Федэрацыя хакея абвяргае чуткі, што зборная прасіла паўмільёна даляраў
«Для ўсіх хакеістаў, якія прыбылі ў размяшчэнне нацыянальнай зборнай і ўзялі ўдзел у алімпійскай кваліфікацыі, выступленне за сваю краіну было справай гонару, а не грошай» — з такой заявай пад загалоўкам «Да ўвагі грамадскасці!» выступіла 12 лютага Федэрацыя хакея Беларусі.
Нагодай для заявы стаў артыкул карэспандэнта газеты «Прессбол» Сяргея Новікава Slovenia, у якім ён паведаміў, што «назаўтра пасля паражэння нашых хакеістаў ад славенцаў быў вельмі ўражаны падрабязнасцю, пачутай з вуснаў статуснага спартыўнага кіраўніка. Аказваецца, перад ад’ездам на алімпійскую кваліфікацыю ў Военс зборная Беларусі рубам ставіла пытанне аб прэміяльных — паўмільёна долараў „на круг“ за траплянне ў Сочы».
У сувязі з гэтым ФХРБ «выказвае здзіўленне матэрыялам».«Ад імя хакеістаў зборнай каманды Беларусі і трэнерскага штаба» федэрацыя «кампетэнтна заяўляе, што нацыянальная зборная каманда Беларусі па хакеі не выстаўляла патрабаванні аб прэміяльных за ўдзел і выхад каманды на Алімпійскія гульні 2014».
«Закон аб СМІ дае журналісту права не раскрываць крыніцу інфармацыі, чым я ў гэтым выпадку і пакарыстаюся, — заявіў БелаПАН Новікаў.— У дапаўненне магу сказаць толькі адно: выказванне, на якое я спаслаўся, было зроблена ў публічным полі, падчас мерапрыемства афіцыйнага характару. Акрамя мяне на ім прысутнічала некалькі дзясяткаў чалавек».
Беларускія хакеісты не трапілі на Алімпіяду ў Сочы, заняўшы другое месца ў сваёй адборачнай групе.
Цяпер чытаюць
«Разагнаць дармаедаў! Аддаць людзям зямлю!» Трактарыст з Хойнікаў, які цяпер жыве ў Латвіі, параўнаў сельскую гаспадарку там і ў нас16
Каментары