U Žłobinie likvidujuć znakamituju fabryku, dzie robiać štučnaje futra
Telehram-kanał «Svabodny Žłobin» 5 žniŭnia paviedamiŭ, što ŭ rajcentry chodziać čutki ab likvidacyi pradpryjemstva BIEŁFA — najbujniejšaha ŭ Jeŭropie vytvorcy štučnaha i vaŭnianaha futra na trykatažnaj asnovie. Pavodle źviestak kanała, pra zakryćcio fabryki «havorać užo jak minimum miesiac», i likvidacyja pradpryjemstva moža adbycca «ŭžo hetaj vosieńniu». Nijakaj aficyjnaj infarmacyi pra heta nie było, tamu «Fłahštok» pravieryŭ čutki.
Fabryka znakamitaja tym, što jaje futra vykarystoŭvali miascovyja ŭmielcy dla šyćcia miakkich cacak, jakimi słaviŭsia Žłobin — asabliva ŭ 2000-ch hadach, kali na vakzale rajcentra pradaŭcy jarkich cacak masava atačali ciahniki.
Pradpryjemstva, jakoje paśpiachova pracavała bolš za 40 hadoŭ, u apošnija hady sapraŭdy stała «fabrykaj pa vytvorčaści strat». Pra heta śviedčać štohadovyja spravazdačy ab dziejnaści pradpryjemstva, jakija vyvučyŭ «Fłahštok».
Pa vynikach 2024 hoda čystyja straty pradpryjemstva stali rekordnymi i skłali 3 miljony 159 tysiač rubloŭ (bolš za 1 miljon dalaraŭ). Pa vynikach 2023 hoda — 2 miljony 276 tysiač rubloŭ. 2022 hod byŭ dla fabryki bolš paśpiachovym, ale ŭ plus vyjści ŭsio adno nie ŭdałosia — straty skłali 291 tysiaču rubloŭ. A jašče raniej, u 2021 hodzie, pradpryjemstva spracavała ŭ minus 2 miljony 859 tysiač rubloŭ.
Miarkujučy pa danych u spravazdačach, fabryka mahła ŭziać karotkaterminovy i doŭhaterminovy kredyty. Ale pradaje jana mienš, čym vyrablaje, tamu źmianšajecca prybytkovaść. Na fonie hetaha adbyvajecca zakupka abstalavańnia, na pradpryjemstvie zapaŭniajucca składy hatovaj pradukcyjaj.
«Pracujuć tak, niby nijakaha minusu niama. U narmalnym śviecie jany b pierastrojvali pracesy. Ale ŭ Biełarusi pradpryjemstvy mohuć funkcyjanavać ź lubymi minusami, pakul ich choča datavać dziaržava», — prakamientavaŭ situacyju ekśpiert.
Pra ciapierašniuju kolkaść rabotnikaŭ na BIEŁFA nie paviedamlajecca, ale viadoma, što ŭ 2022 hodzie tut pracavała 345 čałaviek. Śviežych vakansij fabryka daŭno nie publikavała, na zvanok u adździeł kadraŭ nichto nie adkazaŭ.
Zatoje ŭ inšym padraździaleńni, kudy «Fłahštok» patelefanavaŭ ad imia pakupnika, pryznalisia: pradpryjemstva sapraŭdy rychtujuć da zakryćcia, vytvorčaść spyniłasia:
«Likvidacyjny pieryjad pačniecca z 11 žniŭnia. Praciahniecca da 10 maja z mahčymym nastupnym padaŭžeńniem. Fabryka ŭžo ničoha nie robić, vytvorčaść staić. Rabotnikaŭ pieravodziać kaho na 2/3, kaho za svoj košt».
Ciapier pradpryjemstva viadzie rasprodaž pradukcyi, jakaja nazapasiłasia na składach.
Ciapier čytajuć
Stryžak: Ja prosta haŭno, ja lažu na dnie samaj brudnaj kanavy i adtul sprabuju niešta skazać u svaju abaronu34
Kamientary