«Mnie było 15». Były student abvinavaciŭ vykładčyka i kiraŭnika ansambla «Biełaja Ruś» u damahańniach, jakija ciahnulisia kala hoda
Były student Minskaha dziaržaŭnaha kaledža mastactvaŭ abvinavaciŭ svajho vykładčyka Anatola Karpoviča, chareohrafa i kiraŭnika ansambla «Biełaja Ruś», u damahańniach — kali studentu było 15 hadoŭ. Sama ŭstanova ŭžo adreahavała — Karpoviča adchilili ad pryjomnaj kampanii.
«Heta nie pytańnie hamaseksualnych adnosin — mnie nie było 18 hadoŭ, mnie było 15. Ja vyhladaŭ dziciem. Heta, na moj pohlad, piedafilija», — padzialiŭsia z «Našaj Nivaj» były student MDKM Arciom Kaŭryha.
Ciapier Arciomu Kaŭryhu 30 hadoŭ, jon žyvie ŭ amierykanskim San-Dyjeha i pracuje fłarystam.
U roliku, što Kaŭryha apublikavaŭ niekalki dzion tamu, jon skazaŭ, što vyrašyŭ raspavieści staruju historyju mienavita ciapier pa dźviuch pryčynach: kab samomu vylečycca ad traŭmy i papiaredzić studentaŭ i ich baćkoŭ.
Arciom pastupiŭ u Minski dziaržaŭny kaledž mastactvaŭ u 2009 hodzie. Chłopiec pačaŭ vučycca na adździaleńni «Narodnaja chareahrafija», jakim zahadvaŭ Anatol Karpovič.
«Pra jaho daŭno chodziać čutki. Chadzili i chodziać dahetul, što hety čałaviek spakušaje małaletnich studentaŭ. Ale nichto z hetymi čutkami ničoha nie robić, i dalej za čutki heta nie zachodzić. Dyk voś, z usioj adkaznaściu zajaŭlaju, što heta nie čutki — jano sapraŭdy tak i jość. I adnym z hetych studentaŭ byŭ ja», — raskazaŭ Kaŭryha ŭ svaim instahramie.
Jak raspavioŭ Arciom, paśla adnoj z repietycyj u ansambli Karpoviča «Biełaja Ruś» vykładčyk paprasiŭ studenta advieźci razam ź im kancertnyja kaściumy da jaho dadomu. Kali jany pryjechali, akazałasia, što dla studenta taksama była hatovaja i viačera, padčas jakoj treba było pić kańjak. Paśla čarhovaj čarki Karpovič zaprasiŭ studenta vypić na brudaršaft, potym — pacałavaŭ jaho.
«Jon schapiŭ mianie za patylicu, paciahnuŭ da siabie i jaho jazyk apynuŭsia ŭ mianie ŭ rocie», — zhadaŭ jon.
Były student udakładniŭ «Našaj Nivie», što ich suviaź z vykładčykam ciahnułasia «minimum hod» — chłopiec nie raz byŭ u chareohrafa doma, pamiataje jaho abšyty vahonkaj bałkon. Vykładčyk prasiŭ jaho rabić masaž i zajmacca ź im aralnym seksam. Apošniaje jon jamu prapanavaŭ zrabić u kabiniecie Centra narodnaj tvorčaści, dzie prachodzili repietycyi ansambla «Biełaja Ruś».
Kaŭryha zabraŭ dakumienty z kaledža na druhim kursie i tady ich adnosiny z vykładčykam abarvalisia. Ciapier jon dumaje, što heta dapamahło jamu pieražyć situacyju. 15 hadoŭ były student z Karpovičam nie kamunikavaŭ, ale niekalki miesiacaŭ tamu Kaŭryha napisaŭ jamu, kab «vyciahnuć słovy» ab tym, što adbyvałasia. Miarkujučy pa pierapiscy z vykładčykam, jakuju Arciom pakazaŭ «Našaj Nivie», chareohraf adkazvaŭ na paviedamleńni nadzvyčaj pa-pryjacielsku, zhadvajučy ich adnosiny, «što zastalisia ŭ jaho pamiaci da sioniašniaha dnia».
Paśla publikacyi rolika Kaŭryha napisaŭ Karpoviču. Toj pierazvaniŭ i skazaŭ, što nie razumieje, čaho były student choča damahčysia.
Chareohraf tady zapeŭniŭ, što jaho ŭžo zvolnili z kaledža, ale vydańniu «Lusterka» skazaŭ ab inšym — što jaho adchilili ad udziełu ŭ pryjomnaj kampanii.
Vydańniu «Lusterka», jakoje źviarnułasia da Karpoviča ad imia maci abituryjentki, Karpovič skazaŭ, što historyja byłoha studenta — niapraŭda, a na ekzamienach u hetaj pryjomnaj kampanii jaho nie budzie.
Pa słovach Kaŭryhi, zaraz jamu ŭ instahramie pišuć ludzi 1994, 1999 i inšych hadoŭ vypusku z kaledža, chto sutykaŭsia z padobnym. «Kamuści, jak mnie, 30, kamuści — 50—55, heta darosłyja mužčyny, jany žyvuć u Biełarusi», — kaža jon.
Kamientary