Амаль увесь прыбытак з рынку смартфонаў атрымала Apple
Хаця займае толькі 20% гэтага рынку.
Кампанія Apple атрымала 92% аперацыйнага прыбытку сусветнага рынку смартфонаў у першым квартале 2015 года, паведамляе Wall Street Journal са спасылкай на ацэнку інвестыцыйнай кампаніі Canaccord Genuity.
Каля тысячы кампаній у свеце робяць смартфоны. Але значны прыбытак атрымліваюць дзве: Apple і Samsung. Астатнія ў асноўным нясуць страты.
Следам за Apple ідзе Samsung з 15% аперацыйнага прыбытку. Разам з Apple гэта дае больш за 100% аперацыйнага прыбытку рынку якраз праз адмоўныя адсоткі кампаній, што працуюць у мінус.
Apple займае толькі 20% рынку смартфонаў, а яе аперацыйная сістэма iOS значна саступае Android па колькасці актываваных прыладаў. Але сярэдняя цана iPhone складае на першы квартал 2015 года 659 даляраў, тады калі сярэднестатыстычны Android-смартфон каштуе менш за 200.
Справы ў Apple ідуць сёлета лепш, чым у мінулым годзе. Сярэдняя цана iPhone вырасла на 35 даляраў, продажы падняліся на 43%. У мінулым годзе Apple мела толькі 65% аперацыйнага прыбытку рынку смартфонаў. Паводле чутак, у гэтым годзе Apple збіраецца прадаць 85-90 млн iPhone наступнага пакалення.
За першы квартал 2015 года прадала рэкордныя 74,5 млн iPhone. Гэта больш, чым за той жа перыяд было прададзена персанальных камп’ютараў (разам настольных, ноўтбукаў і іншых) — 685 млн. За другі квартал Apple прадала 61 млн сваіх смартфонаў.
Цяпер чытаюць
Каля 19 тысяч камер плануюць усталяваць каля мінскіх пад'ездаў. Гэта амаль у 10 разоў больш, чым цяпер3
Каментары