На доме, дзе 34 гады жыў і пісаў народны паэт Беларусі Рыгор Барадулін, дагэтуль няма памятнай дошкі.
Ініцыятыву павесіць шыльду праявіў журналіст Глеб Лабадзенка.
Цяпер ідзе кампанія па збору сродкаў на платформе talaka.by.
«Гэта тая праца, якую трэба рабіць без нейкіх датаў, без нейкіх нагодаў», — сказаў Лабадзенка Свабодзе.
Аўтарам мэмарыяльнай шыльды мае стаць Ігар Засімовіч. Ён рабіў крыж на магіле Барадуліна, помнік-меч у памяць паўстанцаў 1863 году на Астравеччыне.
«Скульптар быў на месцы, і мы абмяркоўвалі будучую шыльду, — кажа Лабадзенка. — Самае важнае, што Валянціна Міхайлаўна, жонка Барадуліна, таксама не супраць, каб ён гэта рабіў. Ёй вельмі спадабалася, як атрымалася магіла Рыгора Барадуліна».
Шыльда будзе мець памеры каля 1x1 м і важыць каля 100 кг. Большая частка сумы пойдзе на бронзу — яна дарагая, 25 даляраў за 1 кг.
«Калі мы звярнуліся на скульптурны камбінат пры Саюзе мастакоў, нам назвалі кошт 10 тысяч даляраў, — кажа Лабадзенка. — Гэта з працай архітэктара і скульптара, самой шыльдай. Але мы скарацілі суму амаль утрая».
Ужо на гэтым тыдні скульптар прадставіць некалькі макетаў шыльды ў Беларускі саюз мастакоў і Валянціне Барадулінай. Як толькі збяруць грошы, пачнецца праца над скульптурай.
«Вельмі спадзяюся, што адгукнуцца беларусы, якія жывуць за мяжой, — кажа Лабадзенка. — Тут у Беларусі цяжка будзе сабраць такую суму. Зразумела, што ў нас узровень жыцця такі, што чалавек не можа дастаць з кішэні 100 даляраў і ахвяраваць. Таму дзякуй тым, хто ахвяруе 5 ці 10 рублёў».
Акрамя шыльды сёлета Лабадзенка таксама плануе ўсталяваць некалькі інфармацыйных стэндаў пра пісьменніка ў Вушачах. Два стэнды, каля хаты Барадуліна і ягонай магілы, ужо ўсталяваныя. Перадалі шыльду і школе, дзе вучыўся Барадулін. Аднак яе не павесілі на будынку, а аддалі ў школьны музей.
«Трэба не заломваць рукі, што нешта не названа ў гонар Барадуліна, а думаць, што мы можам зрабіць самі. Думаем правесці талаку са слухачамі курсаў «Мова Нанова»: прыбраць каля хаты, трохі плот парамантаваць».
Цяпер чытаюць
Цемнаскуры студэнт у Мінску паскардзіўся Лукашэнку на дарагую кока-колу. Ужо выбачаўся, але міліцыя ім зацікавілася6
Каментары