Украіна, па вялікім рахунку, банкрут, — заявіў экс-прэзідэнт краіны Леанід Кучма пасля пасяджэння круглага стала ў Кіеве з удзелам Віктара Януковіча і лідараў апазіцыі.
Былы прэзідэнт краіны заявіў таксама, што пасля гэтага круглага стала «ён абсалютна ўпэўнены — ніякае пагадненне пра Мытны саюз Украіны з Расіяй падпісана не будзе».
У той жа час ён з горыччу дадаў: «Калі я раскажу ўсё, што думаю пра тое, што адбываецца, мне трэ’ будзе выехаць з краіны». Гэта прагучала, як крытыка дзейнасці адміністрацыі Януковіча і, у першую чаргу, прэм'ера Азарава.
Пра гэта паведамляюць у твітары журналісты, якія прысутнічалі на круглым стале.
Януковіч агучыў свой план урэгулявання палітычнага крызісу: мараторый на сілавыя дзеянні, круглы стол, амністыя ў аўторак і пакаранне правакатараў. Ніякіх адставак ён не прадугледжвае.
Апазіцыя, у сваю чаргу, патрабуе адстаўкі ўрада і крымінальную справу супраць міністра ўнутраных справаў Захарчанкі за дзве спробы разгону Майдану і збіццё дэманстрантаў.
З тымі разгонамі камедыя. На круглым стале Віктар Януковіч чарговы раз выказаў абурэнне «тымі падзеямі, якія адбываліся на Майдане ў ноч з аўторка на сераду». Раней ён асудзіў таксама першы разгон Майдану — маўляў, гэта была ініцыятыва праваахоўнікаў.
«Я абураны тымі радыкальнымі дзеяннямі, якія былі на Майдане, як з боку, адкрыта скажу, правакатараў, так і з боку сілавых структур, якія паводзілі сябе не заўжды адэкватна», — сказаў ён.
Сёння на свабоду выйшлі 8 з 9 затрыманых у часе беспарадкаў каля Адміністрацыі прэзідэнта 1 снежня.
Што датычыць міжнароднага кантэксту, то Еўрасаюз прапанаваў Украіне аднавіць перамовы з МВФ пад свае гарантыі. Украінскі віцэ-прэм’ер Сяргей Арбузаў сёння правёў перамовы ў Брусэлі з еўракамісарам па пытаннях пашырэння ЕС Штэфанам Фюле. Віцэ-прэм’ера суправаджала вялікая дэлегацыя.
На нядзелю запланавана чарговае вялікае народнае веча апазіцыі.
А ўрадавая Партыя рэгіёнаў звозіць аўтобусамі бюджэтнікаў на свой мітынг, што мае адбыцца на суседняй Еўрапейскай плошчы.
Як чакаецца, у нядзелю на вуліцы Кіева выйдуць сотні тысяч людзей.
Каментары