Заўзятар Вянгерскі: Працую ў Еўрасаюзе дальнабойшчыкам, палітычны прытулак прасіць не збіраюся
Заўзятара, які павінен барысаўскаму футбольнаму клубу БАТЭ 5 тысяч еўра, распавёў «Народнай Волі» пра тое, як збіраецца выплочваць гэтую суму.
Нагадаем, што падчас матча Лігі Еўропы паміж БАТЭ і лонданскім «Арсеналам» на поле «Барысаў-Арэны» выбег хлопец з бел-чырвона-белым сцягам. Ахова стадыёна затрымала яго і вывела з поля.
Пазней суд Барысаўскага раёна асудзіў жыхара Вілейкі Аляксандра Вянгерскага на 10 сутак адміністрацыйнага арышту за дробнае хуліганства і «непадпарадкаванне законнаму патрабаванню службовай асобы», а БАТЭ атрымаў ад УЕФА за ўчынак балельшчыка штраф у памеры 5 тысяч еўра.
У выніку БАТЭ вырашыў падаць на Вянгерскага ў суд «рэгрэсіўны іск», каб спагнаць гэтыя грошы, якія клуб збіраецца аддаць «на дабрачыннасць».
Учора стала вядома, што суд Вілейскага раёна задаволіў пазоў футбольнага клуба да балельшчыка ў поўным аб’ёме — Аляксандр Вянгерскі павінен заплаціць БАТЭ 5 тысяч еўра.
— Прадказальнае рашэнне, — распавядае Аляксандр. — Я таму і з’ехаў напрыканцы мінулага году за мяжу на заробкі. Па-ранейшаму знаходжуся не ў Беларусі, мне трэба зарабіць 5 тысяч еўра. Але, як ужо казаў, не збіраюся іх аддаваць БАТЭ, а перадам у дзіцячы дом ад свайго імя. Барысаўскі клуб мог бы хаця б слова сказаць у абарону свайго балельшчыка, але ў яго, відаць, іншая пазіцыя. У такім выпадку ў мяне — свая.
— А як быць з судовым рашэннем?
— Паўтаруся, не буду нічога выплочваць футбольнаму клубу. Няхай вылічваюць грошы з маіх заробкаў, яшчэ нейкім чынам спаганяюць…
— Дзе вы зараз працуеце, калі не сакрэт? Чым займаецеся?
— Пра краіну, у якой знаходжуся, не хацеў бы казаць, а працую вадзіцелем, езджу па Еўропе. У месяц «чыстымі» атрымліваецца дзесьці 1200-1300 еўра, таму неабходную суму для дзіцячага дома праз некалькі месяцаў можна лёгка назбіраць. Думаю, за 5-6 месяцаў гэта ўдасца зрабіць, калі з працай не ўзнікне складанасцей.
— Пасля гэтага вернецеся ў Беларусь?
— Абавязкова. Калі я чытаю на форумах, што, маўляў, Аляксандр Вянгерскі выбег з бел-чырвона-белым сцягам на футбольнае поле толькі дзеля таго, каб прапіярыць сябе і з’ехаць за мяжу, то мне проста становіцца смешна. Ніякі палітычны прытулак прасіць я не збіраюся. Калі б было такое жаданне, то мог бы зрабіць гэта яшчэ раней.
Цяпер чытаюць
«Патраціла 300 рублёў — а яшчэ толькі сярэдзіна чэрвеня!» Беларусы абмяркоўваюць выдаткі на пакос травы і дзеляцца лайфхакамі2
Каментары