Siarod biełaruskich katalikoŭ pašyraje ŭpłyŭ «Alfa». Čamu nie ŭsim heta daspadoby?
Ruch «Alfa-kurs» aktyŭna raźvivajecca ŭ Katalickaj carkvie ŭ Biełarusi, zajaviŭ adzin ź jaho ŭdzielnikaŭ, navahrudski probašč Juryj Žeharyn. Jon ža nazvaŭ hety ruch «adnoj z najbolš dziejsnych formaŭ novaj jevanhielizacyi» i padziakavaŭ hrodzienskamu biskupu za toje, što jon jaje «aktyŭna padtrymlivaje». Adnak nie ŭsie vierniki, pryčym nie tolki «kansiervatyŭnyja kataliki», uchvalajuć takuju «formu novaj jevanhielizacyi». Raniej niekatoryja biełaruskija biskupy nie padtrymlivali dziejnaść «Alfy», piša Katolik.life.
Fota ilustracyjnaje
Ci źmianiłasia mierkavańnie biskupaŭ ciapier, nieviadoma, ale ruch dziejničaje ŭžo va ŭsich čatyroch dyjacezijach u Biełarusi. Słužycieli «Alfa-kursu» stali pryjazdžać navat u maleńkija addalenyja parafii — u pryvatnaści, u Naroŭlu.
Što viadoma pra hety ruch i čamu jon naściarožvaje «tradycyjnych katolikaŭ»?
Supołki «Alfa-kursu» jość užo ŭ Minsku, Viciebsku, Hrodnie, Navahrudku, Krupkach, Oršy, Hłybokim, Naroŭli i Pareččy. To-bok hety ruch achapiŭ užo značna bolš parafij, čym «Nieakatechumienalny šlach» — inšaja «forma novaj jevanhielizacyi».
Ale kali Neakatechumienat, jaki taksama mnohija krytykujuć i nie prymajuć, źjaŭlajecca rucham unutry Katalickaj carkvy i adsyłaje da pieršych stahodździaŭ supolnaha žyćcia chryścijan, to «Alfa-kurs» paŭstaŭ u pratestantyźmie. Ukaraniać jaho sprabavali nie tolki ŭ Katalickaj, ale i ŭ Pravasłaŭnaj carkvie.
U sustrečach «Alfy» mnohija bačać padabienstva z pratestanckimi słužeńniami, prajavy, niecharakternyja dla Katalickaj carkvy: uźniesienyja ŭharu ruki pry malitvie, emacyjnaść, vopleski i padtancoŭki.
«Byli momanty, kali ślozy ciakli sami saboj. Byli abdymki, jakija kazali bolš, čym słovy. Była prysutnaść, jakuju niemahčyma apisać — tolki pieražyć»,
— tak apisvajuć udzielniki apošni «Uikend Ducha Śviatoha» ŭ Navahrudku.
Niekatoryja videa atrymlivajuć u sacsietkach krytyčnyja zaŭvahi viernikaŭ, naprykład:
«Raniej prosta śpiavali, a ciapier z prytancoŭkaj. Moža, ja nie maju racyi, ale nikoli tak nie plaskaju i nie ruchajusia ŭ takt muzyki [u chramie]».
Darečy, na videaspravazdačy pra svaje sustrečy słužycieli «Alfy» ŭ Katalickaj carkvie niaredka nakładvajuć pratestanckija pieśni.
Naściarožvajuć i niekatoryja vyrazy ŭ adras ruchu: «samy papularny chryścijanski kurs», «adzin z samych dziejsnych», «najlepšy sposab raskazać pra Boha inšym ludziam», «miesca, dzie Boh dziejničaje asablivym čynam», «Alfa-siamja».
Sustrečy «Alfa-kursu» ładziacca raz na tydzień. Zaniatak pačynajecca sumiesnym čajavańniem, zatym — lekcyja, jakuju čytajuć śvieckija słužycieli, abmierkavańnie temy, pytańni ad słuchačoŭ i abmien dumkami. Taksama pravodzicca «Alfa-ŭikend» — «asablivyja vychadnyja dla kožnaha ŭdzielnika kursa».
«Alfa-kurs» nakiravany na ludziej, «jakija nie chodziać u carkvu i chacieli b dałučycca da chryścijanskaj viery», a taksama «dla chryścijan, jakija chočuć aśviažyć asnovy svajoj viery», tych, chto choča «nie prosta daviedacca pra Hospada, a spaznać Jaho Samoha».
Vałanciory rasčyścili pad Navahrudkam ruiny kaścioła ŭ jehipieckim styli FOTAFAKT
Pad Navahrudkam adnavili kapličku. Ramont jaje niečakanym čynam sastaryŭ
Vyzvalenyja ŭčora katalickija śviatary znachodziacca ŭ Vatykanie
Ejsmant: Dvuch katalickich śviataroŭ pamiłavali pa prośbie Papy Lva XIV
Kaścioły Biełarusi namalavali ŭ papularnym trendzie «viazanyja harady» FOTY
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary
A hrodzienski biskup viedaje, što naviedvalniki alfa-kursaŭ nie źbirajucca naviedvać imšu?
A tak zvanaja pravasłaŭnaja carkva maskoŭskaha patryjarchata, jakaja raspuściła ščupalcy pa ŭsioj Biełarusi, źjaŭlajecca elemientam maskoŭskaj akupacyi Biełarusi. I ja ŭvohule nie razumieju, jak možna chadzić u hetuju carkvu i słužyć u joj paśla taho, jak hetaja
tak zvanaja carkva abjaviła, što vajna rasii z Ukrainaj źjaŭlajecca śviaščennaj. Paśla ŭsiaho hetaha jak uvohule možna naviedvać hetuju tak zvanuju pravasłaŭnuju carkvu maskoŭskaha patryjarchata, kali jość takaja alternatyva, jak sapraŭdnaja Paŭsiudnaja Carkva? ("Katalickaja" u pierakładzie z hreckaj jość "Paŭsiudnaja")