У Жодзіне бацьку самому давялося дапамагаць дзіцяці пасля адмовы дактароў
У Жодзіне адбыўся інцыдэнт, які выклікаў бурнае абмеркаванне сярод мясцовых жыхароў. Аляксандр, бацька трохгадовай дзяўчынкі, расказаў, што яны з дачкой звярнуліся ў прыёмнае аддзяленне мясцовай бальніцы, бо ў дзяўчынкі ў вуху захрас нейкі прадмет. Яны прачакалі 45 хвілін лор-доктара, але той, прыйшоўшы, адмовіўся аглядаць дзіця, спаслаўшыся на тое, што лечыць толькі дарослых, піша Ex-press.live.
У выніку бацькам давялося ехаць у Мінск. Па дарозе Аляксандр самастойна выцягнуў чужародны прадмет з вуха дачкі. У Мінскай абласной дзіцячай клінічнай бальніцы потым пацвердзілі, што здароўю дзяўчынкі нічога не пагражае.
Падчас абмеркавання інцыдэнту ў жодзінскім чаце іншыя жыхары таксама расказалі, што сутыкаліся з аналагічнымі сітуацыямі — калі доктар быў на месцы, але адмаўляўся аглядаць дзіця. Людзі абураюцца, што нават у экстранных выпадках меддапамога недаступная, а прыёмнае аддзяленне не накіроўвае адразу ў адпаведную ўстанову, прымушаючы чакаць дарэмна.
У адміністрацыі бальніцы патлумачылі, што дзіця ўсё ж агледзелі два спецыялісты, але такія выпадкі павінны абслугоўвацца на абласным узроўні, дзе ёсць неабходнае абсталяванне. Аднак многія карыстальнікі лічаць тлумачэнні нездавальняючымі і падкрэсліваюць, што ў Жодзіне няма дзяржаўнага дзіцячага лора, даступнага для насельніцтва.
Гэта сітуацыя закранула важную праблему — недастатковую даступнасць і якасць медыцынскай дапамогі дзецям у Жодзіне. Людзі заклікаюць не маўчаць і паведамляць пра падобныя выпадкі ў адпаведныя органы.
Цяпер чытаюць
Зянковіч назваў імя правакатара, з якога пачалася справа змоўшчыкаў супраць Лукашэнкі. Яго кар'ера цяпер пайшла ўгару23
Каментары
А лука неяк яшчэ выхваляўся, што ён у кожным райцэнтры пабудаваў клінікі ўзроўню, якому пазайздросціць любая сталічная клініка на "загніваюшчам западзе".