Беларускія навукоўцы зарэгістравалі 2 кастрычніка новы від птушак для нашай краіны — аўсянку-рэмез. Пра гэта Tut.by паведаміў арнітолаг Дзяніс Кіцель. Характэрна, што роўна год таму, 2 кастрычніка, навукоўцы ўпершыню злавілі ў Беларусі аўсянку-крошку.
— Станцыя кальцавання птушак «Сасновы Бор» гэтай восенню праводзіць выязныя адловы на рацэ Свольна каля вёскі Лісна Верхнядзвінскага раёна. База размяшчаецца ў гасцявым доме заказніка «Асвейскі». І на другі дзень працы — поспех: мы злавілі аўсянку-рэмез (Emberiza rustica). Гэта першая рэгістрацыя гэтага віду для Беларусі, — распавёў Дзяніс Кіцель.
Аўсянка-рэмез гняздуецца на поўнач ад Беларусі, на зімоўку ляціць у Азію. Раней навукоўцы не бачылі гэтую птушку ў Беларусі, хоць яшчэ ў 1990-х гадах яна гняздзілася каля нашай краіны — у нацыянальным парку «Себежскі» ў Пскоўскай вобласці Расіі, адзначыў эксперт.
— Цяпер з'явіліся доказы, што аўсянка-рэмез можа і да нас залятаць, — дадаў арнітолаг.
Роўна год таму, 2 кастрычніка 2017 года, Дзяніс Кіцель знайшоў у Расонскім раёне аўсянку-крошку, якая таксама стала новым відам птушак у Беларусі.
Цяпер чытаюць
Анатоль Котаў ужо выязджаў у Турцыю і лічыў яе бяспечнай — крыніцы12
Каментары