Міністр фінансаў Германіі Вольфганг Шойбле публічна заклікаў на гэтым тыдні выкарыстаць армію ў выпадку, калі адбудуцца скаардынаваныя тэрарыстычныя атакі ў адным з нямецкіх гарадоў.
Ідэя з'явілася ў ноч на сераду ў сувязі з адменай футбольнага матча Германія—Нідэрланды ў Гановеры па прычыне магчымасці нападу тэрарыстаў.
Згодна з інфармацыяй нямецкіх СМІ, на стадыёне, дзе павінна была прысутнічаць канцлер Ангела Меркель, планавалася падарваць адразу некалькі выбуховых прылад.
«У выпадку сітуацыі, падобнай да парыжскай, з атакамі ў трох-чатырох месцах, нам трэба думаць аб тым, ці дастаткова будзе магчымасцяў нашай паліцыі. Што мы можам зрабіць, каб падтрымаць сілы бяспекі, якіх ужо не хапае?» — сказаў Шойбле газэце Rheinische Post.
Згодна з канстытуцыяй Германіі, Узброеныя сілы могуць выкарыстоўвацца падчас крызісу, аднак пакуль іх выкарыстоўвалі толькі ў выпадку прыродных катастроф.
Міністр унутраных спраў Германіі Томас дэ Мэзьер адзначыў, што нямецкая паліцыя пакуль не патрабуе дапамогі арміі.
Цяпер чытаюць
Якія гарады найбольш пацярпелі ад палітычных рэпрэсій? Вось спіс9
Каментары