭ, ci možna dzieciam hulać z šalona papularnymi monstrykami łabubu
Baciuška Mikałaj Laškievič, jaki słužyć va Uśpienskim chramie Krasnapolla Mahiloŭskaj jeparchii, adkazaŭ na pytańnie, ci varta baćkam bajacca cacak łabubu. Jaho dumki vas ździviać.
Śviatar Mikałaj Laškievič aktyŭna viadzie svoj instahram i maje bolš za 62 tysiačy padpisčykaŭ. U im mužčyna prostymi słovami daje adkazy na samyja roznyja pytańni.
Nie abyšoŭ baciuška i takuju chajpovuju ciapier temu, jak lalki łabubu, jakija stali šalona papularnymi pa ŭsim śviecie.
Nahadajem: łabubu — heta papularny piersanaž ź sieryi dyzajnierskich cacak ad hankonhskaha mastaka Kasinha Łuna, stvorany ŭ supracoŭnictvie z brendam PopMart. Maleńkaja istota źniešnie padobnaja da zajčyka, ale maje dziŭnyja łapki, šmat zuboŭ i vyraznyja vočy. Sumieś miłaty i hareznaści zrabiła łabubu kultavym hierojem siarod prychilnikaŭ art-cacak i azijackaj pop-kultury.
Kaštujuć łabubu niatanna, ale ž kupcy hatovyja navat bicca za mahčymaść nabyć modnaha piersanaža. Svaimi łabubu ŭžo pachvalilisia Ryjana, Kim Kardašjan i Dua Lipa. Navat 50-hadovy Devid Bekchem prademanstravaŭ u instahramie łabubu, jakuju jamu padaryła dačka.
Aficyjna łabubu pradajucca tolki ŭ sietcy PopMart — praź ich firmovyja kramy, aŭtamatyčnyja terminały i sajt. U Biełarusi niama aficyjnych PopMart‑kram, ale ž moda na śmiešnych monstrykaŭ da nas dajšła. Łabubu ŭ Biełaruś pryvoziać bajery — u ich cacka kaštuje 300 rubloŭ.
Svajoj kalekcyjaj u instahramie ŭžo pachvaliłasia ŭładalnica pryvatnaha miedcentru F-clinik Natalla Fiedziukovič. Nabyć monstryka paśpieła i błohierka Alina Hurskaja, jakaja robić biełaruskamoŭnyja kaviery na papularnyja pieśni.
Rynki ŭ vialikich i maleńkich haradach krainy ŭžo zapoŭnieny tannymi padrobkami — tam łabubu možna nabyć pa canie ad 10 rubloŭ.
U pravasłaŭnych viernikaŭ mahło ŭźniknuć pytańnie, ci možna dazvalać dzieciam hulać z łabubu. Tamu śviatar-błohier Mikałaj Laškievič vyrašyŭ vykazać svajo mierkavańnie.
«Dzieci inakš usprymajuć cacki. Toje, što darosłym zdajecca strašnym, dzieciam zdajecca narmalnym ci navat simpatyčnym. Daśledavańni pakazali, što dzieci hulajuć z monstrami jak sa zvyčajnymi cackami: kłapociacca pra ich, kormiać i navat układvajuć spać. Heta dapamahaje dziciaci ŭśviadomić, što ŭsie my roznyja, pryniać adroźnieńni i ŭ niejkaj miery raźvivaje ciarpimaść da inšych ludziej».
Śviatar zaklikaje baćkoŭ nie bajacca monstrykaŭ, a bolš źviartać uvahu na toje, jak dzicia hulaje z cackaj — daje joj mahčymaść być dobraj ci vykarystoŭvaje jak ahresara i razburalnika.
«Kali scenar zyčlivy, to luby monstryk moža dapamahčy dziciaci zasvoić svaje emocyi. Kali scenaryj ahresiŭny, to baćkam varta ŭmiašacca, navat kali havorka idzie pra samuju zvyčajnuju lalku. I pamiatajcie: kali dzicia akružana luboŭju i kłopatam i viadzie razam z baćkami duchoŭnaje žyćcio, to nivodny monstr nie daść uvajści złu ŭ serca».
U zdymkach videa paŭdzielničała i dačka baciuški, jakaja piaščotna hulałasia z łabubu.
Za dva dni rolik śviatara ŭ instahramie nabraŭ užo 263 tysiačy prahladaŭ i bolš za 9 tysiač łajkaŭ. U kamientaryjach jamu ŭ asnoŭnym dziakujuć za taki mudry adkaz.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj31
Kamientary