У Маладзечне ў сувязі з гібеллю дзяўчынкі на бульбе начальнік аддзела адукацыі і дырэктар школы атрымалі вымовы
Начальнік аддзела адукацыі, спорту і турызму Маладзечанскага райвыканкама Іна Драпеза і дырэктар СШ №11 Аляксандр Люльковіч атрымалі вымовы. Два намеснікі дырэктара школы пераведзеныя ў настаўнікі.
Усе гэтыя дысцыплінарныя спагнанні вынесеныя ў сувязі з гібеллю на бульбяным полі 13-гадовай вучаніцы СШ №11 Вікторыі Папчэні, якая трапіла пад колы МАЗа 29 верасня.
Дырэктар СШ №11 Аляксандр Люльковіч 22 лістапада распавёў Край.бай:
— Так, я і Іна Феліксаўна Драпеза атрымалі вымовы. Гэта звязана з гібеллю дзяўчынкі. Ніякага сакрэту ў гэтым няма. Намеснік дырэктара нашай школы па вучэбнай рабоце Галіна Пішчык пераведзеная ў настаўніка французскай мовы. Намеснік дырэктара па выхаваўчай працы Дзяніс Курэц цяпер працуе настаўнікам гісторыі і сацыяльным педагогам. Гэтыя пераводы таксама з-за гібелі Вікторыі Папчэні. Абодва паніжаныя на пасадзе ў сувязі з аднаразовым грубым парушэннем працоўных абавязкаў.
Па словах дырэктара, месцы яго намеснікаў пакуль застаюцца вакантнымі. Новыя прызначэнні будуць праведзеныя пасля ўзгаднення з аддзелам адукацыі, спорту і турызму райвыканкама.
— Гібель Вікторыі Папчэні — трагедыя для нас усіх. Не толькі для бацькоў дзяўчынкі, але і для педагогаў. Псіхалагічна траўмаваныя настаўнікі, якія былі з ёй на тым полі. Бог чамусьці адвярнуўся ад нас, — сказаў Аляксандр Люльковіч.
Прававы інспектар прафсаюза работнікаў радыёэлектроннай прамысловасці (РЭП) Леанід Судаленка, які прадстаўляе інтарэсы бацькі загінулай дзяўчынкі Алега Папчэні, не задаволены гэтымі дысцыплінарнымі спагнаннямі:
— Я перакананы, што начальнік аддзела адукацыі і кіраўніцтва школы павінны не толькі панесці дысцыплінарныя пакаранні, але іх таксама неабходна прыцягнуць да крымінальнай адказнасці. Калі гэтага не здарыцца, ніхто не дасць гарантыю, што праз нейкі час такая ж трагедыя не паўторыцца ў якім-небудзь іншым рэгіёне Беларусі.
Нагадаем, што 28 лістапада суд Маладзечанскага раёна разгледзіць скаргу Алега Папчэні на інспекцыю працы.
Крымінальная расследаванне па гібелі Вікторыі Папчэні працягваецца.
Цяпер чытаюць
«Разагнаць дармаедаў! Аддаць людзям зямлю!» Трактарыст з Хойнікаў, які цяпер жыве ў Латвіі, параўнаў сельскую гаспадарку там і ў нас16
Каментары