«U Čyžoŭcy ciapier žyć lepš, čym u centry»

Tut pracujuć takija zavody-hihanty, jak aŭtamabilny, padšypnikavy, zavod kołavych ciahačoŭ, aŭtamabilnych pryčepaŭ i kuzavoŭ, «Minskžalezabieton», «Minskdreŭ», «Harmałzavod № 2» i inš., a taksama dziejničaje bolš za 100 pradpryjemstvaŭ u svabodnaj ekanamičnaj zonie «Minsk». Jak takaja asablivaść rajona ŭpłyvaje na žyćcio nasielnikaŭ i čym jašče admietny Zavodski rajon, «Źviazda» spytała kiraŭnika Administracyi Zavodskaha rajona Aleha Žohłu.

— Naš rajon adroźnivajecca ad usich astatnich tym, što tut skancentravana najbolšaja kolkaść pramysłovych pradpryjemstvaŭ. Tolki pa aficyjnaj spravazdačnaści — 56 pradpryjemstvaŭ, a ŭsich tych, jakija viaduć haspadarčuju dziejnaść na terytoryi rajona, — bolš za 150 (u tym liku i ŭ svabodnaj ekanamičnaj zonie «Minsk»). Blizka pa ŭzroŭni pramysłovaści da nas padychodzić Partyzanski rajon, ale, u pryncypie, my pa hetym pakazčyku bolšyja za dva lubyja inšyja rajony, navat kali ich abjadnać. U asnoŭnym našy pradpryjemstvy majuć mašynabudaŭničuju nakiravanaść — hetaja halina ŭ ahulnym abjomie zajmaje bolš za 70%.

Akramia taho, naš rajon — treci pa kolkaści nasielnictva ŭ Minsku. Tamu kali Frunzienski i Maskoŭski — heta bolš spalnyja rajony, to ŭ nas adnačasova mnoha i pramysłovaści, i nasielnictva.

— Minuły hod byŭ nie padobny na inšyja: šmat jakija pradpryjemstvy sutyknulisia z prablemami z-za kryzisu, a niekatoryja (pieravažna eksparciory), naadvarot, skončyli hod davoli paśpiachova. Jakim byŭ 2011 hod dla pradpryjemstvaŭ vašaha rajona?

— Pakolki my — pramysłovy rajon, to na nas uskładzieny surjoznyja abaviazki pa vykanańni prahnoznych pakazčykaŭ. Jak ja ŭžo kazaŭ, my zajmajem kala čverci ad usiaho abjomu pramysłovaści ŭ Minsku, tamu praca našych pradpryjemstvaŭ istotna ŭpłyvaje na pracu ŭsiaho horada. I vykanańnie prahnoznych pakazčykaŭ — adna z važniejšych zadač administracyi rajona i kiraŭnikoŭ pradpryjemstvaŭ. U 2011 hodzie temp rostu abjomaŭ pramysłovaj vytvorčaści ŭ faktyčnych cenach skłaŭ 232,6% pry zdańni 127,6%.

Kali kazać pra inviestycyjnuju i źniešnieekanamičnuju dziejnaść, to jany ŭzajemaźviazany. Dziakujučy inviestycyjam atrymlivajecca inavacyjnaja pradukcyja, jakaja samym niepasrednym čynam źviazana z ekspartam: novaja pradukcyja lahčej znachodzić svaich pakupnikoŭ za miežami krainy. Zadańnie pa inviestycyjach u minułym hodzie ŭ nas vykanana, i, što vielmi važna dla pramysłovaha rajona, u nas vysokaja dola inviestycyj u zakupku mašyn i abstalavańnia — kala 60%. Vykanali my i zadańnie pa inavacyjnaj pradukcyi, a taksama dobra naraścili ekspart u dołaravym ekvivalencie, u tym liku i pa akazańni pasłuh: ahulny abjom ekspartu tavaraŭ za 2011 hod skłaŭ 1699,9 młn dołaraŭ, abo 167,7% da ŭzroŭniu 2010 hoda (pry zadańni 154%), a ekspart pasłuh skłaŭ 37,5 młn dołaraŭ (rost na 27,5%). U nas taksama atrymałasia skaracić admoŭnaje salda źniešniaha handlu tavarami: zhodna z płanami, jano pavinna było skłaści minus 280 miljonaŭ dołaraŭ, a faktyčna atrymałasia tolki minus 72,3 miljona. Salda źniešniaha handlu pasłuhami ŭ nas stanoŭčaje pa vynikach 2011 hoda i składaje 18,7 miljona dołaraŭ. Što tyčycca vynikaŭ pieršaha kvartała hetaha hoda, to situacyja raźvivajecca taksama dobra: ekspart raście i niama nijakich pieradumoŭ, kab my nie vykanali sioletniaje zadańnie.

