U šklanych butelkach bolš mikrapłastyku, čym u płastykavych — niečakanaje adkryćcio vučonych
Zhodna z novym daśledavańniem francuzskich vučonych, u šklanych butelkach z haziroŭkaj, limanadam, pivam ci chałodnaj harbataj u 5-50 razoŭ bolš mikrapłastyku, čym u napojach u płastykavaj abo mietaličnaj tary. U čym pryčyna?
Vučonyja vyjaŭlajuć mikrapłastyk paŭsiul — ad pavietra, jakim my dychajem, da ježy, jakuju spažyvajem. Jon znojdzieny na Eviereście i na dnie Maryjanskaj upadziny, navat u čałaviečym ciele.
Jak piša Sciemc Alert, navukoŭcy francuzskaha ahienctva biaśpieki charčovych praduktaŭ (ANSES) praviali daśledavańnie, nakiravanaje na vyznačeńnie kolkaści mikrapłastyku ŭ roznych vidach napojaŭ, jakija pradajucca ŭ krainie, i ŭpłyŭ na hety pakazčyk roznaj tary.
Navukoŭcy vyjavili, što ŭ šklanych butelkach z haziroŭkaj, limanadam, pivam ci chałodnaj harbataj utrymlivajecca ŭ siarednim kala 100 čaścinak mikrapłastyku na litr. Heta ŭ 5—50 razoŭ bolš, čym u napojach u płastykavaj abo mietaličnaj tary.
Jak pryznalisia sami aŭtary, jany čakali advarotnaha vyniku. Adnak pry dalejšym daśledavańni jany znajšli hetamu tłumačeńnie.
Było zaŭvažana, što čaścinki mikrapłastyku ŭ šklanych butelkach pa svaim kolery, formie i palimiernym składzie supadali z farbaj na źniešnim baku nakryvak, jakimi jany byli zakryty. Mienavita z hetaj farby, zhodna z vysnovami aŭtaraŭ, mikrapłastyk i traplaŭ u napoj.
Na nakryŭkach byli vyjaŭleny mikradrapiny, jakija, vierahodna, utvarylisia ŭ vyniku treńnia padčas zachoŭvańnia. Hetyja drapiny pryviali da taho, što čaścinki płastyka z farby absypalisia. A patrapić u sam napoj jany mahli padčas adkryćcia butelki.
U pitnoj vadzie — jak niehazavanaj, tak i hazavanaj — kolkaść mikrapłastyku akazałasia značna mienšaj: usiaho 1,6—4,5 čaścinki na litr. Vino, navat kali jano było ŭ šklanoj butelcy z nakryŭkaj, taksama mieła vielmi nizki ŭzrovień zabrudžvańnia. I patłumačyć heta navukoŭcy pakul nie mohuć.
Zatoje ŭ biezałkaholnych napojach było znojdziena ŭ siarednim 30 čaścinak na litr u haziroŭcy, u limanadach — 40, pivie — kala 60.
Praz toje, što pakolki nie isnuje etałonnaha ŭzroŭniu dla patencyjna taksičnaj kolkaści mikrapłastyku, niemahčyma skazać, ci ŭjaŭlajuć atrymanyja ličby ryzyku dla zdaroŭja. U toj ža čas navukoŭcy adznačajuć, što vytvorcy napojaŭ mahli b lohka pamienšyć kolkaść mikrapłastyku, jaki vydzialajecca nakryŭkami ad butelek.
Ahienctva ANSES pratestavała mietad ačystki, jaki zaklučajecca ŭ abdzimańni nakryvak strumieniem pavietra, a potym pramyŭku vadoj i śpirtam. U vyniku kolkaść mikrapłastyku ŭ napojach źniziłasia na 60%.
Mikrapłastyk — adna z hałoŭnych pahroz zdaroŭju ŭ XXI stahodździ. Ale navukoŭcy znajšli rašeńnie
Mikrapłastyk spryjaje raspaŭsiudžvańniu supierbakteryj, ustojlivych da antybijotykaŭ
Vučonyja vyjavili suviaź mikrapłastyku z šeraham ciažkich zachvorvańniaŭ
Navukoŭcy znajšli mikrapłastyk u jaječkach mužčyn
Ciapier čytajuć
Ad 300 000 da 500 000 dalaraŭ. Stała viadoma, chto pryvioz Džejsana Deruła ŭ Biełaruś4
Kamientary
"Farba na źniešnim baku nakryvak ..." :)))