Навукоўцы з Орхускага універсітэта высветлілі, што цнатлівыя самкі павукоў аддаюць сябе на з'ядзенне дзіцянятам сваіх суродзічаў. Пра вынікі даследавання паведамляецца ў Animal Behaviour.
Павукі Stegodyphus dumicola жывуць у вялікіх групавых гнёздах. Разам яны ловяць здабычу, абараняюць гняздо і клапоцяцца пра маладых суродзічаў.
Жывуць яны ўсяго толькі год, таму спарвацца і адкладаць яйкі могуць толькі адзін раз у жыцці.
У ходзе назіранняў навукоўцы высветлілі, што каля 60% самак гэтага віду ніколі не спарваюцца, каб дапамагчы сваім сёстрам даглядаць за яйкамі. Пры гэтым цнатлівыя самкі не толькі дапамагаюць вырошчваць маленькіх павучанят, але і дазваляюць сваім «пляменнікам» і «пляменніцам» сябе з'есці.
«Чым больш копій генаў перадасца наступнаму пакаленню, тым лепш, таму аддача цела на з'ядзенне — цалкам разумнае эвалюцыйнае рашэнне», — паведаміў аўтар даследавання Джонатан Пруіт.
Верагодна, умовы навакольнага асяроддзя таксама прымушаюць самак павукоў паводзіць сябе падобным чынам. «Павукі S. dumicola жывуць у засушлівых ландшафтах, пустынях, дзе цяжка здабыць ежу. Самка, ахвяруючы сабой, не дае маладому пакаленню памерці з голаду», — адзначыў Пруіт.
Літовец Віталіюс Моцкус заняў пасаду Стрыжака ў «Байсоле». Хто гэта такі?34
Каментары