Darečy, pryvatny biznes, jaki jość u nas u rajonie, taksama maje vysokija pakazčyki pa inviestycyjach i źniešnieekanamičnaj dziejnaści. Sioleta, na žal, tempy krychu ŭpali, ale dynamika ŭsio adno stanoŭčaja, navat kali paraŭnoŭvać z vysokim uzroŭniem minułaha hoda.

— Vy ŭžo adznačyli, što rajon zajmaje treciaje miesca pa kolkaści nasielnictva. Jak iduć spravy z budaŭnictvam novaha žylla?

— Tak atrymałasia, što Zavodski rajon zabudavany ŭžo poŭnaściu, i surjoznych placovak dla žyllovaha budaŭnictva, jak u inšych rajonach, u nas niama. Ale my davoli šmat budujem «kropkava» — kala 30 tysiač kvadratnych mietraŭ u minułym hodzie i kala 80 tysiač kvadratnych mietraŭ sioleta. Darečy, my adzin ź niamnohich rajonaŭ, dzie budujecca viedamasnaje žyllo. Tak, naprykład, dla svaich rabotnikaŭ uzvodziać damy padšypnikavy zavod i MAZ, a ŭ hetym hodzie płanuje pačać budaŭnictva zavod kołavych ciahačoŭ. Akramia hetaha, naša ŭpraŭleńnie kapitalnaha budaŭnictva viadzie kaapieratyvy, sfarmiravanyja dla rabotnikaŭ biudžetnaj śfiery Zavodskaha rajona — nastaŭnikaŭ, miedykaŭ, milicyi i h. d.

— A infrastruktura raźvivajecca?

— Za apošni hod my adramantavali 4-ju dziciačuju balnicu, zaviaršyŭsia pieršy etap rekanstrukcyi 5-j kliničnaj balnicy, pabudavali 17-ju palikliniku, prystupili da ciepłavoj rekanstrukcyi i ramontu 10-j kliničnaj balnicy, kapitalna adramantavali 21-ju palikliniku. Sioleta pavinny zakončyć 22-ju darosłuju palikliniku, viadziom prajektavańnie absalutna novaj palikliniki ŭ rajonie vulic Radyjalnaj i Centralnaj. Praŭda, u suviazi z tym, što značnyja hrašovyja srodki nakiravany na padrychtoŭku da Čempijanatu śvietu pa chakiei ŭ 2014 hodzie, raboty pa prajektavańni iduć nie tak aktyŭna, jak chaciełasia b. Surjoznyja hrošy my asvojvajem i na padtrymańnie ŭ narmalnym stanie dziciačych daškolnych ustanoŭ i škoł.

Vialikuju pracu my zrabili pa ramoncie vuličnaj sietki: za apošni hod adramantavali vulicy Vaśniacova, Narodnuju, Kulašova, Hierasimienki, pieršuju čarhu Partyzanskaha praśpiekta, amal usie vulicy ŭ Šabanach. Zaraz u ramkach padrychtoŭki da Čempijanatu śvietu pa chakiei idzie rekanstrukcyja vulic Kabuškina i Taškienckaj, a ŭ nastupnym hodzie budziem rabić druhuju i treciuju čarhu rekanstrukcyi Partyzanskaha praśpiekta — ad Žyłunoviča da Kabuškina i ad płoščy Vaniejeva da vulicy Kašavoha.

Takim čynam, možna skazać, što ŭ raźvićcio infrastruktury ŭkładvajecca šmat hrošaj — jak horadam, tak i pradpryjemstvami rajona.

— Jakija bujnyja prajekty, akramia «Čyžoŭki-Areny», realizujucca ŭ Zavodskim rajonie?

— U nas viadziecca rekanstrukcyja parku 900-hodździa Minska, idzie vialikaja rekanstrukcyja ŭ zaaparku. U nastupnym hodzie prystupim da rekanstrukcyi zialonaj pojmy raki Śvisłač za zaaparkam da vulicy Haładzieda. Što tyčycca handlu, to ŭ nas u rajonie ŭžo dziejničajuć dva hipiermarkiety, a jašče try znachodziacca ŭ stadyi prajektavańnia. Jość prapanovy i pa budaŭnictvie kram krokavaj dastupnaści. Nie ŭsio, viadoma, atrymlivajecca, bo rajon husta zabudavany. Jość jašče kala 15 inviestycyjnych prajektaŭ na terytoryi rajona, jakija my prapanujem inviestaram: maŭlaŭ, budujcie, raźvivajcie.

