Pres-dama

Na apošniaj respublikanskaj naradzie pa kadravych pytańniach užo były kiraŭnik prezydenckaj administracyi Ŭrał Łatypaŭ abnarodavaŭ ustanoŭku na amaładžeńnie kirujučych kadraŭ. U pryvatnaści, jon adznačyŭ, što kiraŭniki va ŭzroście 30—35 hadoŭ śmialej biaruć na siabie tyja ci inšyja dziaržaŭnyja rašeńni. I źjavilisia 30-hadovyja kiraŭniki zamiežnych dypmisij i inšych dziaržstruktur. Hetaja ŭstanoŭka znajšła svajo adlustravańnie i ŭ niadaŭnim kadravym pryznačeńni. Prezydent svaim ukazam naznačyŭ 32-hadovuju Natallu Piatkievič namieśnicaj kiraŭnika Administracyi prezydenta, vyzvaliŭšy jaje ad pasady pres-sakratarki prezydenta.

Vypusknica jurfaku BDU pačała svaju karjeru ŭ prezydenckich strukturach u 1994 h. Da dziaržaŭnaj słužby jaje pryciahnuŭ u toj čas viadomy ŭ atačeńni Łukašenki juryst Alaksandar Płaskavicki, jaki ŭznačalvaŭ Hałoŭnaje dziaržaŭna-pravavoje ŭpraŭleńnie prezydenckaj administracyi. Spn.Piatkievič siem hadoŭ zajmała ŭ hetaj struktury pasady ad viadučaha specyjalista da načalnika ŭpraŭleńnia dziaržaŭnaha i mižnarodnaha pravoŭ. Stała kandydatam jurydyčnych navuk. U 2001 h. paśla aktyŭnaha ŭdziełu ŭ pieradvybarčaj kampanii prezydenta Łukašenki była pryznačana jahonaj pres-sakratarki. Praŭda, tady niekatoryja bolš adznačali najaŭnaść inšaha aktyvista pieradvybarčaha štabu Łukašenki — jahonaj asabistaj lekarki Iryny Abielskaj. Razam z prezydenckim pamočnikam Uładzimieram Makiejem i senataram Mikałajem Čarhincom jana apaviadała pa televizary ab prahramie svajho prezydenta. A Natalla Piatkievič, treba mierkavać, zabiaśpiečvała jurydyčnuju čyściniu hetaj prahramy.

Ludzi, jakija viedajuć jaje, niaźmienna adznačajuć u Piatkievič metanakiravanaść, adukavanaść i ŭmieńnie vykazvać tyja ci inšyja dumki. Najaŭnaść u atačeńni prezydenta žančyn-specyjalistaŭ sparadžała ŭ čynoŭnaha ludu roznaha kštałtu čutki, jakija imi i zastavalisia. Jak i čutki ab tym, što Natalla Piatkievič (proźvišča ŭ dziavoctvie Kraŭčanka) źjaŭlajecca ledź nie plamieńnicaj pieršaha ministra zamiežnych spraŭ suverennaj Biełarusi i byłoha pasła ŭ Japonii Piatra Kraŭčanki.

Baćka Natalli Piatkievič — viadomy ŭ Miensku lekar-stamatolah i ź niadaŭniaje pary deputat harsavietu, a maci — nastaŭnica.

Natalla Piatkievič uvieś čas padkreślivaje svaju addanaść siamji. Jana davoli rana ŭziała šlub i da svajoj dziaržaŭnaj słužby razam z mužam udzielničała ŭ šerahu prajektaŭ pa akazańni jurydyčnaj dapamohi ŭ sfery mižnarodnaha prava niekatorym hramadzkim arhanizacyjam. Ale heta było ŭ daprezydencki čas.

Źjaŭleńnie novaj pres-sakratarki ŭ prezydenta śpiarša vyklikała naturalnuju cikavaść u žurnalistaŭ. Z papiarednikam Piatkievič žurnalistam pracavałasia davoli niabłaha, naziralisia adpaviedny kantakt i subardynacyja. A voś z prychodam Natalli Piatkievič zapanavała žorstkaje staŭleńnie da žurnalistaŭ, asabliva zachodnich ŚMI. Tamu jaje prazvali pres-damaj.

