Čas udaryć Łukašenku ŭ balučaje miesca

Dejvid Krejmer, vykanaŭčy dyrektar Freedom House, i Jorh Forbryh, ekspert Niamieckaha fondu Maršała ZŠA, pišuć u siońniašnim vydańni Financial Times, što Eŭraźviaz, kali jon choča zajmieć upłyŭ na sytuacyju ŭ Biełarusi, pavinien uvieści ekanamičnyja sankcyi suprać Miensku.

Paśla ašukanskich vybaraŭ u śniežni žorstkaje zdušeńnie pratestaŭ tolki pavialičyła pakuty biełaruskaj demakratyčnaj apazycyi, hramadzianskaj supolnaści i srodkaŭ masavaj infarmacyi, jakija znachodziacca ŭ stanie abłohi ŭ krainie. U adkaz na heta ministry Eŭraźviazu mielisia ŭ paniadziełak uchvalić novuju zabaronu na pajezdki i zamarožańnie aktyvaŭ Alaksandra Łukašenki, dyktatara krainy, dy bolš čym 150 jahonych pasłuhačoŭ. Hety krok možna tolki vitać, ale jon nie idzie dastatkova daloka. Nadyšoŭ čas udaryć spadara Łukašenku ŭ balučaje miesca: jaho ekanomiku.

Eŭraźviaz zasłuhoŭvaje pavahi za hety rašučy krok, jaki źjaŭlajecca radykalnym adychodam ad papiaredniaj dvuchhadovaj kampanii «ŭciahvańnia» spadara Łukašenki. Hetaja palityka nie dała vynikaŭ i była zamieniena novymi abiacańniami pavialičyć padtrymku demakratam u krainie. Ale možna zrabić jašče bolej, kab ciskam schilić režym da reformaŭ i vyzvaleńnia dziasiatkaŭ palityčnych źniavolenych, jakich trymaje KDB Biełarusi. Vyzvaleńnie dvuch viadomych viaźniaŭ u minułyja vychodnyja nie pakidaje sumnieńniaŭ, što režym adčuvalny da takoha cisku.

Kab damahčysia hetaha vyzvaleńnia i padšturchnuć da šyrejšych źmienaŭ, Zachad pavinien ciapier pryniać ekanamičnyja zachady suprać Miensku.

Padmacavany ščodrymi rasiejskimi subsydyjami i štoraz bolšymi biznesovymi suviaziami z Eŭraźviazam, biełaruski dyktatar byŭ u stanie kupić palityčnuju pasłuchmianaść svajho narodu. Dachody dazvalajuć jamu taksama ŭtrymlivać vielizarny aparat biaśpieki.

Adnak materyjalnaje stanovišča Łukašenki stała mienš stabilnym u apošni čas, stvaryŭšy vydatnuju mahčymaść dla akazańnia cisku. Rasija pačała pastupova admieńvać subsydyi ŭ vyhladzie tannych nafty i hazu, tym časam jak niekali prasunutyja biełaruskija pradukty stali niekankurentazdolnymi z pryčyny adsutnaści investycyj i reformaŭ u ekanomicy na praciahu šmatlikich hadoŭ. Kab zapoŭnić dzirki ŭ svaim biudžecie, Miensk uziaŭ kredyty ŭ ašałamlalnym maštabie, patroiŭšy doŭh krainy za apošnija try hady. Šyroka razreklamavanaja «biełaruskaja madel» pačynaje ŭsio čaściej traščać pa švach. Hetyja słabyja punkty EZ i ZŠA pavinny vykarystać.

Pa-pieršaje, EZ pavinien zamarozić aktyvy dziaržaŭnych — heta značyć, Łukašenkavych — biełaruskich kampanij i ich daččynych pradpryjemstvaŭ. ZŠA dakazali try hady tamu, što takija zachady spracoŭvajuć, kali aktyvy naftavaj manapolii «Biełnaftachim» byli zablakavanyja, prymušajučy Łukašenku vyzvalić palityčnych źniavolenych.

Pa-druhoje, EZ pavinien pierahledzieć svajo spažyvańnie tavaraŭ biełaruskaha ekspartu. Prodaž, u asnoŭnym u Eŭropu, naftachimičnaj pradukcyi daje bolšaść biełaruskich dachodaŭ. Dyzelnaje paliva ź biełaruskich NPZ, adnak, składaje ŭsiaho tolki 1 adsotak jaho spažyvańnia ŭ Eŭraźviazie. Spynieńnie handlu im pryniesła b nievialikuju škodu Eŭropie, ale stała b surjoznym ekanamičnym udaram dla spadara Łukašenki. Biełaruś taksama nieŭzabavie budzie vymušana spłačvać pazyki, tym časam jak jaje ŭłasnyja rezervy pamianšajucca, a kredyty patrabujuć absłuhoŭvańnia. Kali režym nia vyzvalić bolš źniavolenych, Eŭraźviaz pavinien pierakryć svaje kredytnyja linii dla Biełarusi. Mižnarodnyja finansavyja instytuty, takija jak Eŭrapiejski bank rekanstrukcyi i raźvićcia, Mižnarodny valutny fond i Suśvietny bank, pavinny pajści śledam.

Narešcie, spadar Łukašenka doŭhi čas bahacieŭ ad ciomnych ździełak sa zbrojaj.

Apošnim časam źjavilisia padazreńni, što Biełaruś pradała rakietnyja kompleksy Iranu, a źniščalniki, pastaŭlenyja Biełaruśsiu i ź biełaruskimi pilotami, bambavali francuskuju vajskovuju bazu ŭ Kot-dJIvuary padčas hramadzianskaj vajny ŭ 2004 hodzie. Dalejšyja takija ździełki sa zbrojaj pavinny być zablakavanyja. Akramia pavyšeńnia biaśpieki, hetki krok taksama padsušyć istotnuju krynicu dachodaŭ dla režymu.

Niekatoryja pieraścierahajuć, što prymajučy bolš žorstkija zachady, EZ i ZŠA vykličuć supraciŭ Rasiei (jakaja razhladaje Biełaruś jak častku svajoj šyrejšaj sfery intaresaŭ), a inšyja bajacca, što karnyja zachady šturchnuć spadara Łukašenku ŭ abdymki Maskvy. Ale hetyja arhumenty nie pavinny strymlivać dziejańniaŭ. Rasija hladzić na Łukašenku sa skieptycyzmam i naŭrad ci zachoča ŭžyć niejkija zachady ŭ adkaz. Sankcyi ŭ minułym byli ŭviedzienyja tamu, kab adreahavać na toje, jak spadar Łukašenka abyšoŭsia sa svaim ułasnym narodam, a nie tamu, što Miensk i Maskva byli ŭ dobrych abo drennych adnosinach; hety padychod nie pavinien źmianicca.

Karnyja zachady, jakija my prapanujem, mocna padtrymlivajucca biełaruskimi demakratami. Jany viedajuć, što nastaŭ čas, kab zakrucić hajki apošniamu dyktataru Eŭropy. U časie kali chvala svabody ruchajecca z Tunisu ŭ Ehipiet i dalej, Eŭropa pavinna dapamahčy tym, chto šukaje svabodu na jaje miažy — i supraćstajać pahrozie, jakuju Łukašenka ŭjaŭlaje dla svabody i pravoŭ čałavieka ŭ Biełarusi i za jaje miežami.

• 0
• 0
• 0
• 0
• 0
• 0
• 0
• 0