Da haładoŭki pratestantaŭ dałučylisia ŭžo 110 čałaviek

Ad siońnia sytuacyja z budynkam pratestanckaj carkvy «Novaje žyćcio» nabyvaje jakasna novy charaktar. 9 kastryčnika sychodzić termin, kali pavodle zakonu budynak pierachodzić da dziaržavy (dziesiać dzion tamu na rachunak carkvy było pieraličana 17 tys. dalaraŭ).

Adnak vierniki carkvy, a taksama pradstaŭniki inšych pratestanckich sajuzaŭ, što dałučylisia da ich na znak salidarnaści, praciahvajuć akcyju pratestu. Ad 6 kastryčnika ŭ budynku carkvy praciahvajecca post-haładoŭka. Pastar carkvy «Novaje žyćcio» Viačasłaŭ Hančarenka kaža pra istotnuju padtrymku z boku pratestanckich cerkvaŭ Biełarusi: «Na ŭčorašnim bohasłužeńni prysutničała 25 pastyraŭ, što majuć vialiki ŭpłyŭ u svaich supołkach». Taksama, jak jon kaža, čakajucca akcyi salidarnaści za miažoju – pikiety kala biełaruskich pasolstvaŭ. A ŭžo ciapier z-za miažy telefanujuć i pišuć nieabyjakavyja ludzi, vykazvajuć padtrymku haładoŭnikam.

Pastar Hančarenka nia viedaje, čaho čakać ad uładaŭ ad siońniašniaha dnia, ale vykazvaje ŭpeŭnienaść u dziejańniach pratestujučych: «My ŭžo nieadnarazova vykazvalisia na hetuju temu i mahu jašče raz skazać – dobraachvotna svaju carkvu my nie addamo». Na pytańnie pra nastroj ludziej, što na dadzieny momant znachodziacca ŭ carkvie, jon kaža, što zaraz idzie abmierkavańnie nakont aptymizacyi ŭmovaŭ haładoŭki. «Ludzi nastrojenyja rašuča i ŭpeŭniena», – kaža V.Hančarenka.

Sustaršynia arhkamitetu Biełaruskaj chryścijanskaj demakratyi Alaksiej Šein taksama dałučyŭsia da haładoŭki. Pavodle jahonych słovaŭ, na dadzieny momant ŭ akcyi pratestu ŭdzielničaje kala 110 čałaviek. Častka trymaje haładoŭku ŭ samim budynku carkvy (ciapier tam znachodzicca blizka paŭsotni čałaviek), častka – pa-za jaje miežami. Alaksiej razam ź siamiudziesiaćciu viernikami znachodziŭsia ŭ carkvie siońnia ŭnačy. Jon kaža, što akcyja pratestu viernikaŭ carkvy «Novaje žyćcio» nie zastałasia pa-za ŭvahaj pradstaŭnikoŭ inšych cerkvaŭ: «Učora na słužbie byli pradstaŭniki Sajuzu cerkvaŭ viery evanhielskaj, z Baranavičaŭ vierniki piacidziasiatnickich cerkvaŭ «Zbaŭleńnie» i «Novaje žyćcio» (nia błytać ź mienskaj carkvoj)».

Na dumku sp.Šeina, sytuacyja z budynkam carkvy maje niekalki varyjantaŭ raźviazańnia. Pieršaje, siłavoje vyrašeńnie z pryciahnieńniem da vysialeńnia milicyi. Druhoje, što padajecca bolš vierajemnym, zaciahvańnie vyrašeńnia prablemy. «Na nosie zima, i, mahčyma, ułady spadziajucca, što ludzi stomiacca pratestavać, uvaha da akcyi pratestu apadzie, – miarkuje A.Šein. – Adnak druhi varyjant taksama nienadziejny, kali ŭličyć, nakolki nieadekvatnyja byvajuć učynki ŭładaŭ. Tamu my musim być hatovyja da ŭsiaho».

□

Na hetuju ž temu hladzi:

– Ivan Paškievič: Vučań Łukašenka hodny svajho nastaŭnika Stalina. (Były namieśnik kiraŭnika Administracyi prezydenta, a ciapier daradca staršyni Sajuzu evanhielskich chryścijan-baptystaŭ kamentuje haładoŭku evanhielistaŭ z carkvy «Novaje žyćcio»);

– a taksama błohi Julii Daraškievič i Andreja Lankieviča.

• 0
• 0
• 0
• 0
• 0
• 0
• 0
• 0