Biełaruskaj udzielnicy konkursu «Mis Suśviet» zrabili kaścium vahoj 11 kiłahramaŭ. Šeść ź ich — kakošnik
Pieramožca konkursu «Mis Biełaruś — 2025» Alona Kučaruk rychtujecca lacieć u Tajłand na konkurs «Mis Suśviet», na jakim źbiarucca pryhažuni sa 134 krain. BiełTA z pafasam raskazała, jak viadziecca padrychtoŭka da hetaha mierapryjemstva.
Finał konkursu adbudziecca 21 listapada, ale Kučaruk palacić u Banhkok užo 1 listapada. A ŭvieś apošni miesiac jaje aktyŭna da hetaha rychtujuć. Padrychtoŭka skancentravana na defile, repietycyi vychadaŭ i pastanovak, jakija buduć u finale konkursu. Heta vychad u nacyjanalnym kaściumie, viačerniaj sukiency, kupalniku i šerah inšych. Taksama dziaŭčynu vučyli rabić sabie makijaž i pryčosku, davali ŭroki akciorskaha majsterstva, praktykavali anhlijskuju movu.
Dyzajnierki Taćciana Jafremava i Iryna Rambalskaja, jakija robiać stroi dla Aleny Kučaruk, spałučajuć u ich latučy šoŭk i mietalizavanyja tkaniny, pazałočanuju skuru i chramavanyja harsety. Šaŭkovy niz, jak śćviardžajecca, arhanična spałučajecca ź viercham z chramavanaha płastyku z elemientami sapraŭdnaha srebra.
«Nasamreč ja ščyra liču, što ŭ Biełarusi samaje hałoŭnaje zołata i bryljanty — našy dziaŭčaty. Na hety vobraz nas natchniła, jak by banalna heta ni hučała, biełaruskaja pšanica, ale my pasprabavali vykarystać hety simvał nietypova. Praz chrom, mietał i zołata my pakazali, što sapraŭdnaja biełaruskaja pryhažunia nie tolki piaščotnaja i dalikatnaja, ale i mocnaja. Na samaj spravie jana brania našaj krainy, jakaja hatovaja abaraniać Radzimu i adstojvać honar Biełarusi na mižnarodnaj arenie», — patłumačyła ideju Iryna Rambalskaja.
Jaje kaleha Taćciana Jafremava dadaje:
«Heta całkam ručnaja rabota, tut rukami vylepleny kožny kałasok. […] Apošnija kalekcyi, jakija my pradstaŭlajem na mižnarodnym uzroŭni, heta oda biełaruscy. Vychad u viačerniaj sukiency — taksama pieśnia pra biełaruskuju dziaŭčynu, tolki ŭ novaj interpretacyi».
Padčas padrychtoŭčaj pracy žančyny pierahledzieli mnostva ŭboraŭ ad pradstaŭnic afrykanskich i azijackich krain, bo tam, maŭlaŭ, zaŭsiody jość bujańnie farbaŭ. Ale ŭrešcie ŭsio ž vyrašyli pajści ŭłasnym šlacham, bo afrykanskaje i azijackaje «ŭsio ž taki nie naša DNK».
Nacyjanalny kaścium dla konkursa vykanaŭ dyzajnier Dźmitryj Cituškin u styli aficyjnych hierba i ściaha, jon maje «demanstravać našu nacyjanalnuju samabytnaść».
Dla jaho stvareńnia vykarystana 30 tysiač kaštoŭnych kamianioŭ, vaha kaściuma — 11 kiłahramaŭ, a praca nad im išła dva miesiacy. Pry hetym 6 kiłahramaŭ zavažyŭ hałaŭny ŭbor.
Alonie Kučaruk hety kaścium spačatku zdavaŭsia zanadta ciažkim, ale paśla pryciarpiełasia.
Taksama jana prademanstruje na konkursie novuju parfumu «Biełaruś», jakuju stvaryŭ parfumier Mikałaj Jarac. U jaje vodary spałučylisia pach skošanaj travy ź limonam, a taksama pach pivoń, jakija vyroščvaje doma maci parfumiera. Charaktar parfumiernaj kampazicyi nadaje nota pačuli, dubovaha mochu i vanili. U vyniku atrymlivajecca
«brutalny draŭniany vodar ź lohkim akcentam na žanockaść. Parfuma «Biełaruś» uvachodzić u kalekcyju, dzie taksama možna znajści vodary, źviazanyja ź Minskam, kosmasam, pryhažościu biełaruskich dziaŭčat i našymi sinimi aziorami».
Sama Alona Kučaruk pierad vyjezdam na konkurs kaža:
«Krychu chvalujusia, bo nikoli nie lotała na samalocie. U Tajłandzie ja budu biez majoj kamandy, ale jana zaŭsiody budzie sa mnoj na suviazi. Ja strašenna ŭdziačnaja ŭsim, chto sa mnoj pracavaŭ, bo biez hetych ludziej nie spraviłasia b».
Kamientary
Učora ŭ navinach było paviedamleńnie ab zatrymańnie na " dahavarniakach na staŭki"
A voś kaścium ????? Niejkaja halinka na nh karparatyva bsrm i partyi b.ruś