Kiraŭnictva Hruzii napisała Trampu abraźlivy list, kali toj zastupiŭ na pasadu
List kiraŭnictva «Hruzinskaj mary» prezidentu Donaldu Trampu «ŭtrymlivaŭ pahrozy, byŭ abraźlivy, niesurjozny i vielmi niehatyŭna ŭspryniaty ŭ Vašynhtonie», raspaviała ŭ ekskluziŭnym intervju hruzinskaj słužbie «Radyjo Svaboda» pasoł ZŠA ŭ Hruzii Robin Danihan.
Danihan, jakaja ŭ lipieni pakidaje Hruziju pa ŭłasnaj inicyjatyvie, raskazała, što ŭ pačatku pracy administracyi Trampa pajechała ŭ Vašynhton, kab abmierkavać amierykanskuju palityku ŭ dačynieńni da Hruzii i atrymać rekamiendacyi, jakim budzie pieršaje pasłańnie hruzinskamu ŭradu.
Paśla hetaha jana sustrełasia ź ministram zamiežnych spraŭ Hruzii (Makaj Bačaryšvili) i vielmi vyrazna vykłała joj dva ci try kroki, jakija «Hruzinskaja mara» mahła b zrabić, kab viarnuć adnosiny ŭ kanstruktyŭnaje rečyšča.
Praz try dni kiraŭnictva «Hruzinskaj mary» dasłała pasłu ZŠA list dla administracyi Trampa.
— Heta byŭ pryvatny list, nie publičny. I, ščyra kažučy, jon byŭ pahroźlivy, abraźlivy, niesurjozny. Jaho vielmi niehatyŭna ŭspryniali ŭ Vašynhtonie. Tamu nam spatrebiŭsia niekatory čas, kab padrychtavać adkaz — heta praŭda. Dumaju, heta zaniało čas, bo ŭsie byli prosta šakavanyja tym, što taki list pryjšoŭ ad kiraŭnictva adnaho ŭrada na adras majho, — kaža Danihan.
Kali adkaz byŭ hatovy, pasoł skazała premjer-ministru Hruzii Irakliju Kabachidze, što ŭ jaje jość adkaz ad dziaržsakratara Rubia, jaki jon daručyŭ pieradać mienavita Bidzinie Ivanišvili.
Ale Ivanišvili admoviŭsia sustrecca, raspaviała jana.
Na pytańnie, čamu list byŭ adrasavany Ivanišvili, a nie premjer-ministru, Robin Danihan adkazała:
— Dumaju, bolšaść ludziej u śviecie razumieje, što Bidzina Ivanišvili kiruje ŭradam. I samaje dziŭnaje ŭ hetaj situacyi — što patrabavańni dla adnaŭleńnia adnosin na samaj spravie nie składanyja.
Pavodle jaje słoŭ, adzin ź pieršych krokaŭ — heta spynieńnie antyamierykanskaj rytoryki:
— Spynicie raspaŭsiudžvać niapraŭdu pra ZŠA. «Hruzinskaja mara» kaža šmat takoha, što nie adpaviadaje rečaisnaści. Što my nibyta sprabavali adkryć tut druhi front — niapraŭda. Što maja papiarednica nibyta sprabavała tut zładzić revalucyju — niapraŭda. Što naša stratehičnaje partniorstva isnuje tolki na papiery — niapraŭda. Što mianie nibyta adklikaje moj urad — taksama niapraŭda. Ja mahu praciahvać i dalej.
Ciapier čytajuć
Kab doŭha nie stajać na miažy z Polščaj, dziaŭčyna skarystałasia łajfchakam. Vynik: viza zhareła, vandroŭka sapsavanaja2
Kamientary