U abutkovaj kampanii «Biełviest» miljonnyja daŭhi i pytańnie zachavańnia pradpryjemstva
Vytvorca abutku «Biełviest» znachodzicca ŭ składanaj ekanamičnaj situacyi. Jak vyśvietliła «Lusterka», za pradpryjemstvam jość daŭhi — bolš čym na 32 miljony rubloŭ. U hetaj situacyi ŭłady ŭviali dla «Biełviesta» i jaho biełaruskaj maciarynskaj kampanii zabaronu na likvidacyjnyja dziejańni.
«Heta pryvodzić da niezadavolenaści rabotnikaŭ, masavaha adtoku piersanału»
Jak paviedamiŭ prafsajuz «Biełviesta», 19 červienia kiraŭnictva pradpryjemstva sustrełasia z pracoŭnym kalektyvam. Taksama prysutničaŭ staršynia Viciebskaha haradskoha vykanaŭčaha kamiteta Alaksiej Hierojeŭ.
«Na sustrečy aśviatlalisia pytańni składanaj ekanamičnaj situacyi, u jakoj ciapier znachodzicca pradpryjemstva, hienieralny dyrektar rastłumačyŭ pryčyny pieranosu adpačynku, mahčymaści i terminy vypłaty zarabotnaj płaty i adpusknych», — udakładniaje prafsajuz pradpryjemstva.
«Biełviest» — biełaruska-rasijskaje pradpryjemstva: u 2019 hodzie 55% akcyj zavoda stali naležać ajčynnaj kampanii «Hrupa Biełviest», astatnija 45% — rasijskaj firmie IPK «Inviestpram». Pra heta paviedamlajecca na sajcie vytvorcy. Da hetaha ŭłaśnikami byli kancern «Biellehpram» i «Inviestpram» (Rasija).
Siarednieśpisavaja kolkaść rabotnikaŭ «Biełviesta» ŭ 2024 hodzie skłała 2150 čałaviek, vynikaje sa źviestak servisu legat.by. Dla paraŭnańnia: u 2023-m ich naličvałasia 2282, a ŭ 2022-m — 2196.
Na pradpryjemstva ciapier patrabujecca jak minimum 58 rabotnikaŭ. Da prykładu, ekanamistu pa materyjalna-techničnym zabiaśpiečańni hatovyja płacić 1650 rubloŭ (jak praviła, sumy ŭ abviestkach paznačanyja da vypłaty padatkaŭ), techniku — 1300 rubloŭ, inžynieru pa padrychtoŭcy vytvorčaści — 1200 rubloŭ, pradaŭcam — u miežach 800−1730 rubloŭ u zaležnaści ad horada.
Jak paviedamlajecca, «rabotniki padymali važnyja pytańni, jakija ich chvalujuć: pra niemahčymaść svoječasovaj apłaty arendy handlovych punktaŭ, kamunalnych płaciažoŭ, niemahčymaść apłaty praduktaŭ, nieabchodnych dla pracy stałoŭki, niedachop srodkaŭ dla apłaty kamplektavalnikaŭ i materyjałaŭ».
«Heta pryvodzić da niezadavolenaści rabotnikaŭ, masavaha adtoku piersanału i padzieńnia imidžu pradpryjemstva, — dadaje prafsajuz. — Źviarnulisia z prośbaj da haradskich uładaŭ paskoryć praces pryniaćcia rašeńniaŭ i tym samym zabiaśpiečyć mahčymaść zachavańnia pradpryjemstva. U adkaz na heta staršyni haradskoha i rajonnaha vykanaŭčych kamitetaŭ zapeŭnili kalektyŭ, što najbližejšym časam rašeńni buduć pryniatyja i ciapier užo jość płan vyvadu pradpryjemstva z hetaj situacyi».
Daŭhi i zabarona na likvidacyju
Pavodle źviestak servisu kartoteka.by, upraŭleńnie prymusovaha vykanańnia hałoŭnaha ŭpraŭleńnia justycyi Viciebskaha abłasnoha vykanaŭčaha kamiteta ŭ traŭni hetaha hoda pryniało zabaronu rehistracyjnych (likvidacyjnych) dziejańniaŭ dla kampanii «Biełviest». Anałahičnaje rašeńnie zaćvierdzili i dla biełaruskaj «mamy» hetaha vytvorcy abutku — kampanii «Hrupa Biełviest».
