Украінская авіяцыя не атакавала населеныя пункты на ўсходзе краіны.
Пра гэта ў сераду, 6 жніўня, заявіў прадстаўнік інфармацыйнага цэнтра Рады нацыянальнай бяспекі і абароны Украіны Андрэй Лысенка, перадае інтэрнэт-выданне «Остров».
«Горад Данецк, як і горад Луганск, як і іншыя населеныя пункты авіяцыяй украінскіх вайскоўцаў не бамбардзіруюцца. Калі гаворка ідзе пра гул ад самалёта, то гэта сапраўды быў самалёт, але самалёт сувязі.
Гэты самалёт забяспечвае сувязь штаба АТА з аддаленымі падраздзяленнямі, якія нясуць службу і трымаюць абарону на рубяжах», — сказаў ён.
Лысенка растлумачыў, што самалёт-рэтранслятар «увесь час мяняе свой маршрут пералёту, каб яго не збілі, таму людзі маглі чуць яго гул у паветры».
Раней сайт гарадскога савета Данецка паведаміў, што мінулай ноччу па горадзе быў нанесены авіяўдар.
Снарады ўпалі на вуліцы Снежнай, у выніку ўтварылася варонка дыяметрам чатыры метры і глыбінёй 1,5 метра. Яшчэ адна бомба не ўзарвалася, на месца здарэння выехалі сапёры. У выніку авіяўдару ніхто не пацярпеў, аднак у выніку артабстрэлаў загінулі трое мірных жыхароў.
Расійскія дзяржаўныя СМІ абвінавацілі ў авіяўдары ўкраінскую армію. Па словах відавочцаў, на якія спасылаецца РІА «Новости», за гадзіну да абстрэлу над Будзёнаўскім раёнам, дзе быў нанесены ўдар, кружыў самалёт-разведчык. У атакаваных раёнах знаходзяцца базы апалчэнцаў.
Каментары