У М’янме будыйскія манахі зноў правялі вулічнае шэсьце — упершыню пасьля задушэньня ваенным рэжымам масавых пратэстаў.
Ад 100 да 200 манахаў прайшлі па вуліцах гораду Пакоку, дзе месяц таму пачаліся масавыя выступы з патрабаваньнем дэмакратычных рэформ.
Гэтым разам удзельнікі маршу не рабілі ніякіх заяваў. Але паводле сьведчаньняў відавочцаў, дэманстрацыя была накіравана на выказваньне пратэсту хунце.
«Мы працягваем наш пратэст, які пачаўся ў мінулым месяцы, паколькі ніводнае з нашых патрабаваньняў не было задаволена», — сказаў адзін з удзельнікаў маршу. - Мы дабіваемся больш нізкіх цэн на тавары, міру ў краіне, а таксама неадкладнага вызваленьня ўсіх палітвязьняў».
Каментары