Referendum pa pryvatyzacyi

Referendum pa pryvatyzacyi

Naftachimičny kompleks — samaja prybytkovaja halina vytvorčaści, jakaja pracuje na ekspart. Jon daje dziaržavie žyvuju valutu, harantujučy ekanamičnuju niezaležnaść. Ci ž nia musić u takim razie pytańnie pra jahonuju pryvatyzacyju vyrašacca šlacham usienarodnaha referendumu? Takoje pytańnie zadali my ekspertam.

Alaksandar Kłaskoŭski, redaktar infarmacyjnaj kampanii BiełaPAN:

— Ja nie liču, što takija pytańni varta vyrašać na referendumie. Rej tut musiać vieści kiraŭniki j specyjalisty. Kali b bolšaściu hałasoŭ vyrašalisia pytańni ekanamičnych pieramienaŭ, kraina była b u stahnacyi. Ale pieramieny ŭ nas musiać adbycca. Pavinien pryjści kapitał. I nieistotna, što jon budzie rasiejski: kapitał jość kapitał. Nia treba dumać, što heta abaviazkova budzie niejki kryminalny kapitał. Prodaž pradpryjemstvaŭ nia budzie prodažam Radzimy. Vuń japoncy vałodajuć pałovaj Ameryki, i heta nie idzie na škodu krainie — Ameryka tolki bahacieje.

Michaił Kavaloŭ, dekan ekanamičnaha fakultetu BDU:

— Ja admoŭna staŭlusia da takoj idei. Kanstytucyja daje prezydentu ŭsie padstavy j pravy pravodzić pryvatyzacyju. Ale hetyja zavody — biełaruskaje “familnaje srebra”, jakoje raspradajuć tolki ŭ samy apošni momant.

Treba pradavać spačatku tyja pradpryjemstvy, ź jakimi my nia viedajem, što rabić. Ale ŭsio ž navažylisia na taki krok. Čamu? Pa-pieršaje, treba było pierałamać investycyjnuju sytuacyju. Pa-druhoje, biaz nafty hetyja zavody nia majuć kaštoŭnaści. Navat Litva ŭ Mažejkiai pierapracoŭvaje rasiejskuju naftu, a nie amerykanskuju. Adnak chaciełasia b, kab pryvatyzacyja prajšła nie ciškom, a praz adkryty tender. Treba, kab usia pracedura była hałosnaj i prazrystaj dla ŭsich hramadzianaŭ Biełarusi. Kab byli abviestki ŭ hazetach, kab usio prachodziła ledź nie pa televizary.

Michaś Čarniaŭski, historyk:

— Referendum nie patrebny, bo tady ledź nie pa kožnym pytańni tre budzie ładzić referendumy. A pryvatyzavać hetyja zavody treba jak najchutčej. I nia duža važna, čyj tam budzie kapitał. Inšaja reč, što da nas idzie kapitał tolki z adnoj krainy.

Stanisłaŭ Šuškievič, kiraŭnik BSDH:

— Kali vyrašać hetaje pytańnie na referendumie, budzie padobna na bolnicu, dzie chvoryja pravodziać hałasavańnie, jak lačyć inšaha chvoraha. Ale pytańnie pryvatyzacyi naftachimičnaha kompleksu pavinna vyrašać sapraŭdnaja biełaruskaja ŭłada. Musiać być adnolkavyja ŭmovy dla ŭsiaho zamiežnaha kapitału — rasiejskaha, anhielskaha, niamieckaha... Preferencyi mohuć isnavać tolki dla biełaruskaha kapitału.

Ryhor Baradulin, narodny paet:

— Usio idzie da taho, što rana ci pozna Rasieja ŭ nas skupić usio, što zachoča. Hetyja kompleksy ŭ svoj čas byli nam naviazanyja. Ale ŭžo ciapier, kali jany ŭ nas siadziać, jak skuła, dyk chaj zastajucca. Ja dumaju, što pastavić pytańnie na abmierkavańnie varta. Adnak ža ŭ nas niama zakonaŭ, jany nia dziejničajuć. Tamu karyść ad referendumu sumnieŭnaja.

Radzim Harecki, akademik:

— Referendumam takija pytańni vyrašać nielha. Tam ułady jak zachočuć, tak i zrobiać: my ŭžo viedajem, jak prachodziać referendumy. Treba, kab ekanamisty razabralisia z hetym i rastłumačyli ludziam. U nas ža bolšaść słaba raźbirajecca ŭ takich pytańniach. Ale treba, kab vyrašałasia heta hałosna, a nia niejkaj nievialičkaj kučkaj.

Aleś Hurkoŭ, ułaśnik firmy “Sotvar”:

— Kali pradpryjemstva pracuje j prynosić prybytak, dyk i pryvatyzacyja nie patrebnaja — chaj pracuje na karyść dziaržavy. A kali stratnaje — dyk treba pradavać. I tady lepiej heta vyrašać referendumam, čym kuluarna. Ale referendum moža być karysnym, tolki kali dać ludziam dakładnuju, praŭdzivuju infarmacyju pra hetyja pradpryjemstvy.

Apytvaŭ Arkadź Šanski