Ahulnaja suma daŭhoŭ «Biełviesta» składaje 32 miljony 965 tysiač rubloŭ, vynikaje sa źviestak servisu legat.by. Da prykładu, Brescki pančošny kambinat sprabuje spahnać z vytvorcy abutku 840,5 tysiačy rubloŭ, «Biełahraprambank» — bolš za 18 miljonaŭ rubloŭ, Hałoŭnaje ŭpraŭleńnie Minfina pa Viciebskaj vobłaści — amal 2,8 miljona rubloŭ.
U svaju čarhu, «Biełviestu» inšyja kampanii pavinny amal 1,9 miljona rubloŭ.
Pavodle źviestak servisu kartoteka.by, u 2024 hodzie «Biełviest» spracavaŭ z čystaj strataj, jakaja pieravysiła 1 miljon rubloŭ. Heta admoŭny finansavy vynik dziejnaści kampanii, kali vydatki (uklučajučy padatki i inšyja abaviazkovyja płaciažy) pieravyšajuć dachody.
Rolik u TikTok: «Usim kalektyvam padpisvali list-zvarot da Łukašenki»
U hetaj sacsietcy źjaviłasia videa, u jakim žančyna paviedamlaje, što «na pracy ŭsim svaim kalektyvam padpisvali list-zvarot da Alaksandra Łukašenki». «List z prośbaj-chadajnictvam pakinuć na pasadzie našaha hienieralnaha dyrektara — Juryja Sumaniejeva», — adznačaje tyktokierka.
Što (nie) kažuć na pradpryjemstvie i haradskija ŭłady
Na infalinii «Biełviesta» žurnalistu «Lusterka» jak pakupniku paviedamili, što zavod u adpačynku. Hetuju infarmacyju paćvierdzili i va ŭpraŭleńni ekanomiki Viciebskaha harvykankama. Ale źviestki nakont praciahłaści hetaha adpačynku razyšlisia.
«Pradpryjemstva pracuje. Bolš padrabiazna infarmacyju vy možacie daviedacca, kali patelefanujecie ŭ pryjomny pakoj hiendyrektara, — paviedamili na infalinii i dadali: — Ciapier na «Biełvieście», skažam tak, adpačynak. Zaŭsiody letam usia fabryka idzie ŭ adpačynak. Na hety momant akurat takaja situacyja, z paniadziełka, 23 červienia, usia fabryka pajšła ŭ adpačynak. Heta byvaje na pradpryjemstvie kožny hod».
Datelefanavacca ŭ pryjomny pakoj vytvorcy nie ŭdałosia.
«Infarmacyi, što pradpryjemstva ŭ dalejšym nie budzie pracavać, takoj niama. Pradpryjemstva ciapier prosta ŭ adpačynku znachodzicca, pracavać jano dalej budzie, — adznačyli va ŭpraŭleńni ekanomiki Viciebskaha harvykankama. — Jany ciapier u adpačynku znachodziacca. To-bok da lipienia. Na pradpryjemstvie heta standartnaja pracedura, heta vytvorčy adpačynak, jany raz na hod heta praktykujuć. Tamu nie chvalujciesia. Ščyra kažučy, niejkaj bolš padrabiaznaj infarmacyi niama».
«Doraha i niajakasna». Biełarusy skardziacca na niajakasny abutak ad «Biełviesta» i prablemy ź viartańniem hrošaj
Kroksy ad «Marka», martensy ad «Pramienia». Šukajem stylny abutak biełaruskich vytvorcaŭ
«Adradzić savieckija lehiendarnyja abjomy». Hrodzienskuju abutkovuju fabryku «Nioman» pieradali pad kiravańnie «Biełviesta»
«Isnuje prajekt pa stvareńni adzinaha katałoha franšyz Sajuznaj dziaržavy». Jak u Biełaruś zachodziać rasijskija sietki kram i kafe
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim12
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim
Babaryka i Kaleśnikava pahavaryli ź Inhaj Ruhinienie i zaklikali Litvu «dałučycca da dypłamatyčnych namahańniaŭ ZŠA» i «nie prapuścić akno mahčymaściej»3333
Kamientary
.