Usiaho 15 chvilin chutkaj chady štodnia mohuć padoŭžyć vaša žyćcio

Jak piša Study Finds, navukoŭcy Miedycynskaha centra Univiersiteta Vanderbilta praanalizavali danyja z maštabnaha daśledavańnia Southern Community Cohort Study, jakoje pravodziłasia ŭ 12 paŭdniova-ŭschodnich štatach ZŠA. U im uziali ŭdzieł kala 85 tysiač čałaviek va ŭzroście ad 40 da 79 hadoŭ, jakich nabirali ŭ pieryjad z 2002 da 2009 hoda.

U pačatku daśledavańnia ŭsie ŭdzielniki zapoŭnili ankiety, u jakich paviedamili pra zvyčki štodzionnaj chady, a taksama pra svoj ład žyćcia, stan zdaroŭja i dachod.

Daśledčyki adsočvali śmiarotnaść da 31 śniežnia 2022 hoda, vykarystoŭvajučy Nacyjanalnuju bazu źviestak pra śmierci. Z kančatkovaha analizu vyklučyli tych, chto pamior ciaham pieršych dvuch hadoŭ nazirańnia abo nie padaŭ dastatkovych źviestak pra chadu. U vyniku zastałosia 79 856 čałaviek.

Chutka chadzić — značyć žyć daŭžej

«Chutkaja chada ŭsiaho 15 chvilin u dzień była źviazana sa źnižeńniem ahulnaj śmiarotnaści amal na 20%. Pry štodzionnaj pavolnaj chadzie bolš za try hadziny źnižeńnie śmiarotnaści było vyjaŭlena tolki na 4%», —

pišuć daśledčyki ŭ artykule, apublikavanym u Amierykanskim časopisie prafiłaktyčnaj miedycyny.

Heta značyć, što nie praciahłaść, a intensiŭnaść maje klučavoje značeńnie — karotkaja, ale enierhičnaja prahułka ŭ piać razoŭ bolš efiektyŭnaja za doŭhija i pavolnyja špacyry.

Pad «chutkaj chadoju» navukoŭcy razumiejuć lubuju aktyŭnaść, jakaja prymušaje serca bicca čaściej. Naprykład, uzdym pa leśvicy ci intensiŭnaja prahułka. Pad «pavolnaj» — pieramiaščeńni pa chacie ci na pracy, vyhuł sabaki ŭ spakojnym tempie.

Pavialičyć

Aŭtary adznačajuć, što ŭnikalnaść ich pracy — u sacyjalnym składzie ŭdzielnikaŭ: pieravažna heta ludzi ź nizkim uzroŭniem dachodaŭ, pryčym kala dźviuch tracin — afraamierykancy z paŭdniova-ŭschodnich štataŭ ZŠA. Raniej takaja hrupa amal nie daśledavałasia z punktu hledžańnia fizičnaj aktyŭnaści.

Amal pałova ŭdzielnikaŭ naohuł nie praktykavała chutkuju chadu, choć kala traciny chadziła pavolna bolš za try hadziny na dzień. Heta śviedčyć: mnohija ruchajucca, ale nie z dastatkovaj intensiŭnaściu, kab atrymać maksimalny efiekt.

Achoŭny efiekt chutkaj chady naziraŭsia niezaležna ad stanu zdaroŭja ŭdzielnikaŭ. Bolš za toje, ludzi, jakija ŭžo mieli chraničnyja zachvorvańni (dyjabiet, vysoki cisk, chvaroby serca), atrymlivali ad chutkaj chady navat bolšuju karyść, čym ich zdarovyja adnahodki.

Asabliva mocna chutkaja chada abaraniaje ad sardečna-sasudzistych zachvorvańniaŭ, jakija źjaŭlajucca adnoj z hałoŭnych pryčyn śmiarotnaści ŭ śviecie. Jana ŭmacoŭvaje serca, palapšaje krovazvarot, dapamahaje kantralavać vahu i cisk, a taksama źnižaje zapalenčyja pracesy ŭ arhaniźmie.

Prostaje rašeńnie dla tych, chto nie maje finansaŭ

Jak davodziać aŭtary, chutkaja chada nie patrabuje śpiecyjalnaha abstalavańnia, abaniemientaŭ u trenažornuju zału abo trenirovak. Joj možna zajmacca praktyčna ŭ lubym miescy, u luby čas, i jana ničoha nie kaštuje.

Akramia hetaha, 15 chvilin lohka ŭpisać u luby raskład. Dastatkova, naprykład, chutka prajścisia da prypynku, padniacca pa leśvicy zamiest lifta ci zrabić kruh vakoł kvartała.

Pavialičyć

Aŭtary źviartajuć uvahu na niekatoryja abmiežavańni ich daśledavańnia. Tak, udzielniki samastojna paviedamlali pra svaje zvyčki fizičnaj aktyŭnaści tolki adzin raz u samym pačatku, tamu nielha było adsočvać, jak źmianiaŭsia ŭzrovień aktyŭnaści ź ciaham času.

Akramia taho, vyniki daśledavańnia pakazvajuć mocnuju suviaź, ale nie dakazvajuć pramoj pryčynna-vynikovaj zaležnaści. Mahčyma, bolš zdarovyja ludzi prosta bolš schilnyja da chutkaj chady.

Tym nie mienš, vysnova vidavočnaja: dla palapšeńnia zdaroŭja nie treba rychtavacca da marafonu ci kuplać darahi abaniemient u fitnes-centr. Dla miljonaŭ ludziej usiaho 15 chvilin chutkaj chady na dzień mohuć stać sapraŭdnym vyratavańniem i klučom da bolš doŭhaha i zdaraviejšaha žyćcia.

• 7
• 0
• 0
• 0
• 0
• 0
• 0
• 0