Z Łatvii sprabavali pravieźci ŭ Biełaruś vosiem padsankcyjnych matacykłaŭ
Z Łatvii sprabavali niezakonna pravieźci ŭ Biełaruś vosiem matacykłaŭ, košt kožnaha ź jakich pieravyšaŭ 5 tysiač jeŭra, paviedamlaje łatvijskaja mytnia. Takija matacykły ličacca pradmietami raskošy i padpadajuć pad sankcyi — ich nielha ŭvozić u Biełaruś i Rasiju z krain Jeŭrasajuza.
Incydent adbyŭsia 10 červienia na pamiežnym pierachodzie «Paternijeki» (ź biełaruskaha boku — «Hryhoraŭščyna»). Matacykły byli ŭ hruzaviku ź litoŭskimi numarami, a pryčep mieŭ kazachstanskija numary. Pravierka pakazała, što heta nie pieršy vypadak, kali hety ž adpraŭnik sprabuje pravieźci padobny tavar. Raniej taksama śćviardžałasia, što matacykły nibyta pavinny byli jechać u Uźbiekistan.
Adnak u łatvijskaj mytni ŭźnikli sumnievy nakont sapraŭdnaha atrymalnika i źjaviłasia padazreńnie, što hruz moža apynucca ŭ Biełarusi abo Rasii. Tamu vyvaz byŭ zabaronieny jak sproba abychodu sankcyj.
Paśla pačatku vajny va Ukrainie Jeŭrasajuz uvioŭ zabaronu na prodaž u Rasiju pradmietaŭ raskošy, u tym liku darahich matacykłaŭ i aŭtamabilaŭ. Paźniej takuju ž zabaronu pašyryli i na Biełaruś, bo praź jaje pačali masava pieravozić sankcyjnyja tavary ŭ Rasiju.
Zhodna z danymi łatvijskaj mytni, z pačatku 2025 hoda jany spynili amal 800 sprobaŭ niezakonnaha vyvazu tavaraŭ z sankcyjnaha śpisu.
Ciapier čytajuć
«Adny vierać, što viernucca, inšyja — nie». Jak pracuje biełaruskaja škoła ŭ Polščy1
Kamientary