Naprykład, kali prezydent vyrašyŭ naviedać u bolnicy alimpijskuju čempijonku Juliju Nieściarenku, jahonaja pres-sakratarka ŭ davoli žorstkaj formie zabaraniła zdymać hetu scenu karespandentu ahienctva «Reuters». Svaim kaleham jon potym raskazvaŭ, jak jamu daviałosia niečakana pačuć na adras svajho ahienctva nieprynadnuju charaktarystyku. Čyj imidž vyjhraŭ ad takoha staŭleńnia — zrazumieć nieskładana. A hałoŭnaj zadačaj pres-sakratarki prezydenta źjaŭlajecca padtrymańnie stanoŭčaha imidžu svajho haspadara. I heta byŭ nie adziny vypadak takoha kštałtu.

A ŭžo jak spadarynia Piatkievič «prasavała» supracoŭnikaŭ biełaruskaj televizii, dyk jany dasiul zabyć pra heta nia mohuć. Jana nastojliva raiła telespecyjalistam «nie mudravać» i ŭładna, naprykład, kiravała ŭstanoŭkaj śviatła, dekaracyj i h.d. Dla pres-sakratarki, jakaja nie havaryła pa-biełarusku, takija pavodziny byli nastolki naturalnymi, što paśla pasadki za kraty 30-hadovaha Jahora Rybakova na vulicy Makajonka stali kazać pra novaha načalnika BT, jakim moža stać Natalla Piatkievič. I jaje z chvalavańniem niejki čas tam čakali, viedajučy, što jana kreatura kiraŭnika prezydenckaj administracyi Ŭrała Łatypava.

Jaje «svatali» i na miesca zvolnienaha z pasady ministra infarmacyi Michaiła Padhajnaha. Čaho tolki vartyja niekatoryja jaje ŭkazańni «Sovietskoj Biełoruśsii», na jakija kankretna staronki stavić tyja ci inšyja materyjały. Karaciej, upłyŭ pres-damy na sferu prapahandy ŭzrastaŭ. I «ptušaniatka» vyśpieła. Vidavočna, što Łatypaŭ vykarystoŭvaŭ ustojlivuju dumku prezydenta ab nieabchodnaści vyłučać na kirujučyja pasady žančyn.

Pavodle niekatorych źviestak, u jakaści alternatyŭnaj fihury razhladałasia inšaja žančyna — Nina Špak, dyrektarka Instytutu sacyjalna-palityčnych daśledavańniaŭ pry Administracyi prezydenta. Adnak, vidać, Łatypaŭ zdoleŭ pierakanać kiraŭnika dziaržavy ŭ nieabchodnaści pakinuć za jaho novaj namieśnicaj pytańni ŭdaskanaleńnia zakanadaŭčaj bazy krainy, kaardynacyi dziejnaści padspravazdačnych prezydentu dziaržaŭnych orhanaŭ u halinie prava, uzajemadziejańnia prezydenta z orhanami sudovaj ułady.

Šmatabiacalnaj ujaŭlajecca jašče adna sfera, padspravazdačnaja spn. Piatkievič. U adroźnieńnie ad svajho nievalavoha papiarednika, Piatkievič budzie aktyŭna dapamahać śpikieram abiedźviuch pałat parlamentu pisać zakony i ŭdaskanalvać zakanadaŭčuju bazu. Jak viadoma, nie čužy joj i «presinh». Vielmi mahčyma, što na hetym šlachu zakanatvorčaści ŭ novaj namieśnicy kiraŭnika Administracyi prezydenta buduć uźnikać mižasabovyja kalizii z novym śpikieram nižniaj pałaty parlamentu. A jaje vykanaŭčaść i prychilnaść da žorstkaha stylu ŭ pracy całkam suhučnyja z razumieńniem pracy ź ludźmi novaha kiraŭnika Administracyi Viktara Šejmana. Spracujucca.

Raman Jakaŭleŭski

• 0
• 0
• 0
• 0
• 0
• 0
• 0
• 0