Biełarusa ŭ Varšavie aryštavali za machlarstva pad vyhladam bankaŭskaha supracoŭnika
U varšaŭskim rajonie Vavier palicyja zatrymała dvuch mužčyn — 24-hadovaha hramadzianina Biełarusi i 22-hadovaha hramadzianina Ukrainy. Ich padazrajuć u sieryi ašukanstvaŭ, u tym liku pa schiemie «bankaŭskaha supracoŭnika». Abodvuch pa rašeńni suda źmiaścili pad trochmiesiačny časovy aryšt, paviedamlaje palicyja Varšavy.
Sutnaść machinacyi była ŭ tym, što padmanščyki telefanavali ludziam i pierakonvali ich, što hrošy na ich bankaŭskich rachunkach znachodziacca pad pahrozaj. Adna z achviar pavieryła hetamu i pieradała nieznajomcu 50 tysiač złotych (kala 12500 dalaraŭ) i bankaŭskija karty z PIN-kodami.
Palicejskija apieratyŭna pačali rasśledavańnie, vyśvietliŭšy asoby i miescaznachodžańnie padazravanych. U ofisie, jaki fihuravaŭ u spravie, byŭ zatrymany 24-hadovy biełarus, jaki asabista zabiraŭ hrošy. Padčas pieratrusu pravaachoŭniki znajšli vialikuju kolkaść najaŭnych: 135 500 złotych (kala 38 tysiač dalaraŭ), 8660 dalaraŭ i 200 jeŭra.
Padčas hetych dziejańniaŭ u ofis pryjšoŭ 22-hadovy ŭkrainiec, jaki skazaŭ, što prynios čarhovuju sumu — 39 tysiač złotych (kala 10 800 dalaraŭ), i pryznaŭsia, što ŭžo nieadnarazova dastaŭlaŭ hrošy ŭ hety ofis, atrymanyja ad inšych ludziej u roznych haradach Polščy. Jon taksama byŭ zatrymany.
Śledstva praciahvajecca. Ułady miarkujuć, što mužčyn mohuć abvinavacić jašče ŭ šerahu padobnych złačynstvaŭ, pakolki źjaŭlajucca novyja dokazy.
Kamientary