Na vulicy Mašynabudaŭnikoŭ u nas zaraz stvarajecca technapark. Pieršy etap hetaha prajekta ŭžo realizavany i tam znachodzicca bolš za 40 arhanizacyj. Tak što my raźvivajemsia nie tolki jak pramysłovy rajon, ale i jak intelektualny.

— Toje, što Zavodski rajon samy pramysłovy, heta, z adnaho boku, dobra. Ale ź inšaha boku — cierpić ekałohija…

— Tak, sapraŭdy, ludzi nie vielmi chočuć žyć u Zavodskim rajonie, bo ličać, što tut drennaja ekałohija. Viadoma, pa ružy viatroŭ usie vykidy pramysłovych pradpryjemstvaŭ iduć na paŭdniovy ŭschod, ale vyniki zamieraŭ u apošni čas pakazvajuć, što nie zusim usio drenna ŭ Zavodskim rajonie. Bo akcent vykidaŭ źmiaściŭsia: asnoŭny ich abjom idzie nie ad pramysłovych pradpryjemstvaŭ, a ad transpartu. Tamu ŭ Čyžoŭcy ciapier žyć lepš, čym u centry. Ale stereatyp zastaŭsia.

Razam z tym, my ŭdzialajem vialikuju ŭvahu prahramie dobraŭparadkavańnia i azielanieńnia rajona. Pahladzicie, kolki ŭ nas zialonaj zony — pojmy ručaja Łošyckaj sistemy, i Biezymiennaha ručaja, i ručaja Traścianka ŭ Šabanach, i Čyžoŭskaha vadaschovišča, a taksama dva parki i zialonaja zona pa Anharskaj. My sapraŭdy «zialony» rajon, i hety imidž treba zachoŭvać, kab niejtralizavać vykidy ad pramysłovych pradpryjemstvaŭ.

— Na terytoryi vašaha rajona znachodzicca miesca, dzie ŭ časy Vialikaj Ajčynnaj vajny byŭ raźmieščany łahier śmierci ŭ Traściancy. Užo daŭno tam źbirajucca budavać miemaryjalny kompleks, ale da realizacyi sprava tak i nie dachodzić. Moža, u bližejšy čas niešta pamianiajecca ŭ lepšy bok?

— Stvareńnie miemaryjalnaha kompleksu ŭ Traściancy — heta sprava nie tolki horada, ale i respubliki. Terytaryjalna jon znachodzicca ŭ našym rajonie, tamu my adsočvajem usie padziei: byŭ praviedzieny konkurs, jość vyjhryšny varyjant. I spadziajusia, što ŭ bližejšy čas budzie pryniata rašeńnie ab vydzialeńni srodkaŭ. Zaraz my padtrymlivajem hetaje miesca ŭ naležnym paradku.

— Naprykancy chaču spytać pra zvaroty ludziej. Nakolki ja viedaju, kožnuju sieradu vy pravodzicie pryjom hramadzian. Z čym prychodziać da vas ludzi? Što siońnia niepakoić žycharoŭ stalicy?

— Sapraŭdy, kožnuju sieradu z 14 da 20 hadzin luby hramadzin moža pryjści na pryjom navat biez papiaredniaha zapisu (praŭda, kali pa žyllovych pytańniach, to lepš zapisacca zahadzia, kab my mahli padniać dakumienty i padrychtavacca da sustrečy). Z čym prychodziać ludzi? Ja skažu tak: kali 3–4 hady tamu zvaroty hramadzian u asnoŭnym tyčylisia absłuhoŭvańnia žyłoha fondu, to za apošni čas nam udałosia likvidavać prablemy pa ciečach dachu, pa stykach, pa ŭtrymańni padjezdaŭ. Zaraz robim upor na vyrašeńnie prablem z kapramontami. A na pieršaje miesca vyjšli zvaroty, źviazanyja z pytańniami nakont budaŭnictva žylla — chto maje prava na lhotny kredyt, jak źmianiłasia zakanadaŭstva i h. d. U ludziej šmat pytańniaŭ, starajemsia im tłumačyć pa miery mahčymaści. Nastupnaja vostraja tematyka — heta kropkavaja zabudova. Usie chočuć, kab budavali dzie zaŭhodna, ale tolki nie nasuprać ich voknaŭ. Tamu, kali pačynajem budavać jaki-niebudź dom u Zavodskim rajonie, abaviazkova atrymlivajem 20–30 listoŭ z pratestami…

Naohuł my starajemsia maksimalna vyrašyć prablemy na svaim uzroŭni, kab čałaviek nie išoŭ skardzicca vyšej. Vidać, atrymlivajecca, bo ŭ našaha rajona samy nizki pracent zvarotaŭ nasielnictva na tysiaču žycharoŭ — nižej za haradski pakazčyk.

• 0
• 0
• 0
• 0
• 0
• 0
• 0
• 0