Nadzieja Astapčuk: Mianie šantažavali

Biełaruskaja šturchalnica jadra Nadzieja Astapčuk, pazbaŭlenaja załatoha miedala Alimpijady ŭ Łondanie z-za stanoŭčaj dopinh-proby, u intervju Priessbołu zaznačyła, što pačynajučy z krasavika jaje bieśpierapynna treśli antydopinhavyja ahienctvy. Tak, u mai jana zdavała testy dvojčy, u červieni - trojčy, u lipieni - dvojčy. Apošni raz - 30 lipienia.

Usie testy byli admoŭnymi.

Barys Tasman: Zastajecca vykazać zdahadku, što dopinh trapiŭ u tvoj arhanizm pamiž apošnim testam u Minsku i pieršym u Łondanie...

Vychodzić tak. Ale vy ŭjaŭlajecie, što treba stracić rozum, kab najeścisia dopinhu pierad samym vyjezdam u Łondan, viedajučy, što tam čakaje abaviazkovy dopinh-kantrol. Treba być sabie voraham.

Ale ž niechta moža być zacikaŭleny ŭ tym, kab ciabie padstavić?

Toj čałaviek, vy viedajecie, pra kaho ja kažu, toj, jaki zajmaŭsia šantažom, jon mnie daŭno abiacaŭ: u ciabie buduć prablemy z dopinh-kantrolem.

Što źbiraješsia rabić?

My z Alaksandram Mikałajevičam Jafimavym pasprabujem rasśledavać hetu spravu, u tym liku z dapamohaj śledčych orhanaŭ.

A, darečy, dzie ty znachodziłasia pierad adjezdam?

Da 3 žniŭnia była na zbory ŭ Raŭbičach, a 4-ha my z trenieram vylecieli ŭ Łondan... Usio, što ŭdasca daviedacca ŭ vyniku rasśledavańnia, stanie viadoma ŭsim. Mnie niama čaho chavać ad ludziej.

Ja vydatkavała šmat sił, kab stać alimpijskaj čempijonkaj, mnie niama čaho apraŭdvacca. Nie chaču tak zakančvać spartyŭnuju karjeru.

* * *

Biełaruska Nadzieja Astapčuk, jakaja zavajavała załaty miedal u šturchańni jadra na Alimpijadzie ŭ Łondanie, dyskvalifikavana za stanoŭčuju dopinh-probu. Pra heta paviedamlaje aficyjny sajt Mižnarodnaha alimpijskaha kamiteta (MAK).

Jak adznačajecca ŭ relizie, u abiedźviuch dopinh-probach Astapčuk byŭ vyjaŭleny zabaronieny preparat mietenałon. Pieršaja była ŭziata napiaredadni spabornictvaŭ, druhaja — adrazu paśla ich zaviaršeńnia.

Na padstavie stanoŭčych prob pa rekamiendacyi Dyscyplinarnaha kamiteta MAK Vykanaŭčy kamitet MAK pastanaviŭ nastupnaje:

1. Nadzieja Astapčuk:

a) dyskvalifikavana ŭ alimpijskich spabornictvach pa šturchańni jadra b) vyklučana sa składu ŭdzielnikaŭ Alimpijady 2012 hoda ŭ Łondanie

v) pavinna viarnuć miedal i dypłom

h) pavinna nieadkładna viarnuć alimpijskuju identyfikacyjnuju kartu i akredytacyju.

2. Mižnarodnaj fiederacyi lohkaj atletyki (IAAF) nieabchodna źmianić i skarektavać vyniki alimpijskich spabornictvaŭ u žanočym šturchańni jadra.

3. NAK Biełarusi ŭkazana na nieabchodnaść viarnuć uznaharody Astapčuk.

4. MAK pieraraźmierkavaŭ uznaharody i dypłomy pamiž spartsmienkami, jakija zaniali miescy ŭśled za Astapčuk. Takim čynam, alimpijskaj čempijonkaj abjaŭlena novaziełandka Valery Adams, druhoje miesca prysudžana rasijancy Jaŭhienii Kałodcy, treciaje — kitajancy Hun Licziaa.

5. NAK Biełarusi pavinien vykanać rasparadžeńnie Vykanaŭčaha kamiteta MAK.

6. Usie rašeńni nabyvajuć moc nieadkładna.

U Ministerstvie sportu i turyzmu Biełarusi navinu pra dyskvalifikacyju Nadziei Astapčuk pakul nie kamientujuć. Pavodle słoŭ pres-sakratara arhanizacyi Uładzimira Nieściaroviča, dakumientaŭ, jakija paćviardžajuć dyskvalifikacyju Astapčuk, u Minsportu pakul niama.

13 žniŭnia ŭ 15.00 u pres-centry haziety «Komsomolskaja pravda» v Biełoruśsii» pavinna była adbycca pres-kanfierencyja Nadziei Astapčuk,

adnak u apošni momant jaje admianili biez tłumačeńnia pryčyn.

Nahadajem, 6 žniŭnia na Alimpijadzie ŭ Łondanie 31-hadovaja Nadzieja Astapčuk zaniała pieršaje miesca ŭ finale spabornictvaŭ pa šturchańni jadra. Svoj lepšy vynik — 21 mietr 36 santymietraŭ — jana pakazała ŭ treciaj sprobie. U vynikovym pratakole spartsmienka na 66 santymietraŭ apiaredziła ŭładalnicu siarebranaj uznaharody Valery Adams z Novaj Ziełandyi.

Alaksandr Łukašenka ŭznaharodziŭ Astapčuk ordenam Ajčyny III stupieni. Hetaj uznaharody jana ŭdastojena za «vysoki prafiesijanalizm, vydatnyja spartyŭnyja dasiahnieńni i pieramohu na XXX letnich Alimpijskich hulniach».

Uličvajučy rašeńnie MAK ab dyskvalifikacyi Astapčuk, ahulnaja karcina vystupleńnia biełaruskaj zbornaj na Alimpijadzie ŭ Łondanie stała jašče horšaj.

Takim čynam, u aktyvie biełarusaŭ ciapier nie 13, a 12 uznaharod: 2 załatyja, 5 siarebranych i 5 bronzavych. Heta horšy vynik vystupleńnia na letnich Alimpijadach u suvierennaj historyi.

Kiraŭnik dziaržavy staviŭ pierad biełaruskaj kamandaj zadaču zavajavać u Łondanie 25 miedaloŭ, u tym liku 5 załatych.

BiełaPAN

• 0
• 0
• 0
• 0
• 0
• 0
• 0
• 0