Скандальныя катлеты з грузінскай крамы аказаліся сапраўды беларускімі. «Дзюбаў, лап і хвастоў» унутры не знайшлі
Пасля таго, як у выніку крытычных водгукаў у сацсетках узніклі сумневы ў паходжанні курыных катлет «Папараць-кветка» вытворчасці, як было пазначана, агракамбіната «Дзяржынскі» ў Фаніпалі, журналісты мясцовага выдання fanipol.by звязаліся з самім прадпрыемствам. Там пацвердзілі, што прадукт сапраўды іх, і патлумачылі, што ў ім магло збянтэжыць. А кампанія Bulbaland, якая прадае тавар у Грузіі, дала свае разгорнутыя тлумачэнні.
На прадпрыемстве пацвердзілі, што катлеты сапраўды іх вытворчасці, а этыкеткі на грузінскай мове яны робяць самі спецыяльна для экспартных паставак.
Прадстаўнікі прадпрыемства заявілі, што ўжо вывучаюць сітуацыю, каб зразумець, што здарылася ў канкрэтным выпадку, і гатовыя даць пакупніцы афіцыйны адказ. Пры гэтым, аднак, дапусцілі, што праблема магла ўзнікнуць з-за няправільных умоў захоўвання або транспартавання ўжо ў Грузіі.
Журналісты таксама самі наведалі фірмовую краму агракамбіната і паглядзелі склад катлет «Папараць-кветка». На этыкетцы было пазначана: кускавое мяса куранят-бройлераў (плячо, філе), скура, паніроўка, сыр, масла, спецыі. Мяса механічнай абвалкі, як падазравалі многія каментатары ў сацсетках, у складзе няма.
Прадавачка крамы пацвердзіла, што катлеты рубленыя, з выразнымі кавалачкамі мяса і начынкай. Па словах пастаяннай пакупніцы, якая якраз аказалася ў той час у гэтай краме, катлеты заўсёды такія — не фарш цалкам аднастайнай кансістэнцыі, а менавіта кавалкі мяса.
Журналісты таксама самі прыгатавалі катлеты дома, каб ацаніць іх якасць. Катлета захавала форму, атрымалася шчыльнай, з выразнымі валокнамі курынага мяса — гэта пацвердзіла, што прадукт робіцца з кускавога мяса, а не з масы, характэрнай для мяса механічнай абвалкі.
Начынка была сырна-сметанковай, смак апісалі як «8 з 10 для сваёй цэнавай катэгорыі». Ніякіх «дзюбаў, лапаў ці хвастоў» унутры не знайшлі.
Такім чынам, версія пра падробку не пацвердзілася — у Батумі сапраўды прадавалі арыгінальную беларускую прадукцыю. Аднак пакупніца, магчыма, чакала ад катлет іншай кансістэнцыі і ўспрыняла кускавое мяса як нешта падазронае, пасля чаго і нарадзілася гісторыя пра «перамолатыя адкіды».
Цэны ў Беларусі і Грузіі, дарэчы, прыкметна адрозніваюцца: калі ў фірмовай беларускай краме кілаграм катлет каштуе 10 рублёў 33 капейкі, то ў грузінскай — каля 20 лары, што прыкладна роўна 20 беларускім рублям. Такім чынам, у Батумі прадукт прадаваўся амаль у два разы даражэй.
Пасля кампанія Bulbaland, якая займаецца продажам беларускай прадукцыі ў Грузіі праз сетку крамаў, афіцыйна пракаментавала прэтэнзіі, сярод іншага адзначыўшы, што яна працуе ўсяго крыху больш за два гады, але мае ў асартыменце ўжо больш за 1500 беларускіх найменняў. І гэта адзіная сетка крамаў у Грузіі, дзе 100% тавараў беларускай вытворчасці. Адзіны тавар, які вырабляецца на месцы — адзін з відаў хлеба, і той пячэцца з беларускай мукі.
Ад агракамбіната «Дзяржынскі» кампанія завозіць шырокі асартымент: замарожаныя паўфабрыкаты са свініны, курыцы і індыка, гатовую прадукцыю, а таксама курыныя і індычыныя часткі.
Не беларускі штрыхкод на ўпакоўцы, які пачынаецца з «200», тлумачыцца тым, што гэта прадукцыя на вагу, а ўпакоўка штучных тавараў мае беларускі код «48».
Увесь тавар дастаўляецца ў Грузію ў спецыяльных рэфрыжаратарных машынах з захаваннем правільнага тэмпературнага рэжыму. Тэмпература кантралюецца пры адгрузцы на заводзе, на мяжы яе правяраюць ветэрынарныя службы, і яшчэ раз — на складзе пры прыёме. А ў саміх крамах дзейнічае сістэма кантролю якасці HACCP, што пацверджана адпаведным сертыфікатам.
Упакоўка вырабляецца па дамоўленасці з пастаўшчыком і можа адрознівацца ад беларускай. Гэта тлумачыцца тым, што для Грузіі, згодна з заканадаўствам, на этыкетцы абавязкова павінна быць інфармацыя на грузінскай мове.
Што да смаку і водгукаў, то кампанія падкрэслівае — гэта суб’ектыўна. Калі прадукт прадаецца, то ў яго ёсць свой пакупнік. Калі нешта не купляюць, то такі тавар выключаюць з асартыменту. І наадварот — калі пакупнікі рэгулярна просяць прывезці нейкія канкрэтныя беларускія тавары, то сетка стараецца іх просьбы задаволіць.
У Грузіі прадаюцца вельмі нясмачныя беларускія катлеты. Але ці насамрэч яны беларускія?
У Беларусі распрацоўваюць штучную рыбу для кармлення школьнікаў
«Куды глядзіць санстанцыя?» У сталоўцы, дзе харчуюцца сляпыя людзі, прадаюць катлеты з сырым мясам
«На абеды і вячэры не траціла больш за 5 BYN». Беларуска — пра свае выдаткі на падарожжа ў Жыровіцкі манастыр
Цяпер чытаюць
«Я тая самая ў футры». Маладая швачка працавала ў футры, пакуль дзяржТБ расказвала, што на фабрыцы ў Жлобіне не холадна14
Каментары