AAN patrabuje vyzvalić biełaruskich palitviaźniaŭ

Nieadkładna i biez umovaŭ vyzvalić usich palitviaźniaŭ u Biełarusi zaklikaje rezalucyja, kansultacyi pa prajekcie jakoj siońnia prajšli u AAN.

Napiaredadni zaŭtrašniaha abmierkavańnia Biełarusi ŭ Radzie AAN pa pravach čałavieka kansultacyi ŭ Ženevie arhanizavała misija Jeŭraźviazu ŭ AAN, jakaja inicyjavała rezalucyju. Kansultacyi prachodzili adkryta i ŭ ich brali ŭdzieł usie achvotnyja, ale pradstaŭniki biełaruskaj misii adsutničali.

U prajekcie rezalucyi taksama patrabujecca pravieści poŭnaje, prazrystaje i adkrytaje rasśledavańnie ŭsich źviestak ab katavańniach i biesčałaviečnym abychodžańni z palitviaźniami, a taksama nieadkładna spynić praktyku administracyjnych zatrymańniaŭ aktyvistaŭ, palitykaŭ, hramadskich dziejačoŭ, žurnalistaŭ i pravaabaroncaŭ i nie pieraškadžać ich svabodnamu ruchu, u tym liku pajezdkam za miažu.

Prajekt rezalucyi zaklikaje ŭłady Biełarusi vykanać usie rekamendacyi sa spravazdačy Viarchoŭnaha kamisara AAN u pravach čałavieka ab situacyi ŭ Biełarusi.

U prajekt uklučanaje i rašeńnie pra pryznačeńnie mandata specdakładčyka pa Biełarusi i zaklik da ŭładaŭ pra paŭnavartasnuju supracu ź im, pradstaŭleńni ŭsioj nieabchodnaj infarmacyi i mahčymaściaŭ naviedać krainu.

U časie abmierkavańnia prajektu rezalucyi jaho padtrymali Japonija, ZŠA i mnohija jeŭrapiejskija krainy,

z krytykaj dakumienta vystupili Rasija, Kuba i Kitaj.

Rasija nazvała rezalucyju «niepraduktyŭnaj, palityzavanaj» i zajaviła, što «jana nie daść karyści».

Rasieja, Kuba i Kitaj zajavili ŭ časie kansultacyjaŭ pa Biełarusi, što sytuacyja tam nie patrabuje ŭviadzieńnia mandatu śpiecdakładčyka AAN.

Kitajski pradstaŭnik skazaŭ, što Kitaj «nie moža pavieryć, što Jeŭraźviaz z takoj upartaściu robić kroki suprać Biełarusi, jakaja źjaŭlajecca jaho blizkaj susiedkaj» i što Kitaj rasčaravany takim ciskam na Biełaruś z boku Rady AAN u pravach čałavieka. Kitaj zajaviŭ, što «rašuča suprać hetaj rezalucyi, jakaja nie zrobić ničoha dla palapšeńnia pravoŭ čałavieka ŭ Biełarusi. Tekst rezalucyi hruntujecca na spravazdačy Viarchoŭnaha kamisara, jakaja nikoli nie była ŭ Biełarusi».

Rezalucyju ŭ takim vyhladzie padtrymali Vialikabrytanija, Narvehija, Niderłandy, Polšča, Francyja, Šviecyja, ZŠA, Japonija, — usiaho bolej jak 20 krainaŭ.

Pradstaŭnik misii Polščy ŭ AAN nazvaŭ «demanstracyjaj niepavahi» z boku biełaruskaj misii toje, što nichto ź jaje pradstaŭnikoŭ nie pryjšoŭ na kansultacyi. Pradstaŭnik Rasii adkazaŭ, što «heta nie dziŭna», bo tut niama pra što havaryć: «Vy ŭžo dva hady nie žadajecie ničoha słuchać».

«Nam niama pra što z vami razmaŭlać», — taki adkaz atrymała i Fundacyja Damoŭ pravoŭ čałavieka ad biełaruskaj misii, kali zaprasiła jaje na kanferencyju pa situacyi ŭ Biełarusi

Pradstaŭnik misii Rasii zajaviŭ taksama ŭ časie siońniašnich kansultacyjaŭ, što biełaruski ŭrad nakiroŭvaŭ zaprašeńni vaśmi śpiecdakładčykam AAN i Viarchoŭnamu kamisaru naviedać krainu, ale jašče nie atrymaŭ adkazu.

Tym časam, ekśpierty Rady AAN u pravach čałavieka paviedamlajuć, što nie mohuć atrymać adkazaŭ na svaje prośby naviedać Biełaruś. Detalnaja infarmacyja ab hetym pradstaŭlenaja na sajcie Rady AAN pa pravach čałavieka.

Pakolki Biełaruś — kraina, jakaja vyklikaje zakłapočanaść Rady AAN pa pravach čałavieka,

Ofis Viarchoŭnaha kamisara AAN pa pravach čałavieka zamoviŭ manitorynh usioj situacyi z pravami čałavieka ŭ Biełarusi paśla 19 śniežnia 2010 hoda.

Spravazdača śviedčyć, što ŭrad Biełarusi demanstruje nieachvotu i niekampietentnaść u pytańniach zvyčajnaj praktyki supracoŭnictva krain-čalcoŭ AAN z Radaj pa pravach čałavieka.

Da prykładu, dla vyvučeńnia situacyi z pravami čałavieka ŭ Biełarusi, jak taho patrabavała letašniaja červieńskaja rezalucyja, Rada AAN trojčy źviartałasia da ŭradu Biełarusi z prośbaj dazvolić pryjezd rabočaj hrupy Ofisu Viarchoŭnaha kamisara pa pravach čałavieka. Aficyjnaja Biełaruś, adnak, nie pryznała vyšejzhadanaj rezalucyi i admoviłasia supracoŭničać.

U jakaści alternatyvy pryjezdu rabočaj hrupy aficyjny Minsk prapanavaŭ Viarchoŭnamu kamisaru Navanetchem Piłej pryjechać adnoj u Biełaruś. Nasamreč

takaja zamiena vizitu rabočaj hrupy dla vykanańnia peŭnaha mandatu na asabisty vizit Viarchoŭnaha kamisara supiarečyć isnujučamu ładu pracy Rady AAN. Aficyjny Minsk nie moh hetaha nie viedać, kali pieradavaŭ zaprašeńnie

Na 27 červienia ŭ Radzie AAN zapłanavany interaktyŭny dyjałoh ab sytuacyi ŭ Biełarusi. Kančatkovaje hałasavańnie budzie naprykancy 20-j siesii Rady AAN pa pravach čałavieka.

• 0
• 0
• 0
• 0
• 0
• 0
• 0
• 0