Biznesu dva hady. Syry — pieravažna miakkija, typu sułuhuni — pradajuć u Rasiju.
Syravarnia «Elros» u Haradku adkryłasia ŭ mai 2023 hoda ŭ pamiaškańni, jakoje raniej naležała miascovamu rajspažyŭtavarystvu. Miascovy pradprymalnik Hieorhij Litvinaŭ vykupiŭ jaho na tarhach i, adčuŭšy kanjunkturu rynku, vyrašyŭ zaniacca vytvorčaściu syroŭ.
Zaraz tam pracuje cech, dzie robiać miakkija i paŭćviordyja syry. Małako kuplajuć u miascovych fiermieraŭ i viaskoŭcaŭ. Pradukcyja maje siertyfikaty i pradajecca praź sietkavyja kramy ŭ Biełarusi i ŭ rasijskija rehijony.
Litvinaŭ pachvaliŭsia BiełTA, što častku pradukcyi pastaŭlaje ŭ Rasiju. Pryčym nie tolki ŭ pamiežnyja rehijony. Syry voziać na svaich mašynach z chaładzilnikami navat u Pienzienskuju i Sarataŭskuju vobłaści. Tak što «Haradocki syr» prachodzić niemały šlach — bolš za 1300 kiłamietraŭ, kali jedzie da Saratava.
Da kanca listapada pradprymalnik źbirajecca zapuścić jašče adzin cech — pa vytvorčaści masła. Pradukcyju buduć fasavać pa 180, 200 i 250 hramaŭ. Pa słovach Litvinava, užo jość zakazy na pastaŭki pradukcyi ŭ fasoŭcy pa 10 i 20 kiłahramaŭ.
Na «Elrosie» zaraz pracuje 62 čałavieki — usie miascovyja, tolki technołah i buchhałtar ź Viciebska. A na nastupny hod Litvinaŭ płanuje pabudavać treci cech, dzie budzie aŭtamatyčnaja linija dla novych vidaŭ syroŭ, fasavanych u kubački.
Pa słovach pradprymalnika, na pieršy i druhi cechi jon vydatkavaŭ kala troch miljonaŭ rubloŭ ułasnych srodkaŭ. Treci cech taksama źbirajecca budavać biez kredytaŭ. Paśla zaviaršeńnia ŭsich čerhaŭ vytvorčaści na pradpryjemstvie budzie pracavać 115 čałaviek. Usich rabotnikaŭ navučajuć na miescy.
Kolki ž zarablajuć na pradpryjemstvie? Adpaviedna abviestak ab vakansijach, prosta ciapier pradpryjemstva šukaje vadzicielaŭ katehoryi D z zarobkam 1400‑1600 rubloŭ. Układčyku-upakoŭščyku i pamočniku syradzieła hatovy płacić 1200‑1300 rubloŭ. A voś ślesaru-santechniku abiacajuć 1600.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj31
Kamientary